【的士牌仲值得投資嗎?】(Part 1)


Hello 大家好,我係Peter,之前我哋分別喺Facebook、YouTube同埋IG出咗個Post,問大家對的士牌嘅睇法,個問題就係「你認為的士牌仲值得投資嗎?」,我哋收集咗好多唔同嘅意見,多謝大家嘅留言,我哋嘗試喺度回應吓大家嘅睇法,未訂閱我哋嘅朋友,記得訂閱喇,多謝支持!


喺未回應大家嘅留言之前,可能你都會問一句:「你哋係香港的士交易所,係一間的士牌買賣平台,一定賣花讚花香啦!」,如果你有留意開我哋都會知道,我哋係有嗰句講嗰句,個市況係點,有咩利淡利好因素,我哋都會如實報導,無論你係車主、準買家、又或者司機,都可以掌握最新最真實嘅市況資訊!如果我哋嘅資訊有咩唔夠中肯嘅地方,歡迎留意話俾我哋聽你嘅睇法,多多指教!


好!事不而遲!我哋一齊睇吓之前大家嘅留言先!


之前個問題就係問「你認為的士牌仲值得投資嗎?」,有網民就留言:「唔值得,因為有Uber,的士牌就無咗價值,買磚頭好過!」,冇錯!Uber嘅出現,確實嚴重影響的士生意,亦都大大減低咗的士牌嘅價值,Uber喺2014年正式進入香港,的士牌價就由2015年最高位720幾萬掉頭回落,不過值得留意嘅係,早前Uber司機被裁定非法罪成,Uber司機上訴至終審法院,最後裁定上訴失敗,意味喺香港,Uber司機載客取酬係犯法嘅。


其實,Uber影響的士牌嘅價值,牌價至今回落到400幾萬水平,某程度上其實已經反映咗出嚟,如果要Uber再深入影響的士牌嘅價值,除非Uber喺香港合法化,不過呢個機會率好微,相反,如果Uber選擇退出香港市場,的士牌價好大機會反彈回升。


至於留言提及到「買磚頭好過!」,我相信有好多人都會認同,明白嘅,買樓做投資,係傳統流傳落嚟嘅投資智慧,相信呢10幾20年,好多人都係靠買樓升值而賺到錢,不過同一時間,我都想提提大家,樓價近年都因應加息同埋其他經濟環境而由高位有所回落,值得留意嘅係,香港樓價之高可以話係冠絕全球,雖然冇人會知道今次樓價會調整幾多,但以現時平均租金年回報2厘幾計算,再加上高額嘅稅務成本,從價印花稅,額外印花稅等等,都令投資吸引度降低,相反,平均租金年回報有4厘以上,而且冇任何買賣稅務嘅的士牌,係投資角度嚟睇,可能仲更加吸引,唔知大家又同唔同意呢?歡迎留言講低你嘅睇法。


好!今集Part 1就講住咁多先,嚟緊下集Part 2,我哋會繼續回應大家之前嘅留言,密切留意我哋香港的士交易所,我哋下集見!


Peter Tseung

香港的士交易所 HKTEx (業務部) - 副總裁

2022年11月23日

P.S.:(短片版本將於稍後推出!敬請留意!)


#投資的士牌 #買的士牌 #投資的士 #買的士 #買磚頭 #買樓 #投資物業 #Uber #從價印花稅 #SSD #額外印花稅 #Uber司機 #的士生意 #的士司機收入 #的士司機 #的士車主 #香港的士交易所 #HKTEx #的士牌價 #的士牌價走勢 #2022年 #的士牌仲值得投資嗎 #Part1


67 次查看