大家好，我係Olivia，喺未講呢個題目之前先帶一帶頭盔先，我哋絕對冇任何內部消息知道政府嚟緊7月會點樣修例規管網約白牌車，我哋更加冇可能準確知道的士牌價係會升定跌，我哋拍呢條片嘅主要目的，係同大家一齊分析一吓，喺香港白牌車合法化嘅可能性，另外再同大家預測一吓如果白牌車真係合法化，對的士車主、司機同乘客嘅好處同壞處，喺未開始之前如果未訂閱我哋嘅朋友記得訂閱，多謝支持。
由於喺早前發生咗的士司機自行放蛇捉白牌車事件，引發起社會熱烈討論，無論新聞傳媒、社交平台、甚至網紅主播都紛紛討論的士同白牌車之爭嘅議題，再加上政府早前亦透露將會研究修例規管網約車平台，相關嘅修例建議將會喺7月份公佈，呢個情況就引發起坊間開始討論白牌車合法化嘅問題，更加有人認為修例後白牌車將會合法經營。
首先，我哋要識得分咩係網約車平台，而咩為之白牌車，網約車平台係指提供網絡或手機應用程式Call持牌出租汽車嘅平台，而白牌車就係指一啲冇持有有效出租汽車許可證而載客取酬嘅車輛。
我哋就即管大膽嘅假設，政府會修例容許白牌車合法經營，即係只要你擁有或租用一架普通嘅私家車，就可以合法經營載客取酬嘅生意，喺咁嘅情況之下，的士就再唔係唯一合法認可嘅載客取酬交通工具，營運嘅競爭對手將會大增，的士可以收取到嘅租金會大幅下跌，因為的士嘅營運權利已經唔值錢，所以的士牌嘅價值亦都會大幅下跌，對的士車主嘅影響非常之大。
至於白牌車合法化對司機會有啲咩影響？對的士司機嚟講，由於市場上會出現大量競爭對手，如果同一時間乘客量冇大幅增加嘅話，的士司機可以賺到嘅平均收入將會越嚟越少，估計唯一個好處就係的士車租都會大幅嘅下跌，的士司機就可以平租的士，但係大家唔好以為另一邊廂對白牌車司機會有好處，其實白牌車司機都會遇到同樣嘅問題，就係可以賺到嘅平均收入將會越嚟越少，我哋參考吓內地嘅情況就可以知道，其實內地網約車早喺2016年已經合法化，但最近有傳媒報導，內地網約車司機數量近幾年都不斷急增，令網約車司機嘅每日平均接單量暴跌到單位數字，面對過於飽和嘅網約車市場，內地交通運輸局喺上年2023年4月開始，喺內地多個地區相繼發出「網約車市場飽和預警」，當中包括深圳、溫州、濟南等等嘅地區，之後有唔少嘅城市都宣佈暫停受理網約車經營許可及運輸證嘅核發業務。
咁至於如果香港白牌車合法化對乘客又有啲咩好處同壞處呢？相信最主要嘅好處就係乘客嘅車費會相對有更多優惠，由於引入咗大量競爭，相信營運商會推出更多優惠去搶客，但如果要講到服務質素，係未必可以得到保證，因為喺短時間會增加大量司機，除非有好大嘅力度同資源去監管，而且要有好完善嘅投訴機制，否則都好難有效咁監管司機嘅服務質素。
以上都係我哋大膽假設香港白牌車真係合法化之後嘅情況，咁嚟緊我哋又嘗試分析一吓白牌車合法化嘅可能性，最近運輸及物流局喺回覆傳媒查詢嘅時候指出，政府對網約車平台係持開放嘅態度，但係使用科技嘅同時係必需要合乎法規，包括有關嘅車輛係需要持有有效嘅出租汽車許可證，以保障乘客同其他道路使用者嘅利益同安全，確保道路有效地使用，以及現時有九成市民使用嘅公共交通系統嘅可靠及長遠健康發展。
運輸及物流局又提到，政府一直有就點樣處理非法出租或載客取酬活動聽取業界嘅意見同進行交流，政府正喺度檢視緊現有嘅法例，希望更有效咁處理非法出租或載客取酬活動，亦喺度研究緊點樣規管網約出租汽車平台，強調只有的士同持有有效嘅出租汽車許可證嘅車輛先可以透過平台提供服務，當局會加強打擊非法白牌車活動，政府計劃喺今年7月份，就有關規管所涉及嘅政策同法律觀點，以及海外經驗研究所得嘅考慮要點，同立法會議員、業界以及其他相關嘅持份者進行溝通同聽取意見。
根據以上政府當局嘅回覆我哋可以預視得到，政府係偏向去打擊非法白牌車，多過偏向於俾白牌車合法化，強調只有的士同持有有效嘅出租汽車許可證嘅車輛先可以透過網約車平台提供服務，問題就只係如果嚟緊網約車平台仍然縱容非法白牌車去載客取酬，政府到時又有冇足夠嘅法例條件去檢控違規嘅網約車平台呢？
咁可能你會問，如果政府修例監管網約車平台嘅政策，同時又發出大量新嘅出租汽車許可證，咁樣又有冇機會發生呢？例如好似的士車隊牌照咁，先發出一啲網約車平台牌照，之後再向每一個網約車平台牌照發出幾百張出租汽車許可證，以上咁嘅情況，理論上係有可能發生嘅，不過要留意嘅就係，政府早前引入的士車隊制度，要求申請團隊用市場現有嘅的士牌照組成車隊，再要求的士車隊提升軟硬件設備，例如更換新車、提供網約平台以及提供電子支付系統等等，的士車隊牌照亦都會喺嚟緊7月左右發出，如果政府一邊廂引入的士車隊制度，另一邊廂又發出大量新嘅出租汽車許可證，咁樣對申請的士車隊牌照嘅團隊非常唔公平，另外，如果真係發出大量新嘅出租汽車許可證，亦都會增加咗道路使用嘅負擔，我估呢個情況政府亦都未必想見到。
講到底，非法網約白牌車嘅問題已經存在咗喺香港好多年，政府總唔能夠一直咁俾佢喺灰色地帶上生存，因為而家仍然有好多市民、乘客甚至司機都唔知道網約白牌車到底合唔合法，所以無論修例後出嚟嘅制度係點都好，又無論的士牌價會受影響跌到幾多錢都好，我哋係需要有明確嘅指引同有效嘅法律制度，唔好再俾的士同網約白牌車呢個爭拗持續落去。
唔知你對以上嘅內容又有啲咩睇法？歡迎留言，我哋下集見。
Olivia
香港的士交易所 HKTEx 主播
2024年5月29日
P.S.：短片版本請於YouTube上收看：https://youtu.be/DpVSmu8tz3M
現今政府傾向民意是好事.的士服務差多人投訴是事實，市民贊成白牌車合法化當然好、揸白牌車只需買部私家車、1仔A字牌都可以(即係私家車自動波牌）入行容易，好似送外買踏住架單車就可以做多好的。洗乜嘢去打工呀！行行都話無人手做，有工無人做，現時傻的先會去打工，揸車的做 Uber, 無車牌的去food panda，多好的隨時做又得唔做又得不需去詐病假、現時政府還可考慮一下小販合法化，橫掂而家咁多食肆畀人投訴服務差，藥房又呃遊客，不如開放小販合法化，同白牌車合法化一樣道理啫，你有錢買間舖喺度做生意我冇錢買架木頭車喺你門口做生意一樣係受市民歡迎，政府要迎合市民要求請積極考慮小販合法化，私家小巴合法化，市民歡迎，無牌醫生，牙醫合法化，平靚正增加競爭，提高服務質素🤣