【Uber Taxi按錶收費=合法?】(文字版本)


Hello 大家好,我係Peter,最近Uber推出咗一個「的士按錶收費」嘅乘車試行計劃,到底係點運作嘅呢?Uber點解又會咁做?同埋咁樣又合唔合法嘅呢?我哋喺呢一集,嘗試同大家一齊簡單咁分析一下當中嘅細節。至於本身Uber合法的問題,同埋點解Uber會推行Uber Taxi,我唔喺呢度詳細講,大家可以去我哋個YouTube Channel重溫返之前嘅短片先。


話說呢,係啱啱5月尾至6月份嗰陣,Uber App推出咗一個「的士按錶收費」嘅乘車試行計劃,即係乘客可以喺Uber App裡面選擇乘坐的士嗰陣,按實際乘客坐緊嗰架的士上嘅咪錶去計算收費,而Uber會額外收取$5嘅預約費。當然,呢個「按錶收費」模式講到明係「試行計劃」,即係未必係長遠嘅收費模式,而且其實喺實行緊呢一個模式嘅同時,乘客係可以另外選擇唔按錶收費,甚至係選擇Uber白牌車乘坐。


不過一講到Uber或者Uber Taxi嘅問題,喺一般乘客嘅角度,最重點關心嘅事情,就喺有冇著數咗先?服務質素有冇進步咗?雖然呢方面並唔係我哋呢個Channel主要去睇嘅角度,但我嘗試先用乘客嘅角度去睇呢件事,就正如我係之前嘅短片講到,Uber往往都以優惠吸引新用戶,今次嘅試行計劃都唔例外,都有額外優惠俾新用戶,不過喺一般嘅情況下,Uber及Uber Taxi嘅收費都會貴過一般的士,所以如果Uber Taxi推出咗「的士按錶收費」計劃,喺乘客嘅角度嚟講,就係變相優惠咗。


不過乘客都要留意,其實Uber隨時都會調整收費,就以今年3月為例,因為燃料價格提升,Uber宣佈加收燃料附加費,即時提高每個行程嘅收費,當中Uber Taxi亦包括在內,所以到底Uber Taxi抵唔抵坐,咁就大家自己計一計數。


不過講到尾,我並唔係支持大家用Uber或者Uber Taxi,以上內容,我只係用一般乘客嘅角度去睇今次「的士按錶收費」嘅乘車試行計劃。


咁到底Uber點解要推行「的士按錶收費」試行計劃呢?真係純粹為咗俾優惠俾乘客咁簡單?大家可以細心諗一諗,如果Uber Taxi想俾優惠俾乘客,大可以係佢原本嘅「包車不按錶收費」模式上進行優惠,咁唔係仲簡單直接啲?相信Uber試行「的士按錶收費」計劃嘅原因好明顯,就係Uber Taxi嘗試用一個合法嘅收費模式去運作,原本「包車不按錶收費」模式確實係法律嘅灰色地帶,而且隨時調高調低收費,剝削的士司機利益的同時,其實係破壞緊運輸處定下來的的士收費原則,破壞緊整個的士行業原則,引發起行內不公平競爭。


不過,如果Uber Taxi推行咗「的士按錶收費」模式咁又代唔代表佢喺合法呢?背後有一個最基本嘅原則係非常緊要,就係喺同一個App裡面,乘客竟然係可以選擇「的士按錶收費」同埋「的士包車不按錶收費」,仲可以選擇Call Uber白牌車嚟乘坐。一個集合咗「合法」、「灰色地帶」同「非法」嘅Call車App,喺法律原則上係唔可以接受。事實上,Uber App咁嘅情況,會令乘客誤以為所有Call車服務都係合法,但萬一遇到交通意外,乘客同司機都未必得到合理嘅保障。


如果Uber真心同的士業界合作,推動的士業務發展的話,理應建立一個獨立的Call的士App,按錶收費,與此同時放棄本身的非法白牌車服務,咁樣先算得上為的士業界好既最基本條件。


講到尾,Uber嘅出現,確實破壞緊整個的士事業生態,引發混亂及不公平競爭,希望呢段文章可以幫到你決定日後繼唔繼續用Uber,繼唔繼續支持Uber Taxi。


另外,我哋都好希望香港會發展到一個統一嘅正價Call的士App,乘客方便Call車之餘,司機更可以免費使用,咁樣的士業界先可以健康發展。


咁今集就同大家講到呢度,如果鐘意呢編文章嘅朋友,歡迎Share,同埋留言話俾我哋聽你嘅睇法,記得訂閱埋我哋,下集見。


Peter Tseung

香港的士交易所 HKTEx (業務部) - 副總裁

2022年6月23日


P.S.:(短片版本將於稍後推出!敬請留意!)


#UberTaxi #的士按錶收費 #Uber #UberApp #乘車試行計劃 #Uber合法化 #白牌車 #灰色地帶 #Uber合法嗎 #香港的士交易所 #HKTEx


601 次查看

最新文章

查看全部