top of page

專題探討【的士牌仲值得投資嗎?】(Part 2) 「2022年 - 2023年」


Hello 大家好,我係Peter,今集嚟到Part 2,我哋繼續回應大家嘅留言,如果錯過咗之前Part 1嘅朋友,可以先去返我哋嘅Channel重溫返先,未訂閱我哋嘅朋友,記得訂閱喇,多謝支持!


講返個情況先,我哋之前喺社交媒體出Post問大家「你認為的士牌仲值得投資嗎?」,我哋收集咗好多唔同嘅意見同睇法,今集我哋嘗試繼續回應大家嘅留言,當中有網民留言講到:「(牌價)有跌就有升,最怕尋底未見底」


好!等我喺度簡單講吓的士牌嘅價值先,的士牌價嘅上落,其實就反映緊當刻市場嘅買賣供求情況,當的士生意向好,的士租賃情況同埋租金回報亦預期向好嘅時候,市場上就會多咗買家出現,的士牌價亦會帶動上升。


相反,如果的士生意變差,的士租賃情況亦變差,租金亦同時下降嘅時候,市場就會出現大量沽賣情況,牌價就自然回落,所以講到尾,的士牌嘅價值,最核心嘅因素就係的士生意,當然,無人會準確咁知道的士牌價會升定係會跌,但如果集中觀察最核心嘅因素「的士生意」,其實你都可以大約預期牌價嘅升跌,只要有任何環境因素或政策影響到的士生意變差,的士牌價就會預期下跌。


事實上,的士牌價近幾年都反覆回落,相比起最高峰嘅時候已經下跌咗大約4成,最主要嘅原因係受到白牌車、社會運動、疫情、保險成本、同埋息口問題嘅影響,當然,以上嘅幾個因素,有啲經過咗一段時間之後,已經有所改善同解決,所以大家又唔使太過悲觀,有回報有價值嘅嘢,就會有人持有,的士喺一個城市裡面點都會存在,至於到底而家的士牌價係唔係低位,就要考考大家嘅投資智慧,預測一吓的士生意嘅情況去向。唔知大家又有啲咩睇法呢?歡迎留言話俾我哋知!


好!今集Part 2就講住咁多先,嚟緊下集Part 3,我哋會繼續回應大家之前嘅留言,密切留意我哋香港的士交易所,我哋下集見!


Peter Tseung

香港的士交易所 HKTEx (業務部) - 副總裁

2022年12月8日

P.S.:(短片版本將於稍後推出!敬請留意!)


#的士牌價 #投資的士 #買賣的士牌 #的士司機 #的士生意 #白牌車 #Uber #社會運動 #疫情 #的士保險 #泰加保險 #美國加息 #加息 #投資的士回報 #投資回報

33 次查看
bottom of page