專題探討【的士加價喇】(文字版)


Hello大家好,我係Peter,相信大家睇到「的士加價喇」呢個Topic,大部份人都會唔開心居多,甚至有人會即刻開聲反對。呢個情況我都好明白,有邊一個市民係鍾意加價,但要的士業健康咁發展,合理嘅加價係必須嘅,至於的士加價當中讚成嘅理據,同埋反對嘅誤解,大家可以先重溫返我哋YouTube Channel之前專題探討「的士加價」嘅短片,今集主要講返今次加價嘅內容,同埋補充返一啲實際市場嘅情況。


好,先講吓今次加價嘅內容先,如果有留意開新聞都知道,喺今年5月10號嗰陣,行政會議通過咗,批准的士加價,根據政府向立法會提交嘅文件顯示,新收費將於今年7月17號正式生效。市區的士、新界的士同埋大嶼山的士,頭嗰2公里嘅落旗收費都個別加$3,即係市區的士由$24加到$27,新界的士由$20.5加到$23.5,至於大嶼山的士就由$19加到$22,而落旗後首段跳錶收費每跳增加2毫,以及後段跳錶收費每跳增加1毫。


雖然,今次加價嘅平均加幅都超過1成,係好多人眼中都覺得呢個加幅好大,但係大家都可以客觀地睇一睇,香港的士嘅收費水平,係全球咁多個國家地區嚟講,係屬於中下游嘅水平,收費稱得上係非常平,但係喺香港嘅生活指數及營運的士嘅成本,可以話係非常之高,而且每年都增加緊,我估唔使我多講,大家都會知道同埋感受得到,所以的士嘅收費與成本,可以話係失衡,相信的士嘅收費水平仍然需要追上落後,咁樣的士業先可以健康發展。


不過當講到呢到,總有人會反對加價,甚至有部分的士司機都會反對加價,而主要有2個反對嘅原因,第一,認為的士加價,會令乘坐的士嘅乘客減少,變相令司機收入減少,不過,根據過往嘅經驗,實際嘅情況只會短時間發生,因為通常乘客喺加價初期都未習慣同接受新收費,但長遠會慢慢習慣同接受,載客量會回復正常。


另外,第二個反對加價嘅原因,亦都係大家最大嘅誤解,就係有人認為的士加價直接導致的士車主加租,其實的士車主定立車租嘅時候,最重要係睇市場上的士司機嘅供求情況,如果市場上係缺乏的士司機租車開工,的士車主會主動減租迎合市況。


有一樣嘢我一定要喺呢度補充,就係我見到有啲傳媒報道,令到大眾誤解,以為的士車主喺疫情期間唔減租之餘,仲向的士司機加租,但實際情況係,喺疫情爆發初期,絕大部份嘅的士車主已經即刻主動提供減租津貼俾司機,而且減租幅度都非常之大,有啲仲減租一半以上,當疫情緩和,市民復工復課,的士生意都開始好轉嗰陣,的士車主先開始根據市況,續步加返租金,但實際上到宜家都未去返疫情前嘅租金水平。


所以,車主喺定立租金嘅時候,其實係好睇當時嘅市況,同埋營運的士嘅成本,講開成本,無論維修保養、保險同埋燃油費等等,其實每年成本都不斷上升,呢啲因素都會直接影響的士車租嘅水平。至於的士加價嘅因素,絕對唔係車主考慮定立租金嘅主要因素。


講返今次加價先,其實對上一次加價,已經係2017年4月嘅事,相隔超過5年冇加過價,但呢個5年嘅營運成本加幅都唔少,講到尾,調整收費,係可以俾的士有空間發展,改善服務質素,令乘客可以享用到方便、快捷、舒適嘅服務,所以合理地加價絕對係一件好事,可以改善的士嘅收費與成本失衡嘅情況,令的士業健康發展。


其實政府今次除咗批准的士加價之餘,仲建議咗3項嘅措施,希望可以改善的士服務嘅整體質素。3項建議包括:第一,引入的士車隊管理制度、第二,將現時的士嘅最高乘客座位數目由五個增加至六個,第三,引入的士司機違例記分制度。除此之外,政府亦都建議提高有關白牌車非法載客取酬嘅罰則。


當然啦,以上嘅建議係唔係有效改善的士服務質素,我哋仲要了解當中嘅細節同埋運作,先可以知道,而現時,政府將會籌備相關嘅建議細節,根據立法程序,到時會提交立法會審議。我哋香港的士交易所,會同大家緊貼最新市況,到時會再出Post同大家討論分享。


咁今集就同大家講到呢一度,希望呢個Post可以幫到大家了解今次的士加價係咩一回事,大家都可以用理性嘅角度去睇呢件事,歡迎留言話俾我哋聽你嘅睇法,同埋記得訂閱,下集見!


Peter Tseung

香港的士交易所 HKTEx (業務部) - 副總裁

2022年7月13日


P.S.:(短片版本將於稍後推出!敬請留意!)


#的士加價#的士司機#的士收費#的士車主#的士租金#的士加租#的士司機收入#市區的士#起錶價#的士加錶頭#香港的士交易所#HKTEx

118 次查看