top of page

的士新聞資訊【的士加價預計獲批加2元】2024年5月6日


大家好,歡迎收睇「的士新聞資訊」,我係Hayley,根據消息指出,政府短期內會審議的士加價嘅申請,運輸署會考慮到的士嘅營運成本,同埋市民接受嘅程度等因素審視,喺完成評估之後會將建議提交行會審議,預計市區的士嘅起標價唔會多過HK$30,最大機會係加HK$2,即係起標價加到HK$29,加幅大約7.4%,至於新界的士同埋大嶼山的士嘅起標價預計亦都會調整,加幅就將會同市區的士差唔多,而的士對上一次加價係喺2022年7月,當時所有的士起標價一律加HK$3,有行會成員表示,的士業服務水平參差,審批嘅時候一定會嚴肅把關,顧及市民嘅反應。


立法會交通事務委員會主席陳恒鑌接受傳媒訪問時表示,的士業界面對保險費用上升,營運成本增加,認同的士要加價,只係覺得加幅應該要貼近通脹,佢認為市區的士起標價如果加價HK$2左右,加幅雖然會高過通脹少少,但係就能夠抵銷的士成本上漲嘅壓力,相信社會較容易接受呢個方案。


香港的士小巴商總會理事長周國強就認為,近年的士營運支出不斷上升,的士保險費用大增,而家每架的士每日保險費高達HK$130至HK$150,而維修保養費用近年亦都不斷增加,的士只加價HK$2同期望有啲落差,尤其係當而家連一個午餐都已經加到60幾元嘅時候,的士司機喺非繁忙時間排隊等客,但可能就只係得到「最低消費」嘅20幾元,經營非常困難,周國強表示,如果政府最終決定只係加價HK$2,的士業界只能夠無奈接受。


另外,立法會議員吳傑莊表示,的士加價HK$2較為理性,但係佢比較關注加價能唔能夠為的士業界增加收入,因為的士業界以年長嘅司機居多,甚至令外國遊客亦都感到唔明白,吳傑莊認為問題歸咎於的士司機收入低,年輕人寧願從事其他公共交通工具行業,都唔想揸的士。


唔知你對以上嘅內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見。


Hayley

香港的士交易所 HKTEx 主播

2024年5月6日

P.S.:短片版本請於YouTube上收看:https://youtu.be/17Vm0FSlpeA

 

108 次查看

Comments


bottom of page