top of page

的士牌價走勢回顧2022及2023展望


Hello大家好,我係Peter,啱啱踏入咗2023年,我哋香港的士交易所就襯呢個機會,同大家回顧一吓2022年的士牌價嘅走勢,再同大家展望一吓嚟緊2023年的士牌價嘅情況,無論你係車主又或者係準買家,都希望你可以藉住呢編文章,掌握到最新嘅市況,如果未訂閱我哋Channel嘅朋友,記得訂閱喇,多謝支持!


我哋先睇一睇上年2022年的士牌價嘅走勢圖先,喺2022年成年嚟睇,市區的士牌價,由年頭477萬下跌至年尾441萬,全年下跌36萬,跌幅大約7.5%。至於新界的士牌價,由年頭399萬下跌至年尾341萬,全年下跌58萬,跌幅大約14.5%。




上年2022年的士牌價下跌嘅原因,最主要有3個因素,第一個因素就係年頭受到第5波疫情影響,最高𡶶時期每日超過5萬人感染,市面再次停工、停課、禁晚市,出行人數亦都大大減少,嚴重影響的士生意,第5波疫情要去到2022年4月尾先叫做有所緩和。


而第二個影響的士牌價下跌嘅因素,就係受到泰加保險突然停辦的士保險嘅影響,令的士保費亦都有所提升,車主營運的士嘅成本增加,亦令到部分車主決定退市離場,增加咗的士牌價嘅下行壓力。


至於第三個影響的士牌價下跌嘅因素,就係加息周期正式開始,隨住美國喺2022年3月份開始加息,而且加息嘅幅度亦都有所增加,基於聯繫匯率制度下,香港亦都喺今年跟隨加息,加息直接影響的士按揭貸款嘅成本,令到準買家入市嘅決定變得更加審慎,亦都令本身做緊按揭嘅車主供款壓力增加,所以加息呢一個因素亦都係下半年牌價下跌嘅主要原因。


一連睇咗3個令的士牌喺2022年下跌嘅因素,咁到底上年有冇啲利好的士牌嘅因素出現咗?另外,2023年的士牌價又預期會點樣走?好!等我喺度同大家簡單分析一吓啦!


其實,上年2022年都有一啲利好的士牌嘅因素出現咗嘅,最值得留意嘅就係,的士加價同埋通關嘅消息,大家如果有留意開新聞都知道,的士係上年2022年7月份,正式加價,今次加價已經係相隔5年先再加價,所以相對地加幅都有所落後,大家要明白,合理地加價先可以令的士業界健康發展,所以我並唔係同大家講加價就牌價一定會升,要的士牌有價值,就要令的士生意有好嘅發展。其實講開加價,大家都可以展望一吓嚟緊嘅情況,因為的士收費確實有追落後嘅情況,最近的士團體都分分向政府申請加價,大家可以密切留意。


另外,大家喺2023年要留意嘅重磅消息,就係講咗好耐嘅通關情況,喺上年2022年年尾,政府正式宣佈會逐步同內地通關,消息一出,其實都即時帶動的士牌價反彈上升,市區的士牌價喺12月份升超過3%,大家都希望藉住同內地通關,經濟活動可以回復正常,的士生意亦會有所提升,所以留意的士牌價嘅你,記得要留意今年通關嘅情況。


至於今年仲有咩值得留意嘅消息?就係加息嘅情況,市場預期今年內加息會見頂,不過要留意,高息環境可能會維持一段時間,所以有實力嘅準買家可以考慮俾多啲首期,減低的士按揭借貸嘅風險壓力。


總結嚟講,我對今年2023年的士牌價嘅預測係比較向好,當然啦!各人嘅預測都有啲唔同,唔知你又有咩睇法?歡迎留言,我哋下集見!


Peter Tseung

香港的士交易所 HKTEx (業務部) - 副總裁

2023年1月11日

P.S.:(短片版本將於稍後推出!敬請留意!)


#的士牌價 #的士牌 #投資的士牌 #的士加價 #加價 #第5波疫情 #加息 #美國加息 #銀行加息 #的士按揭 #的士首期 #泰加保險 #的士保險 #市區的士牌價 #新界的士牌價 #2022年 #2023年 #通關 #內地通關 #加息見頂 #減息 #定期存款 #的士車租


793 次查看
bottom of page