top of page

的士牌市場資訊【乘客人次趨勢有所回落】2023年8月8日


大家好,歡迎收睇每星期嘅「的士牌市場資訊」,我係Mia,最近的士牌價急跌,我相信如果有留意開我哋頻道嘅朋友,都應該會知道,今日8月8號最新嘅的士牌參考牌價,市區的士牌價367萬,新界的士牌價308萬,兩者就以市區的士牌價嘅跌幅較為明顯,比起1個月前7月8號嘅市區的士參考牌價409萬,跌咗42萬,跌幅超過一成。


至於大家都好想知道,點解的士牌價會急跌,其實背後都受到好多唔同嘅原因影響,例如:環球經濟環境、的士市場政策改變、保險費飆升、「白牌車」競爭、行內折扣競爭、司機人手短缺等等,我都冇可能喺度同大家一次過分析,不過今次牌價下跌嘅主要因素,明顯係受到銀行加息嘅壓力影響,再加上最近的士牌價再次受到各大傳媒嘅關注,加重咗市場上嘅沽售壓力,令的士牌價出現咗急跌嘅情況。


其實大家要留意以上嘅因素之外,最值得關注就係本身的士生意嘅情況係點,呢方面我哋可以睇吓運輸署最新嘅官方數據,平均每日公共交通乘客人次趨勢,最新只係顯示截至5月份嘅數據,喺呢個圖表我哋可以見得到,最近嘅人次趨勢都有所回落,5月份嘅平均每日乘客人次回落返去到大約1100萬嘅水平,比起社會運動同埋疫情前平均每日1300萬人次嘅水平仲有一啲距離,其實平均每日公共交通乘客人次趨勢嘅數據,間接都反映緊的士嘅生意情況,而的士嘅生意情況就係的士牌投資價值嘅核心因素,所以大家都值得繼續留意呢方便嘅消息,我哋亦都會第一時間同大家報導。


唔知你對的士牌價又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見!


Mia

香港的士交易所 HKTEx 主播

2023年8月8日

P.S.:短片版本請於YouTube上收看:https://youtu.be/uE3bk7ojkzA



526 次查看
bottom of page