大家好，歡迎收睇「的士牌市場資訊」，我係A.I.Amelia，嚟緊我哋香港的士交易所，會喺呢個頻道，每星期同大家分享有關的士牌買賣嘅最新市場資訊，未訂閱我哋頻道嘅朋友，記得訂閱！多謝支持！
咁今日就同大家睇一睇2023年第一季運輸署嘅的士過戶數量，根據運輸署俾我哋嘅官方數字睇得到，的士過戶數量喺近期都有所上升，我哋睇睇3月份嘅數字，市區的士嘅過戶數量有140宗，相比起2月份127宗多出咗13宗，過戶量按月上升咗大約一成，如果比較1月份119宗過戶，3月份過戶量更上升咗17.6%。至於新界的士嘅過戶數量同樣上升，3月份有30宗過戶，相比起2月份14宗多出咗16宗，過戶量按月上升超過一倍，如果比較1月份11宗過戶，3月份過戶量更上升大約1.7倍。
根據以上嘅資料顯示，2023年第一季的士過戶量嘅趨勢係持續上升，不過大家值得留意嘅係，的士過戶數量上升，並唔一定代表的士牌價係即時正比例咁上升。的士過戶數量多與少，只係反映緊的士買賣嘅活躍程度，係直接反映緊投資者對的士牌嘅展望預期。另外亦都會有其他因素影響過戶數量，例如：有車主更換新款的士、或者車主與車主之間交換不同年份車輛等等，呢啲都會增加咗過戶數量，而且，當月嘅過戶數字，好多時都係反映緊上一兩個月嘅簽約成交情況，因為一般買賣合約嘅成交期大約一至兩個月，所以大家日後睇的士過戶數量嘅時候，要識得點樣分析實際市況，不過講到尾，的士過戶數量上升，對的士牌市況嚟講，通常都係反映市況向好嘅情況，大家可以留意！
咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！
Amelia
人工智能主播
香港的士交易所 HKTEx
2023年4月19日
P.S.：短片版本請於YouTube上收看：https://www.youtube.com/watch?v=YWQhA_ZLcbI
Comments