• 852郵報 - 銀水

搭的士就一定貴?


好多時一講起的士,大家都會諗起車費好貴,其實只要識得搭,的士好可能會平過其他交通工具!

呢個星期,就有個客坐的士,由銅鑼灣去到中環三號碼頭,傾開原來坐船入愉景灣,都要40至50蚊一程,一日交通費隨時過百。佢仲話,如果人多寧願搭的士,一程過入愉景灣,好過喺碼頭等餐懵,車費又差唔多。

其實咁樣都啱㗎!因為的士短加長減,如果多人一齊搭長少少嘅路程,除返開反而仲抵過搭其他車。幾個月之前,我都車過幾個大陸客,由尖沙咀百樂酒店去海港城,佢哋諗住去到再轉巴士過深圳灣。我就同佢哋講,其實我都可以車佢哋去深圳灣,不如直接過到去仲好啦。佢哋幾個人連埋行李,都只係270蚊左右,如果跟返佢哋本身個路線,我估一定唔止呢個價錢,就算貴都可能只係差少少啫。

又試過一次,有幾個客啱啱由機場坐機鐵出嚟,去到九龍站上咗我車,話想去九龍灣,其實如果佢喺機場直接搭的士過九龍灣,都只係200幾蚊,唔係差好多。

我咁講又唔係為咗鼓勵大家搭多啲的士嘅,之不過有時人多搭的士抵好多,就算貴少少,慳返唔少時間都好。搭車搭得精明啲,大家都開心嘛!

274 次瀏覽