top of page

最新市場動態

的士新聞資訊【林世雄：一定要打擊白牌車】2024年1月20日

香港的士交易所 HKTEx
2024年1月20日

大家好，歡迎收睇「的士新聞資訊」，我係Olivia，啱啱過去咗嘅除夕夜，市面上有大批嘅訪港內地旅客喺觀賞完跨年煙花之後，因為交通同通關配套問題而未能即晚返回內地，有消息指懷疑係因為有大量嘅白牌車喺皇崗口岸過關阻塞咗交通，導致跨境巴士未能夠及時來回。


運輸及物流局局長林世雄喺一個電視節目中表示，就規管網約白牌車嘅問題，政府會小心處理，並且會喺今年內就呢方面嘅法例作出研究，得出方案之後會同的士業界及市民討論。


林世雄又指出，元旦凌晨雖然有超過一千架私家車過關，但情況未至於唔尋常，但佢認為，一定要打擊白牌車，正如新聞報道所講，即使係一啲涉嫌係跨境嘅白牌車亦都會檢控，佢指出，現時喺皇崗口岸一般24小時通關，其實都會有幾百架車，而當日超過一千架車，當然係比局方預計嘅多，但以兩地現時往返交通咁頻密嘅情況下，呢個數字比估計多亦都可以理解。


林世雄喺另一個電視節目中提到，立法會早前通過咗的士司機違例記分制同提升的士服務質素嘅修訂條例草案，佢相信今年稍後將會有的士車隊成立，佢話參考咗新加坡嘅經驗，當地嘅車隊管理模式唔錯，相信如果香港日後成立咗的士車隊之後，將會有助帶動的士嘅新文化，提升的士嘅服務質素，改善的士生意，令的士司機可以力爭上游。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2024年1月20日


P.S.：短片版本請於YouTube上收看：https://youtu.be/QhwT0357nIg


#白牌車 #打擊白牌車 #林世雄 #運輸及物流局局長 #皇崗口岸 #跨境白牌車 #通關 #過關 #規管網約白牌車 #的士司機違例記分制 #的士車隊 #的士服務質素 #車隊管理模式 #的士司機 #HKTEx #的士 #HKTExApp #一站式的士買賣租賃平台 #港聞 #新聞 #女主播

 
 

的士新聞資訊【八達通開放的士支付網絡】2024年1月11日

香港的士交易所 HKTEx
2024年1月11日

大家好，歡迎收睇「的士新聞資訊」，我係Mia，八達通早前宣布，由1月25號起，將會開放八達通的士支付網絡俾銀聯、AlipayHK同內地支付寶等等嘅二維碼支付平台加入，的士司機用商用版八達通App收款嗰陣時，喺App内輸入車費金額，八達通流動收款機就會顯示二維碼，乘客就可以選擇拍八達通或者掃二維碼付款。


其實商用版八達通喺2018年就已經推出，現時大約有兩萬位的士司機可以透過商用版八達通App收款，再加上同幾個Call的士App合作，八達通喺的士業界嘅滲透率已經達到六成。 


八達通市務總監李玉兒表示，隨住上年開始全面通關，吸引到唔少遊客再次訪港，其中內地旅客佔咗八成，而內地旅客搭的士習慣用電子支付，令的士業界提供電子支付嘅需求上升，所以八達通決定開放網絡俾其他二維碼支付平台，等旅客同本地市民乘搭的士嗰陣時有更多嘅支付選擇，期望喺的士業界嘅使用率可以達到100%。


乘客喺乘撘的士之後，可以用實體八達通卡或者手機八達通拍收費系統，聽到「嘟」一聲即成功收費，如果喺用銀聯、AlipayHK或者內地支付寶就只需開啟應用程式，掃描收費系統上嘅二維碼，聽到「嘟」一聲即成功收費，八達通產品部總監葉勁生形容，對的士司機嚟講，呢個係一個「無感」嘅體驗，因為新增咗其他支付平台之後，司機同以前一樣聽到 「嘟」一聲即代表成功收費。


八達通表示會繼續免的士司機手續費到2025年年底，被問及如果到時收手續費，使用率會唔會下降，李玉兒就表示，到時會再就需求檢視免手續費，但過往嘅使用率同應用金額高，相信八達通喺的士業界嘅認受性都高，相信如果幫到的士行業應付到市場需求，佢哋會樂於繼續去用呢個服務，李玉兒又指出，的士市場最大嘅競爭對手係現金，所以希望聯同其他支付平台去打破現金市場，對其他支付平台嘅加入持開放以及歡迎嘅態度。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。

Mia

香港的士交易所 HKTEx 主播

2024年1月11日

P.S.：短片版本請於YouTube上收看：https://youtu.be/ZIQhLZF7_3k


 
 

的士新聞資訊【的士申加價恐難照單審批】2024年1月9日

香港的士交易所 HKTEx
2024年1月9日

大家好，歡迎收睇「的士新聞資訊」，我係Olivia，的士業界上年就申請加價幅度達成咗共識，建議紅的落旗加HK$5，即係起錶價HK$32，綠的就加HK$4.5，即係起錶價HK$28，另外每次跳錶費用都相應調整，而家等運輸署完成評估報告，之後就會交上行政會議審批，不過有行會成員認為，建議加價嘅幅度比較大，加價亦都唔能夠充分解決到問題，更加有可能弄巧反拙。


的士業服務質素一直都被受關注，立法會上個月通過法例去改善的士服務質素，推出咗車隊制度，呢個車隊制需要等政府今年初釐定具體合約，之後再邀請業界人士投標，另外，政府又引入司機違例記分制度，而記分制就會喺刊憲後9個月後生效，而家未開始實行改善服務政策就先申請加價，擔心會引起部分乘客嘅不滿。


的士加價申請需要經過行政長官連同行政會議審批，對上一次批准加價係喺2022年5月，同年嘅7月生效，的士劃一加價HK$3，市區的士HK$27起錶，不過業界頻頻反映香港的士收費太低，又面對非法白牌車嘅挑戰，的士司機難以維生，的士車行車主協會永遠會長吳坤成認為，的士起錶價喺過去十年只係加咗HK$5，完全追唔到通脹，保險費、零件維修費支出又不斷上升，的士業界難以營運，佢又指出，現時嘅的士車費基數比較低，部分乘客會覺得今次建議嘅加幅好大，但佢認為呢個加幅只係為咗「追落後」，加價嘅建議喺業界早就有共識。


不過行會成員就有唔同嘅考慮，行會召集人葉劉淑儀認為，的士加價申請素來都係「開天殺價」，行會好少會依足要求批核，佢又指出，當行會收到申請之後，會審視各方嘅理據，例如運輸署嘅數據等等，佢又提醒的士業界，的士近年生意已經差，以而家嘅經濟狀況，如果加價嘅幅度太進取，會進一步影響市民乘搭的士嘅意欲。


另一位行會成員陳健波就指出，唔方便透露行會嘅具體考慮，但係從佢所屬嘅保險業界角度分析，的士業經常出意外，風險管理工作同整體嘅駕駛水平有明顯嘅改善空間，根據保監局嘅數字，的士全保嘅平均保費，已經由2021年嘅HK$35,000，大幅上升兩成至2023年頭9個月嘅HK$44,000。


另外，佢又認為的士另一個最大嘅問題係冇年輕人願意入行，寧願揸非法白牌車都唔揸的士，佢相信的士加價係唔會解決到呢個問題，因為年輕人除咗考慮金錢因素之外，仲會考慮埋工作時間夠唔夠靈活，同埋開工嘅車輛殘唔殘舊等等，佢批評的士業界管理上明顯跟唔上現代社會同科技發展嘅步伐，再加上服務態度等等嘅固有問題，令情況更加嚴重，認為唔應該只係着眼於加價加幾多，而係點樣確保服務態度會變好。


另外，亦有其他行會成員私下指出，雖然話的士加價係唔涉及公帑，但係行會嘅職責之一係兼顧公眾利益同觀感，冇可能批准一個「令人譁然嘅數字」，事實上行會嘅角色都比較被動，只能夠按運輸署提供嘅數字同理據，去決定係唔係批核加價嘅建議，但相信政府都會明白行會嘅立場，提供合理嘅選項。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2024年1月9日

P.S.：短片版本請於YouTube上收看：https://youtu.be/2gzV5r1WeL0


 
 
32333536
bottom of page