top of page

的士新聞資訊【的士牌價跌穿400萬 業界指出下跌原因】2023年7月30日


大家好,我係Mia,今日同大家睇睇一單星島日報講及有關的士嘅新聞報道。


星島日報報道指出,喺疫情期間的士牌價低迷,更加節節下跌,直至今年初香港通關之後,有網上資料顯示,的士牌價有上升嘅趨勢,去到2月中,市區的士牌價更去到高位大約469萬,但之後就連續幾個月下跌,跌至今個月7月份,牌價更跌穿400萬。


另外,星島日報發現,有停車場出現大量嘅的士停泊喺度,冇行駛營業,有幾位的士業界人士接受星島日報訪問嗰陣時指出,而家的士司機人手短缺,司機年紀老化嚴重,缺乏新人入行,的士保險費用又不斷飆升,再加上利息不斷增加,影響咗買賣的士牌照嘅意欲等等,都係令的士牌價下跌嘅原因,業界人士就促請政府盡快修例打擊「白牌車」,提高的士嘅收費,降低考牌嘅難度,以及輸入外勞等等。


至於的士牌價方面,市區的士牌價一般較高,星島日報引用根據我哋香港的士交易所網頁嘅資料,6月底市區的士牌價為412萬,相比起2月中下跌咗57萬,下跌超過一成,而前日7月28號嘅最新牌價為388萬,同2月中相比跌幅大約17.3%,而新界的士牌價就由388萬跌至317萬,下跌咗18.3%。


香港的士小巴商總會理事長周國強表示,的士保險費用飆升,由以前每年3萬幾元,增加至每年5萬幾元,雖然的士業界申請咗加價,但係至少都要用9個月至1年嘅時間先能夠實施,周國強又指,的士司機年紀老化問題嚴重,司機考牌難度大,收入比起小巴司機更低,以及Uber影響咗的士生意,政府對的士嘅要求又越嚟越高,例如可能會實行的士司機記分制,司機續牌體檢年齡由70歲降至65歲等等,都會導致的士司機人手不足,再加上而家利息增加,增加咗購買的士牌嘅阻力,牌價因此而下跌。


至於關於有停車場出現大量的士停泊嘅情況,周國強指出,的士司機人手短缺,所以有好多空置嘅的士無辦法營業,要求政府重視相關嘅情況,盡快修例打擊「白牌車」,提高的士收費,周國強認為,而家香港的士嘅收費屬於較低嘅水平,市區的士嘅起步費為27元,如果係5位乘客,平均每人就只需要大約5元,甚至係低過小巴同巴士嘅價錢,但係政府對的士司機要求都幾多,導致司機壓力大,周國強表示,好多想入行嘅司機都係大約40至50歲左右,考取的士司機牌比較困難,認為相關嘅考牌制度已經過時,同時,的士司機嘅社會保障同收入都唔足夠,佢形容好似「將呢個行業逼到去死角,越嚟越難搞」。


的士車行車主協會永遠會長吳坤成表示,的士牌價有升有跌好正常,就好似樓價都有升有跌一樣,所以唔擔心短期嘅波動,因為而家係加息周期,的士按揭供款增加,影響咗購買的士牌嘅意欲,相信等到利息穩定之後,的士牌價會逐漸回升。至於有大量的士空置嘅問題,吳坤成表示,司機年紀老化問題嚴重,的士保險費用高企,司機難以負擔,影響新人入行,再加上香港 ,好多人外出旅行,亦都有好多司機轉行,例如加入咗旅遊行業等等,導致本港嘅的士司機人手短缺,佢認為,如果的士車租下降,的士司機考牌難度降低,以及減少的士保險費用等等,相信有助吸引新人入行。


佢又指出,政府建議引入的士車隊制度,相信有助提升業界競爭力,增加的士喺機場、關口等地嘅生意,由於疫情持續嘅時間好長,香港復常仍需要一段時間,有信心的士業未來會越嚟越好。


香港的士商會主席黃保強都表示,的士牌價下跌同缺乏司機有關,行業年紀老化問題嚴重,收入少,條例多,而家無新人入行,的士牌多人賣出,但少人買入。佢亦表示,好多的士空置情況亦都係因為唔夠司機,而旅遊巴士、小巴同貨車司機嘅收入都高過的士司機,認為政府應該提高的士司機嘅收入,改善營運環境,開放更多區域俾的士司機上落客,亦都可考慮輸入外勞,緩解的士司機緊缺嘅問題。


以上就係今次星島日報講述有關的士嘅新聞,唔知大家又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見!


Mia

香港的士交易所 HKTEx 主播

2023年7月30日

P.S.:短片版本請於YouTube上收看:https://youtu.be/a3i8vWTNyiQ



2,532 次查看

Commentaires


bottom of page