的士牌市場資訊【牌價年內高位大跌超過2成】2023年12月1日

大家好，歡迎收睇每星期嘅「的士牌市場資訊」，我係Mia，就算有經濟學者預期美國12月份再加息嘅機會唔大，但係香港銀行體系總結餘已經由2021年高位4000幾億港元，持續急挫跌至大約450億港元，呢個數字為2008年「全球金融海嘯」以嚟嘅最低水平，反映資金不斷流走嘅情況，而同一時間受到臨近年尾準備年結同埋季節性嘅因素影響，近期本港嘅港元拆息都不斷上升，背後都反映緊銀行資金狀況非常緊絀，相信港元拆息短時間都會繼續高企，所以預期香港銀行仍然有機會上調最優惠利率(P)。

由於購買的士牌嘅買家仍然有唔少係要向銀行申請的士按揭貸款，所以本港銀行嘅息口走勢絕對係會影響佢嘅投資回報價值，對有按揭貸款嘅持有者造成壓力，亦都會對想入市嘅買家造成阻力，我哋睇返的士牌價喺過往12個月嘅情況，年頭嘅時間由於憧憬全面通關嘅情況，的士牌價有明顯嘅上升，但由於復常市況不似預期，再加上今年內本港銀行分別喺5月份同7月份兩度加息上調最優惠利率(P)，市區的士參考牌價就由今年2月高位462萬，大跌至最近12月嘅低位349萬，大跌超過兩成，當然牌價下跌相信都仲受到其他因素影響，大家都可以重溫一吓我哋頻道嘅其他評論，不過值得留意嘅係，由於的士牌價嘅銀碼細咗，近年都多咗買家以Fullpay嘅方式購買，自然將銀行加息嘅壓力減到最低，再加上的士牌嘅收租年回報仍然超過5厘，大家都可以參考呢方面嘅數字嚟做投資計算。

唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。

Mia

香港的士交易所 HKTEx 主播

2023年12月1日

P.S.：短片版本請於YouTube上收看：https://youtu.be/EbQVePb9QuE

#的士牌價 #銀行加息 #的士牌價下跌 #HKTExApp #的士牌買賣 #投資的士牌 #的士牌回報 #的士牌買賣流程 #十年低位 #白牌車 #的士保險 #加息 #疫情 #的士生意 #女主播 #的士 #市區的士牌價 #新界的士牌價 #香港的士交易所 #HKTEx #一站式的士買賣租賃平台

的士牌市場資訊【過戶量按月回落8.6%】2023年11月24日

大家好，歡迎收睇每星期嘅「的士牌市場資訊」，我係Olivia，最近的士業界團體為咗打擊白牌車而發起罷駛行動，事件成為坊間傳媒嘅熱話，而同一時間，的士牌價亦都有再次下跌嘅跡象，有業界人士表示，最近牌價下跌嘅原因有可能係受到有部份的士落唔到保單嘅問題所影響，而問題亦都得到解決，當然大家都知道，的士牌價下跌嘅原因有好多，白牌車嘅問題毫無疑問係會直接影響的士牌嘅投資價值，至於環球經濟放緩亦都影響投資者入市投資嘅氣氛。

如果有留意開我哋頻道嘅朋友都知道，的士牌喺今年頭三季都出現咗「量升價跌」嘅現象，咁到底第四季一開頭10月份嘅表現又係點呢？我哋可以先睇一睇10月份嘅的士牌價走勢圖表，以市區的士牌參考牌價為例，由10月頭388萬跌至10月尾369萬，跌咗19萬，跌幅大約4.9%，另外我哋再睇一睇今年1月份至10月份運輸署嘅的士過戶數量，根據運輸署俾我哋嘅官方數字睇得到，今年頭9個月，市區的士嘅過戶數量差唔多每個月都有所上升，1月份嘅過戶數量有119宗，而9月份嘅過戶數量就有198宗，升幅超過6成，但值得留意嘅係，10月份嘅過戶量係有明顯嘅回落，按月回落咗8.6%，反映緊的士買賣嘅活躍程度係下降緊，近期市場上嘅的士車主喺我哋HKTEx App上放盤，普遍叫價都有所調整，議價嘅空間亦都增加咗，10月份呢段時間無論牌價同過戶量都有所下跌，係今年內按月首次出現「量跌價跌」嘅情況，大家值得留意。

唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。

Olivia

香港的士交易所 HKTEx 主播

2023年11月24日

P.S.：短片版本請於YouTube上收看：https://youtu.be/kzVJPHa10h8

#的士牌價 #投資價值 #的士過戶量 #投資的士牌 #投資回報 #白牌車 #Uber #的士牌價走勢 #量升價跌 #投資回報率 #量跌價跌 #的士車主 #放售的士 #環球經濟放緩 #HKTEx #HKTExApp #一站式的士買賣租賃平台 #的士 #的士牌價下跌 #的士保險 #的士司機 #的士生意

專題探討【秘密大公開！的士牌係唔係好難放售？】

大家好，我係Mia，唔經唔覺我哋香港的士交易所同大家講解有關的士牌嘅資訊都已經7至8年，呢段時間牌價有升有跌，當中仲經歷咗新冠疫情呢個對的士生意嚟講最艱難嘅時期，咁多年嚟，我哋接觸咗過萬位客戶嘅查詢，有的士司機想買架的士自己揸，有投資者想買的士牌收取租金回報，亦都有的士車主想放售的士套現，我哋發現我哋經過咁多年嘅努力，查詢嘅客戶都開始對買入的士牌嘅程序有啲認識，但係就對放售的士有啲疑惑，成日都會問「的士牌係唔係好難放售？」，等我喺今集同大家講解吓呢個問題。

要解答呢個問題，首先我哋要先了解一吓傳統歷史以嚟的士牌係點樣賣出買入先，喺我哋香港的士交易所未出現之前，如果你想買入一個的士牌做投資嘅時候，你就要直接親身落去其中一間的士車行問價錢，俾訂金支票，簽合約，咁我哋先了解一吓一般的士車行嘅角色，的士車行就係一個車行老闆開咗一間公司，主要做管理的士嘅生意，出租的士俾司機，賺取收租嘅回報，管理自己的士嘅同時，亦都會管理埋其他車主嘅的士，當然，有啲車行老闆另外都會買賣的士，收購人哋嘅的士，再賣出自己擁有嘅的士，所以如果你作為一個獨立嘅投資者向一般嘅的士車行買入的士牌，就等於直接同嗰間車行嘅老闆做買賣對手，傾啱價錢就可以即刻交易，但問題就嚟喇，由於只係同一個買賣對手交易，當投資者想賣出的士牌嘅時候，好多時只係識得同返同一間車行傾價錢，就算你想問多幾間車行價錢，傳統嘅做法係一定要你揸埋架的士落去車行先肯同你傾，增加咗賣車嘅難度，試問咁嘅情況啲的士車行老闆又點會唔撳價錢呢，所以就形成咗啲投資者對的士牌嘅睇法，「的士牌係好難放售」，甚至覺得的士牌價好唔公開透明。

呢個亦都係我哋香港的士交易所成立嘅原因，希望建立一個公開透明嘅平台，俾買賣雙方可以好輕鬆咁搵盤放盤，免除咗周圍去格價嘅煩惱嘅同時，又可以設定自己嘅心水價錢放售的士，唔使再驚俾人撳價，今年我哋更推出咗自家App「HKTEx 一站式的士買賣租賃平台」，俾買賣雙方可以免費自助搵盤放盤，24小時運作，再冇時間地域限制，咁放售的士牌，從此就會變得輕鬆簡單！

咁今集就同大家講到呢一度，如果想了解更多最新嘅的士牌資訊，記得繼續密切留意我哋香港的士交易所，我哋下集見。

Mia

香港的士交易所 HKTEx 主播

2023年11月23日

P.S.：短片版本請於YouTube上收看：https://youtu.be/QxfXyUboctk

#的士牌價 #放售的士 #HKTExApp #智能提示助理 #的士牌買賣 #投資的士牌 #的士牌回報 #的士牌買賣流程 #的士車行 #的士車主 #賣的士 #出售的士 #買的士 #的士車主 #女主播 #的士 #市區的士牌價 #新界的士牌價 #香港的士交易所 #HKTEx #一站式的士買賣租賃平台 #AI