top of page

最新市場動態

的士新聞資訊【新法例限制的士流動裝置數量 首日票控兩違例的士司機 】2026年1月29日

大家好，歡迎收睇「的士新聞資訊」，我係Hayley，新界北總區交通部執行及管制組特遣隊，起1月25日下午在深圳灣香港口岸打擊的士違例，派員喬裝乘客，發現兩名的士司機涉嫌「招攬乘客」、「駕駛時放置多於兩部流動電訊裝置」、「沒有展示的士司機證」及「未經授權使用車隊的士停車處」。警方將會發出傳票，票控有關的士司機。警方重申，行動仍在進行中，會繼續採取執法行動，打擊相關的士違例事項，以保障市民及遊客的權益。


為打擊的士司機「電話陣」，政府早前修例限制司機在座位前擺放流動電訊裝置數量。根據最新規例，任何司機駕駛時不可在前方放置多於兩部流動電訊裝置，即是流動電話、平板和手提電腦，而每部裝置的屏幕對角不可超過19厘米長。裝置不能阻礙司機目視道路及交通情況，以及對觀察路況用的倒後鏡、裝置或攝像顯示器的視線。違例者最高可處罰款2,000元。


近日有網民分享指，將手機打橫，利用分割功能，同時使用兩個接單程式。討論群組內更有人分享指，可利用某韓國品牌平板電腦及手機獨有功能，在合乎大小規格的平板電腦內「一開四」，一次過使用四個應用程式。換言之，若司機「物盡其用」，放兩部平板電腦在車頭，可以同時看到八個不同應用程式的畫面。運輸署回覆傳媒查詢表示，新法例沒有規管裝置上可使用的功能，惟強調司機應時刻專注駕駛，若因操控流動通訊裝置而影響駕駛，不論有否釀成交通意外，該司機可能已觸犯「危險駕駛」或「不小心駕駛」的罪行。


汽車交通運輸業總工會的士司機分會主任杜燊棠表示，類似功能早年已出現，稱有同業為了多開不同的接單程式而使用，又預計會有本身用「電話陣」的司機，轉用平板電腦的分割畫面功能。 但杜燊棠指，使用分割畫面後，每個畫面都會變得細小，反而更不清晰，令司機更分神，增加交通意外風險。他又認為，19厘米的限制屬寛鬆，「我都唔明運輸署竟然俾佢哋可以擺咁大部嘅（流動裝置）喺度。」 他又認為，兩部正常大小手機已足夠的士司機使用，建議業界自律，「成日撞車嗰時，見我哋自己行家呢，第一時間將佢所有啲電話收翻晒佢先。咁你何必呢？」。


的士司機劉先生說，平日較常接街客，使用兩部電話開工已足夠，一部用於接單、一部用於導航。另一司機陳先生同樣接街客多，認為新措施合理，且毋須再收緊，「一部自己用、一部揸車」。他憶述見過不少司機擺電話陣，「3至4部係基本」，佢認為會令司機分心。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App 「HKTEx一站式的士買賣租賃平台」，密切留意我哋香港的士交易所，我哋下集見。


Hayley

香港的士交易所 HKTEx 主播

2025年1月29日




 
 

【2025年的士過戶數量統計與分析】


大家好，我係Eva，喺上一集，我哋就同大家回顧咗2025年的士牌價嘅走勢，同埋展望一吓嚟緊2026年的士牌價嘅情況，如果未睇上一集嘅朋友可以去我哋嘅頻道重溫返先，至於今集就主要同大家睇一睇上年2025年的士過戶數量嘅統計數字，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。


我哋可以先睇一睇上年2025年嘅的士牌價走勢圖表，基本上如果有留意開我哋頻道嘅朋友都知道，的士牌價喺2025年嘅表現確實唔係咁理想，我哋就以市區的士牌價為例，由年頭285萬下跌至年尾216萬，全年下跌咗96萬，跌幅大約24.2%。至於新界的士牌價，由年頭205萬下跌至年尾140萬， 全年下跌咗65萬，跌幅大約31.7%。


咁到底2025年的士嘅過戶數量又係唔係跟住牌價咁不斷萎縮呢？我哋再睇一睇2025年運輸署嘅的士過戶數量，根據運輸署俾我哋嘅官方數字睇得到，整個年度都係升升跌跌，起上年頭兩季季度，市區的士嘅過戶數量差唔多每個月都是起伏不停，1月份嘅過戶數量有189宗，而6月份嘅過戶數量就有244宗，成為全年高位，升幅超過3成，其實頭兩季都有出現咗過住幾年經常發生的「量升價跌」現象。但到咗9月份開始，過戶量就有明顯嘅回落，就以市區的士為例，12月份嘅過戶數量就只有140宗，比起8月份嘅220宗，跌幅超過36.4%，反映第四季嘅的士買賣活躍程度正喺度下降緊，出現咗「量跌價跌」嘅情況。


咁如果我哋嘗試睇返過往十一年嘅的士牌價走勢同過往十年嘅的士過戶數量嘅比較，又會係有啲咩現象？我哋先睇一睇過往十一年的士牌價走勢圖，喺呢個圖表我哋可以睇得到，現時嘅的士牌價正正處於十一年嘅低位，的士牌價由2015年年中開始就不斷下跌，的士牌價受到多方面嘅影響，例如白牌車嘅競爭，2020年至2023年疫情嘅影響，銀行加息嘅情況，高昂保費嘅壓力等等，所以牌價下行壓力至今都仍然存在，我哋就以市區的士為例，由2015年年中最高峰723萬，下跌至2025年年中199萬，下跌咗524萬，下跌超過72.5%。咁到底的士過戶數量喺呢十年期間又出現咗咩情況？根據運輸署俾我哋嘅官方數字睇得到，近十年的士過戶數量最高峰時期喺2017年嘅時候，以市區的士為例，當年全年錄得2365宗過戶，但近年嘅的士過戶數量趨勢都有所回落，喺啱啱過去咗嘅2025年，市區的士全年嘅過戶數量就只有2115宗，比起2017年高峰時期下跌超過1成，喺近呢八年間，無論的士牌價同過戶數量都有所下跌，從趨勢上嚟睇，的士買賣市場嘅活躍程度確實有所萎縮。


咁到底的士牌嘅價值會唔會有逆轉嘅可能？定係會繼續萎縮？其實關鍵好睇市場上的士生意嘅營運情況會唔會得以改善，例如網約車平台對的士業的競爭環境、的士服務質素同開支成本等等。咁當然都好睇香港嘅整體經濟環境會唔會有所好轉，呢個就要睇中央政府的未來經濟政策，點樣幫到香港同大灣區融合期間取得平衡，我哋不妨繼續密切留意市場發展。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Eva

香港的士交易所 HKTEx 主播

2024年1月23日




 
 

【的士牌價走勢回顧2025及2026展望】


大家好，我係Eva，啱啱踏入咗2026年，我哋香港的士交易所就襯呢個機會，同大家回顧一吓2025年的士牌價嘅走勢，再同大家展望一吓嚟緊2026年的士牌價嘅情況，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。


2025年的士牌價嘅表現確實可以用五個字嚟形容，「低處未算低」，我哋就以本年度的士牌價嘅走勢圖嚟睇，牌價走勢嘅表現好唔理想，第二季尾段更加出現咗急跌嘅情況，我哋就睇返2025年的士牌價嘅走勢圖，市區的士牌價，由年頭285萬下跌至年尾216萬，全年下跌咗69萬，下跌咗24%，至於新界的士牌價，就由年頭205萬下跌至年尾140萬，全年下跌咗88萬，就大約下跌咗31.7%。如果以全年高低位波幅嚟睇，以市區的士為例，最高位係2月中287萬，最低位係6月中198萬，波幅大約31%。


其實的士牌價喺2025年繼續下跌，係受到多方面嘅因素影響，我哋先講一講的士生意嘅情況，根據運輸署嘅數據，按月劃分計算的平均每日公共交通乘客人次趨勢，2025年已經開始走出過去的低谷，有所回升。呢個可能同疫後新香江有關，香港政府積極推動「盛事經濟」吸引內地自由行來港消費。不過中國內地經濟在疫情後確實未有大幅復甦，即使來港消費的遊客，估計大多都不是高消費人士。加上香港人喺疫情後改變咗生活習慣，包括港人熱衷北上消費，同埋港人減少咗夜市活動。我哋從政府統計處的數據中看到，過去五年零售業總銷貨額，雖然本年多個月份都有盛事帶動人流，但消費力仍然疲弱，令到本港食肆同零售行業步入寒冬，結業潮持續，情況令人擔憂，長遠都會影響市民對本地消費嘅意欲，直接影響的士生意，試問咁嘅情況的士牌價又點會唔受影響呢？


第二個因素令今年的士牌價下跌嘅原因，就係香港的士業界長年抗拒改革。的士車隊起2025年7月投入服務，最初合共只提供約900架車，未符合可服務嘅車輛數目須達到申請規模的6成才可以獲得發牌的要求，但運輸署仍然批准發牌，當時解釋是為讓市民及早享用服務。然而直至11月底，5支車隊均未達標，整體規模更只有目標數目的37%，有部份車隊經營者指出，他們經營困難，主因是請不到足夠司機，即使出較高人工都吸引不到新血入行，擔心網約車規範化後，只會「塘水滾塘魚」，吸引更多的士司機轉投網約車市場，絕對達成不到政府原本所強調以的士服務為主，網約車為輔助，通過引入競爭，以提升香港的點對點個人化交通服務的政策目標。雖然的士車隊公司已經努力改革的士形象，包括升級的士硬件，各個車隊嘅的士都設置了全球定位系統、行車紀錄及司機監察系統。另外亦會配備多種的電子支付系統，方便乘客以電子方式支付車資。可惜在香港經濟蕭條下，的士車隊公司並沒有一個有效的市場定位和規劃，導致「雷聲大雨點小」，加上香港的士服務質素多年來，廣為乘客詬病，造成形象已經千瘡百孔。並非一時三刻就能改變傳統業界形象，網上一片揶揄之聲，充分顯示出的士服務泥沙俱下，完全不得民心。正因為的士車隊計劃成效不彰，政府就有籍口急速轉軚立法規管網約車。


另一個唔可以唔提嘅因素就係的士保險費高昂嘅問題，其實的士保費高企已經唔係呢一年嘅問題，今年亦都唔例外，令車主營運的士嘅成本增加咗好多，導致部分車主決定退市離場，增加咗的士牌價嘅下行壓力，以上幾點都係今年的士牌價下跌嘅因素。


不過講到今年的士牌價下跌嘅最主要因素，亦都係直接令到牌價今年急跌嘅原因，就係「網約車合法化」，立法會起2025年10月15日三讀通過《2025年道路交通(修訂)(網約車服務)條例草案》。條例草案的目的是引入網約車服務的規管框架，規定提供網約車服務的平台、車輛及司機均須領取牌照或許可證。條例草案通過後，首批持牌平台預計將於2026年第四季開始營運。呢個消息令部份的士車主擔心，的士牌會失去佢嘅獨特價值，決定提早沽售的士牌離場，令的士牌價出現咗下跌嘅情況。


我哋再回顧返2025年，其實當中都有關於的士嘅新政策，有運輸署在11月起實施的士筆試大改造，今次的士筆試會大幅減少和簡化與路線識別和著名地方的試題，又會減少試題數目。政府優化入場門檻，目的係為咗提高更多新人入行意欲，增加的士司機供應。 運輸署對上一次改動的士筆試是在2020年2月。署方說應考的人數在過去數年大幅增加4成，由2019年的不足1萬人，增加至2024年接近1.4萬人；及格率亦由2019年的37%，提升至2024年的 60%。如果大家想知道更多關於的士筆試內容，可以收看香港的士交易所YouTube頻道中的專題報導，可以得到相關的資訊。


雖然2025年下半年美國減息周期再次開始，但係點解的士牌價喺下半年都係冇咩上升？相信最主要嘅原因在於香港經歷幾年疫情重創，經濟陷入長期蕭條，加上租金長期高企，中小企難以為繼，大多都已「及早離場」。即使疫後曾出現過一段「小陽春」，不過都對香港整體經濟無乜顯著幫助。仲有困擾咗的士行業接近十年嘅網約白牌車問題遲遲都未解決，而政府亦都需要等到今年2026年先會定出網約車發牌數量，屆時才得知對的士業有幾大影響，所以呢方面就令到的士牌嘅價值仍然存在不確定性，導致牌價未有回升嘅主要原因，所以呢個亦都係2026年大家一定要關注嘅重要消息，絕對係的士牌價嘅關鍵轉捩點，我哋一定會第一時間同大家報導最新情況。


咁嚟緊2026年仲有啲咩消息係大家值得關注？首先，從國際形勢去看，大家除咗可以繼續留意美國息口嘅走勢變化之外，值得密切注視美國總統Donald Trump未來一年的對華政策走向，學者普遍認為，Donald Trump嘅政策可能會為中國經濟帶來衝擊，好似近期美國對委內瑞拉的突襲，就顛覆了中國數十年來在「美國後花園」的南美洲地區精心培養的戰略部署。美國透過截斷來自委內瑞拉、伊朗、俄羅斯的廉價能源令中國企業的生產成本增加，廉價能源一中斷，中國問題將會同時浮現，包括經濟增長下滑、能源變貴、地方債務、內房危機等問題。呢啲都會帶嚟風險、不確定性和挫折，相信對中國經濟有深遠影響。智庫「德國馬歇爾基金會」（The German Marshall Fund of the United States）發表最新報告，發表以「如果中國攻台」（If China Attacks Taiwan）為題的報告，直指中國對台動武，無論規模大小，一旦失敗都必須付出沉重代價，包括香港的國際金融中心地位或會告終。當然報告內容中關於中國的形勢判斷是不夠全面客觀，不過香港作為中國長時間的「中介人」樞紐，如果台海一旦發生任何事故，確實對香港整體經濟都有直接影響。至於本地形勢，大家可以留意吓2026年的士服務嘅改善情況，的士車隊將會喺2026年繼續改革服務，希望能夠擺脫既有的形象，提升的士嘅生意。同埋香港同大灣區融合後，內地網約車平台在港營運，實質對香港經濟發展係有幾多正面影響？還是負面影響多？大家都值得關注。


還有一個消息唔可以唔提，就係2025年內地無人駕駛技術紛紛湧現，各個品牌都起世界各地積極部署無人駕駛的士（Robotaxi），本港亦成為主要目的地之一。有內地智能駕駛公司表示，香港已具備Robotaxi營運的基礎條件，正與監管部門溝通，證明技術安全，爭取循序漸進式的營運方向。本港無人駕駛測試總里程至今已超過10萬公里。目前本港無人駕駛措施源於2017年公布的《香港智慧城市藍圖》，運輸署向3家企業共6大項目發放「自動車先導牌照」，主要進行路面測試，獲發牌機構包括蘿蔔快跑、冠忠巴士（306）及機管局，涵蓋共62架無人駕駛的車輛。運輸署指出，有關測試正在提升速度，除了先前發出6個先導牌照外，另外正在處理3個測試牌照的申請。中國多間無人駕駛公司，已制訂Robotaxi攻港計劃，當中包括百度旗下蘿蔔快跑、小馬智行、文遠知行、北京初速Momenta等，還有全球最大網約車平台龍頭Uber都宣布在明年部署在香港測試無人駕駛的士，長遠為了擴展業務。目前本港政策層面上，維持在無人駕駛測試階段，政府已預告，運輸署即將公布《運輸策略藍圖》，當中涵蓋推動無人駕駛發展計劃。隨住科技嘅發展，無人駕駛的士絕對會係未來發展嘅新方向，至於對的士牌價嘅影響係好定係壞，暫時仍有好多未知之數，不過從現時角度推演，弊多於利，投資的士牌有可能從以往的投資價值上有所轉變。詳細嘅分析大家可以密切留意我哋頻道將來有關「無人駕駛的士」嘅短片，呢個絕對係大家未來必需留意嘅重要消息。


雖然近年的士牌價不斷尋底係一個不爭嘅事實，不過又咁講，的士牌呢種資產，可以自行營運賺錢，亦都可以出租收取租金回報，仍然吸引到投資者去持有。咁究竟嚟緊的士牌價會繼續好似DeepSeek的預測跌到一文不值，定係會再現輝煌軌跡？大家可以拭目以待。不過講到尾，香港嘅經濟以至全球嘅經濟情況先係至關重要，全球經濟在2025年持續面對關稅、政策不確定性，同地緣政治局勢升級 等各種挑戰，但出奇地展現出超乎預期的韌性，這股積極的動力相信能夠順勢延續至2026年，儘管世界各地的發展格局將呈現不對等的勢態，但我哋的士交易所都相信香港的士業都能夠起亂世中絕處逢生。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Eva

香港的士交易所 HKTEx 主播

2026年1月15日




 
 
891112
bottom of page