top of page

的士新聞資訊【目標6000部的士用微信支付】2024年6月13日


大家好,歡迎收睇的士新聞資訊,我係Karina,早前網上流傳一條的士司機互相爭執嘅短片,事件發生喺山頂的士站,懷疑前方嘅的士司機拒載遊客,而後方嘅的士司機就上前質問,前方司機立即失控爆粗大叫︰「冇微信呀!冇微信呀!點做啊?」,呢條短片再次引起網民對的士司機服務態度嘅討論,而咁啱得咁蹺,騰訊金融科技副總裁洪丹毅喺早前接受香港傳媒訪問嗰陣時,亦都主動提及到的士電子支付嘅情況。


當時佢表示,微信支付目前喺香港已經覆蓋超過15萬個商戶,覆蓋範圍更包括交通工具,例如港鐵、巴士同的士等等,期望未來可以擴展到電費同政府帳單繳費上面,但係洪丹毅特別提到,香港的士喺電子支付嘅發展比較緩慢,計劃喺今年投放更多嘅資源,令的士司機可以接受用微信支付收錢,佢亦都了解到大部份的士都係由幾位司機輪流揸車開工,所以係毋須一定要由車主申請帳戶,只需要的士司機提供駕駛執照同的士證就可以開設獨立嘅帳戶,洪丹毅又表示,佢哋目標喺今年內每三四部的士就可以見到有一部係用緊微信支付收錢,佢認為政府嚟緊推出嘅的士車隊制度,對於改善的士服務質素方面絕對有好大嘅幫助,相信微信支付嘅便攜又低成本嘅收錢碼貼紙,能夠吸引到更多的士司機選用,更加可以為的士車隊嘅推廣打好基礎。


根據運輸署嘅資料顯示,而家全港有18,163部的士,如果按照洪丹毅所指嘅目標,每三四部的士就有一部提供微信支付收錢,就相當於大約有6,000部的士選用,但實際而家喺市面上仍然有好多的士只係會收現金,情況一直受到唔少市民同遊客嘅指責。


的士車行車主協會永遠會長吳坤成喺接受傳媒訪問時指出,微信支付唔會向啱啱開戶嘅的士司機收取手續費,再加上政府嚟緊將會推動的士車隊化,所以佢對於騰訊金融科技副總裁所提出嘅目標三部車有一部用微信支付,吳坤成認為唔會太難,確實係有可能達成,不過佢認為微信喺香港所推出嘅優惠就唔及內地多,建議可以向用戶發放更多乘坐的士嘅回贈優惠,以吸引乘客選用微信支付俾錢,同時亦都可以向的士司機發放入氣優惠,相信咁樣可以加快的士普及電子支付。


吳坤成又指出,現時有唔少嘅的士司機為咗要接載內地遊客,已經開設咗「的士收錢碼」,認為電子支付已經係大勢所趨,佢估計的士車隊喺嚟緊7月份成立之後,唔同嘅電子支付公司都唔會錯過呢個龐大嘅的士支付市場,相信佢哋將會親自拍門主動提供優惠,以吸引的士車隊採用。


至於的士車隊制度方面,政府計劃發出最多5個的士車隊牌照,最終收到15份申請,結果將會喺7月份公佈,根據的士車隊嘅牌照條件,政府係會要求所有的士車隊嘅車輛,係必須提供電子支付方式,至於的士車隊規模方面,混合或市區的士車隊需要有300至1,000部的士,如果政府最終係發出5個的士車隊牌照,而同時所有的士車隊嘅規模都達到1,000部的士嘅話,到時市面上就會有總數5,000部的士係一定有提供電子支付方式俾錢。


唔知你對以上嘅內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見。


Karina

香港的士交易所 HKTEx 主播

2024年6月13日

P.S.:短片版本請於YouTube上收看:https://youtu.be/1B_Rh4eReS8


382 次查看

Comentários


bottom of page