大家好，歡迎收睇每星期嘅「的士牌市場資訊」，我係Mia，的士牌價經歷咗7至8月嘅急跌之後，最近都有所回穩，今日9月15號最新嘅的士牌參考牌價，市區的士牌價374萬，新界的士牌價306萬，以市區的士為例，相比起8月中嘅低位353萬，上升咗21萬，升幅大約6%。
至於早排急跌嘅主要因素，明顯係受到7月份銀行加息嘅壓力影響，再加上當時的士牌價再次受到各大傳媒嘅關注，加重咗市場上嘅沽售壓力，令的士牌價出現咗急跌嘅情況，嚟緊美國聯儲局將會喺香港時間9月21號再次舉行議息會議，雖然有專家指出今次加息嘅機會唔高，但都值得大家留意息口嘅走勢，如果準備申請大額嘅的士按揭嘅準買家就要留意，就算利息冇再上升，相信現時嘅高息環境都會持續一段時間，各位準備入市嘅準買家記得量力而為。
其實大家要留意息口走勢因素之外，最值得關注就係本身的士生意嘅情況係點，呢方面我哋可以睇吓運輸署最新嘅官方數據，平均每日公共交通乘客人次趨勢，最新只係顯示截至6月份嘅數據，喺呢個圖表我哋可以見得到，乘客人次趨勢喺年頭高位調頭回落，最近嘅趨勢都係繼續下跌，6月份嘅平均每日乘客人次回落到大約1100萬嘅水平，呢啲數據係間接反映緊的士嘅生意情況，但要留意嘅係，呢個圖表係未反映7至8月暑假期間嘅市況，大家都值得繼續留意呢方便嘅消息，我哋亦都會第一時間同大家報導。
唔知你對的士牌價又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Mia
香港的士交易所 HKTEx 主播
2023年9月15日
P.S.：短片版本請於YouTube上收看：https://youtu.be/NUzygv92DhY
#的士牌價 #乘客人次趨勢 #HKTEx #平均每日公共交通乘客人次趨勢 #運輸署 #加息 #銀行加息 #的士按揭 #的士首期 #一站式的士買賣租賃平台 #香港的士交易所 #白牌車 #折扣的士 #的士保險 #的士司機 #的士車主 #的士牌投資 #買賣的士牌