top of page

最新市場動態

的士新聞資訊【不同顏色的士車隊 擔心難於分辨】2023年10月17日

香港的士交易所 HKTEx
2023年10月17日

大家好，歡迎收睇「的士新聞資訊」，我係Olivia，政府計劃引入「的士車隊」以改善的士服務質素，立法會一個審議相關條例草案委員會喺早前開會，運輸及物流局預計初期會有3至4隊「的士車隊」參與，有唔同嘅服務定位，例如專門做商務市場或機場口岸嘅車隊，各車隊可以自行設計車身顏色同標記，方便同現時嘅紅綠藍的士區分，不過有議員就質疑如果日後「的士車隊」出現好多唔同嘅顏色，會令到市民難於分辨，當局就回應指出，的士車身設計需要由運輸署審批，的士車隊要掛上「識別牌」嚟區分行走路線。


當局指出現時嘅的士營運模式對持續確保服務質素有局限，因為現時嘅18163個的士牌照發牌嗰陣時係冇附帶任何直接或者間接同服務質素有關嘅條件，政府只能夠根據《道路交通條例》對的士司機採取執法行動，當局嚟緊建議推行嘅「的士車隊」模式，係由現時持有的士牌嘅車主合組而成為「的士車隊」，再向運輸署申請的士車隊牌照。


至於的士車身顏色方面，議員謝偉銓就提出咗質疑，因為現時本港嘅的士主要分為紅綠藍三種顏色，分別代表可以行駛唔同地區同範圍，如果日後唔同嘅「的士車隊」有唔同嘅車身設計，會唔會有太多花式，會令市民難以分辨。


運輸及物流局首席助理秘書長郭善兒就指出，車隊嘅負責人可以將的士車身嘅顏色寫喺申請書上面，如果運輸署署長認為設計係可以接受嘅話，日後的士車隊將會按照發牌時嘅設計同顏色去營運，郭善兒又指出，預計唔會有好多唔同車隊去營運，估計最初只會有幾支車隊，而政府係會加強宣傳去教導市民分辨，但議員謝偉銓再追問，市民日後點樣喺街上分別的士車隊嘅行走區域範圍，郭善兒就回應指出，當局會要求所有的士車要掛上「識別牌」嚟區分行走路線，等市民可以清楚的士車隊嘅服務地區同範圍。


咁今集就同大家講到呢一度，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2023年10月17日

P.S.：短片版本請於YouTube上收看：https://youtu.be/G7xhiXzJk8Y



 
 

的士牌市場資訊【市區的士按揭例子】2023年10月16日

香港的士交易所 HKTEx
2023年10月16日

大家好，歡迎收睇每星期嘅「的士牌市場資訊」，我係Mia，今日同大家睇一睇最新嘅的士按揭資訊，了解一下如果現時購買一個市區的士牌連一架全新混能的士，到底首期係幾多，月供幾多錢，收租回報又係幾多。


我哋睇一睇以下呢個例子，我哋假設經買賣雙方議價之後，市區的士嘅成交牌價係372萬，而一架全新混能市區的士嘅車價係41萬全包，包首年全保保險同埋包首年牌費，另外車Cam咪錶都包晒，即係一架已經可以即時開工嘅的士，咁佢嘅成交價就係372萬加41萬，即係413萬。


我哋再以現時銀行提供嘅按揭貸款計劃嚟做計算，以全新市區混能的士為例，銀行按揭貸款金額最高大約可以借到330萬，計返嘅話，大約係成交價嘅8成，咁以首期嚟講，以呢個例子嚟計算，就大約只需要83萬。


至於呢個按揭例子係做緊H按，係會以三個月嘅銀行同業拆息嚟做計算，個按揭利率係H加2.3，封頂位係P減1，而今日10月16號，銀行嘅三個月同業拆息H係5.23%，最優惠利率P係6.125%，因為以呢個例子睇，H加2.3係已經觸及到封頂位，所以就會以P減1嚟做計算，按揭利率即係5.125%，按揭年期最高可以做到三十年，360期，經過計算之後，月供就大約係HK$17,900，如果車主係將架車交俾我哋管理嘅話，我哋香港的士交易所提供全新市區混能的士嘅每月託管保證租金係HK$21,400，當中已經包晒所有日常基本維修保養，即係包括晒換呔、換偈油、換擋風玻璃等等。


我哋最後再同大家計埋個租金年回報，以成個資產價值413萬嚟計，佢個租金年回報大約有6.2厘。


最後都要補充一句，要提提大家，記住的士牌價，同埋銀行按揭利率，每日都有機會唔同，我哋提供以上呢個例子，都盡量反映返最新嘅資訊，如果當你打算想購買的士牌嘅時候，歡迎下載我哋嘅App「HKTEX 一站式的士買賣租賃平台」，了解返最新嘅的士牌參考牌價同埋銀行嘅按揭利率資訊，密切留意我哋香港的士交易所，我哋下集見。


Mia

香港的士交易所 HKTEx 主播

2023年10月16日

P.S.：短片版本請於YouTube上收看：https://youtu.be/0aZr6A0bCOI



 
 

【突發】Uber聯同HKTaxi推「按錶收費的士」大家點睇？

香港的士交易所 HKTEx
2023年10月6日

已更新：2023年10月11日



大家好，我係Olivia，Uber喺2021年收購咗HKTaxi後，最近宣布聯同HKTaxi合作，喺2023年10月9號開始，Uber App將會加入「按錶收費的士」嘅行程選項，即係乘客可以喺Uber App內Call的士嗰陣按實際乘客坐緊嗰架的士上嘅咪錶去計算收費，而呢個功能將會額外連接去HKTaxi提供俾的士司機接單。


Uber香港區總經理鍾志霆表示，HKTaxi係使用「搶單」機制，司機需要自行爭取訂單，而Uber App就係用「派單」形式，通過系統派單俾最合適嘅司機，喺新增嘅功能之下現時嘅HKTaxi司機係無需要重新喺Uber App內登記，乘客喺Uber App內選擇咗「按錶收費的士」之後，訂單將會連結去到HKTaxi嘅應用程式俾的士司機「搶單」，完成車程之後乘客可以經Uber App用電子支付俾車費，鍾志霆又表示，HKTaxi同Uber將會繼續以兩個獨立嘅應用程式運作，無意將兩個App合併為一。


其實早喺上年2022年5月份左右，Uber App都曾經推出過「按錶收費的士」嘅乘車試行計劃，當時我哋香港的士交易所都有出過片同大家討論過佢合唔合法嘅問題，如果未睇過嘅朋友可以去我哋個Channel重溫返先，而今次重新正式推出呢個「按錶收費的士」嘅計劃，係聯同佢哋收購返嚟嘅本地Call的士App HKTaxi去推行，情況上同上次係有啲唔同，但值得留意嘅係雖然Uber新增咗呢個「按錶收費的士」嘅行程選項，但原有嘅「包車不按錶收費的士」同埋其他「Uber白牌車」嘅行程選項都仍然存在俾乘客選用，一個App集合咗「合法」、「灰色地帶」同「非法白牌車」嘅Call車服務喺法律嘅原則上係唔可以接受。


如果你只係一位乘客，唔好以為只要有乘車優惠同Call車方便，其他嘢都唔關你事，但事實上，Uber App咁嘅情況，係會令乘客誤以為所有Call車服務都係合法，但萬一遇上交通意外嗰陣乘客同司機都未必得到合理嘅保障。


至於如果你係一位的士司機，唔好以為只要可以接多啲單，唔理背後公司嘅營運理念同抽佣抽幾多，其實Uber嘅出現，實際已經破壞緊整個的士事業嘅生態，剝削的士司機利益嘅同時，更加引發起行內混亂同不公平競爭。


講到尾，利用科技提供網約的士服務一定係大勢所趨，但係我哋都好希望香港可以發展到一個獨立統一嘅正價Call的士App，乘客方便Call車之餘，司機更加可以免費使用，咁樣的士業界先可以健康發展。


咁今集就同大家講到呢一度，唔知你對以上內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見！


Olivia

香港的士交易所 HKTEx 主播

2023年10月6日

P.S.：短片版本請於YouTube上收看：https://youtu.be/ah2K1JHp2dg


 
 
37384041
bottom of page