top of page

最新市場動態

的士牌市場資訊【乘客人次趨勢持續上升】2023年6月｜AI女主播｜廣東話｜出行數字｜公共交通｜的士生意回升｜全面通關｜復活節長假期｜五一黃金周｜的士牌投資價值

香港的士交易所 HKTEx
2023年6月21日

大家好，歡迎收睇「的士牌市場資訊」，我係A.I.Olivia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日會同大家睇吓有關乘客人次趨勢嘅統計數字，由運輸署官方最新公佈嘅圖表，平均每日公共交通乘客人次趨勢，我哋先睇一睇呢個圖表，圖表上嘅數據最新係顯示到2023年嘅3月份，至於4月份同埋5月份嘅數據係未顯示出嚟，呢點大家要留意。


喺呢個圖表我哋可以見得到，由上年年尾至今年年頭期間，公共交通乘客人次趨勢都有所急升，3月份嘅平均每日乘客人次已經回升到接近1200萬嘅水平，而3月份呢個月正正就係回復全面通關嘅時間，但值得留意嘅係，數據上係仲未反映4月份復活節長假期嘅情況，同埋五一黃金周嘅情況，相信乘客人次數字都會進一步上升，有望回復到社會運動同埋疫情前平均每日1300萬人次嘅水平。


正如我喺之前嘅片都有講過，點解我哋要留意呢啲統計數字呢？其實最核心影響到的士牌嘅投資價值，正正就係的士生意嘅情況，而公共交通乘客人次趨勢就係反映緊市面上市民出行嘅情況，呢個間接亦都反映緊的士生意嘅情況，所以都好值得我哋參考。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Olivia

人工智能主播

香港的士交易所 HKTEx


2023年6月21日

P.S.：短片版本請於YouTube上收看：https://youtu.be/uS4GCjAEr7o



 
 

的士新聞資訊【深圳無人的士一折價錢試運】AI女主播｜廣東話｜2023年6月19日｜無人的士試運｜無人駕駛技術｜深圳坪山區｜百度蘿蔔快跑

香港的士交易所 HKTEx
2023年6月19日

大家好，我係A.I.Olivia，今日同大家睇睇一單有關的士嘅新聞。


由百度開發營運嘅「蘿蔔快跑」自動駕駛出行服務平台，正式獲得深圳坪山區頒發嘅「首批智能網聯汽車無人商業化試點通知書」，可以喺坪山區開展L4級無人駕駛商業化收費營運，市民有望可以喺深圳坐到「無人的士」。


用戶可以通過「蘿蔔快跑App」、微信小程式、百度地圖或百度App等等嘅平台，預約「無人的士」，的士會自動駕駛到用戶嘅定位地址，乘客喺後排座位入座之後，自行點擊「開始行程」嘅按鈕，即可起步。


根據「無人的士」嘅乘車要求，14歲以下同埋60歲以上嘅人士係唔可以使用呢個服務，未滿18歲嘅人士需要喺監護人嘅陪同之下乘搭，車內前後排有玻璃阻隔，前面司機位置係冇安全人員陪同，副駕位置暫時亦唔可以坐人，禁止乘客干擾自動駕駛，所以一架車只係容許最多3位乘客坐喺後排座位，另外，寵物係唔可以攜帶上車。


「蘿蔔快跑」目前以一折嘅超低優惠價對外提供「無人的士」服務，例如行駛6公里原價大約係40元人民幣，但乘客而家只需要俾4元人民幣就可以乘搭得到，行駛過程中「無人的士」嘅最高時速係40公里，乘客可以喺車內自行手動調教溫度、播放音樂等等，屏幕同時會顯示車速、周邊車輛嘅資訊同埋剩餘路程嘅資訊等等。


據了解，百度「Apollo」運營嘅「蘿蔔快跑」喺深圳投放嘅自動駕駛車型號為2021年發布嘅第五代量產無人車「Apollo Moon」，配有13個攝錄鏡頭、5個毫米波雷達同埋兩個激光雷達。

另外，百度亦設置咗「5G雲代駕員」，喺自動駕駛無法通過嘅場景下使用遠程協助，並且喺結束之後，幫助車輛回復自動駕駛狀態，如果乘客遇到緊急情況，亦都可點擊屏幕上面嘅「緊急求救」按鈕，向「雲代駕員」請求幫助。

目前，無人自動駕駛服務已經喺北京、武漢、重慶3個城市落地，而深圳係全中國首個開啟無人自動駕駛商業化嘅一線城市，喺坪山區率先起步，推動深圳嘅智能網聯汽車產業持續發展。

咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年6月19日

P.S.：短片版本請於YouTube上收看：https://youtu.be/GJ-_iAim75c



 
 

的士牌市場資訊【的士牌價持續回落】2023年6月｜AI女主播｜廣東話｜加息壓力｜的士租金回報上升｜加息見頂預期｜香港的士交易所 HKTEx

香港的士交易所 HKTEx
2023年6月14日

大家好，歡迎收睇「的士牌市場資訊」，我係A.I.Olivia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日就同大家睇一睇2023年，頭5個月，的士牌價嘅走勢表現，我哋先睇一睇頭5個月嘅走勢圖表。市區的士牌價由年頭441萬，去到6月頭415萬，下跌咗26萬，大約下跌咗係5.9%，至於新界的士牌價就由年頭341萬，到6月頭337萬，輕微跌咗4萬，大約係1.2%。


其實喺呢個圖表我哋可以睇到，今年年初頭兩個月，的士牌價係有明顯嘅升幅，主要受到全面通關嘅消息同埋租金上升所帶動，的士牌買賣交投活躍，帶動牌價亦有所上升。


但係到咗農曆新年假期過後，交投逐步慢慢回落，由於銀行按揭貸款息口持續上升，投資者對加息嘅情況感到壓力，再加上市場上嘅投資氣氛一般，香港股市同樓市呢幾個月嘅表現都唔係咁好，所以某程度上都影響咗投資的士牌嘅情況，的士牌價近期都持續回落。


今日2023年6月14號最新嘅的士牌價參考價係，市區的士牌價411萬，新界的士牌價329萬。


但係大家值得留意嘅係，近期嘅的士租金係不跌反升，如果的士牌價係繼續回落嘅話，佢嘅租金年回報會繼續上升，而家嘅租金年回報已經超過5厘，大家可以留意呢一點嚟做投資計算。另外，大家要繼續留意息口嘅走勢，睇吓今年打後會唔會出現加息見頂嘅情況，最後，當然要繼續留意的士生意嘅回復情況，我哋會同大家繼續睇住個市況，一有最新消息，會同大家講解分析。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Olivia

人工智能主播

香港的士交易所 HKTEx


2023年6月14日

P.S.：短片版本請於YouTube上收看：https://youtu.be/s_cDK4vUggk



 
 
44454748
bottom of page