top of page

最新市場動態

的士新聞資訊【的士服務質素評分下跌】 AI女主播｜廣東話｜2023年6月14日｜的士服務質素調查｜香港的士業議會｜的士司機｜香港的士交易所 HKTEx

香港的士交易所 HKTEx
2023年6月14日

大家好，我係A.I.Olivia，今日同大家睇睇一單有關的士嘅新聞。


香港的士業議會最近公佈咗新一份「的士服務質素調查」，喺今年4月至5月期間，議會委託咗恆生大學進行問卷調查，喺全港各區以面對面嘅方式，對1211位的士乘客進行訪問，結果顯示，有超過一半嘅受訪者認為，的士整體服務質素屬於良好或者優秀，只有大約9%嘅受訪者認爲係較差或者極差，而的士整體服務質素評分，以100分為滿分，結果獲得58.4分，但係呢個分數比起上一次3年前嘅調查結果下跌咗7分。


另外，調查期間亦都邀請咗受訪者對13項嘅的士服務元素進行評分，當中以「的士司機待客以禮」獲得最低分，5分滿分，只係有3.21分，第二低分嘅係「的士很環保」，獲得3.22分，而第三低分嘅係「的士司機主動向乘客提供協助」，獲得3.24分。


至於最高分嘅項目包括：「的士車身同車廂清潔」，有3.45分，「的士車廂寬敞、座位舒適」，有3.44分，「的士車廂溫度適中」，都係有3.44分，以上都係以5分滿分嚟做計算。


香港的士業議會主席黃卓邦認為，呢3年嚟社會環境同埋的士行業生態嘅變化都好大，司機嘅流失，同埋司機年紀老化嘅情況嚴重，可能係因為呢啲原因而導致的士服務質素評分有所下降，黃卓邦表示，議會將會繼續喺業界推行獎勵計劃，去鼓勵的士司機改善服務質素，但對於整體嚟講，香港的士嘅整體服務質素評分有接近60分，雖然評分唔算高，但都仍然係屬於滿意嘅水平，明白到係仲有好多改善嘅空間，希望的士業界繼續努力，去迎合乘客嘅期望，另外，黃卓邦又表示，支持運輸署推行的士司機違例計分制度，可以有效咁揪出業界嘅害群之馬，佢同時亦都建議政府要加強打擊「白牌車」，改善的士嘅經營環境，吸引更多青年入行。


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年6月14日

P.S.：短片版本請於YouTube上收看：https://youtu.be/THNd-VuTlxE



 
 

的士新聞資訊【基石科技與業界推出eC-TAXI充電服務】AI女主播 (廣東話) 2023年6月2日

香港的士交易所 HKTEx
2023年6月2日

大家好，我係A.I.Olivia，今日同大家睇睇一單有關的士嘅新聞。


早前基石科技聯同領展喺位於天水圍T Town South停車場，舉行咗充電站啟用儀式，以及「綠色運輸先導計劃」發布會。基石科技為響應政府《香港電動車普及化路線圖》，推動電動車普及化，同的士業界合作推出綠色運輸先導計畫。今次發布會宣布聯同香港的士小巴商總會合作，推出「eC-TAXI」充電服務。


「eC-TAXI」提供嘅充電服務，係透過香港的士小巴商總會，聯繫的士司機，等的士司機可以透過流動應用程式預約充電位，提供充電優惠方案同埋支援服務，包括充電折扣同資助、嶄新嘅充電體驗、提供充電入門速成班，以及提供24小時客戶服務熱線支援等等，鼓勵的士業界參與綠色運輸，推動電動車普及化，支援的士業界引入新款「比亞迪」E6電動的士 。


香港的士小巴商總會理事長周國强指出，旗下會員訂購咗30部新款電動的士，已經出咗5部。其實的士業界亦曾經喺2013年引入咗超過40架”比亞迪”E6電動的士，但係唔夠一年就退出市場，當時係因為充電嘅情況無辦法支援的士日常嘅營運。佢又表示，新款電動車轉用咗刀片電池設計，充滿電可以行駛超過400公里，如果以一般日更的士大約行駛160公里，而夜更的士大約行駛200公里嚟計算，電池嘅續航力勉強可以應付得到，當然最緊要係有足夠嘅充電配套。周國强又指出，期望能夠解決充電問題之後，再引入更多唔同嘅電動的士車款，等乘客可以感受到的士業界有所進步。佢預期去到下年年尾，將會有800至到1000部的士轉為電動的士。


另外，基石科技其實仲不斷擴大緊充電站嘅規模，上年公布充電站已經進入咗領展旗下嘅33個停車場，工程已經陸續完成，基石科技行政總裁葉兆康表示，而家大約有70個充電站，合共大約有1000部充電機，其中一半都係喺領展嘅停車場。


環境及生態局首席環境保護主任張展華博士喺出席活動嘅時候表示，2019年全港只係有6%電動私家車，但係今年首季已經增加到63%，換句話說，每兩架新嘅私家車當中，其中一架就係電動車。佢認為充足嘅充電設施係推動電動車嘅關鍵因素，而建構一個電動車嘅網絡，實在要有賴多方面嘅幫助，匯聚唔同企業同商會，推動各界落實使用商用電動車嘅具體流程，實現更完善嘅綠色電動車生態圈。


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年6月2日

P.S.：短片版本請於YouTube上收看：https://youtu.be/yIXF9AynThA



 
 

的士牌市場資訊【過戶數量維持水平】2023年5月｜AI女主播｜廣東話｜加息壓力｜的士生意好轉｜投資缺乏方向｜加息見頂預期｜香港的士交易所 HKTEx

香港的士交易所 HKTEx
2023年5月29日

大家好，歡迎收睇「的士牌市場資訊」，我係A.I.Olivia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日就同大家睇一睇2023年1月份至4月份運輸署嘅的士過戶數量，根據運輸署俾我哋嘅官方數字睇得到，最新4月份嘅的士過戶數量係維持水平，市區的士嘅過戶數量有139宗，比起3月份140宗微跌咗1宗，至於新界的士嘅過戶數量4月份有32宗，比起3月份30宗多出2宗，按月升幅大約6.7%，如果以今年頭4個月嘅市區的士嘅過戶總數525宗嚟計，比起上年同期少咗15宗，按年下跌咗2.8%。


根據以上嘅數字嚟睇，的士牌買賣嘅交投活躍度，無論按年又或者按月嚟睇，都係維持水平，冇太大嘅變化，但有下跌嘅跡象，最主要係投資者缺乏方向，一方面受到加息嘅壓力，另一方面亦有的士生意好轉同租金上升嘅利好因素帶動，所以大家可以繼續留意息口嘅走勢，睇吓加息周期見頂嘅情況會唔會喺今年出現，我哋會同大家一齊繼續跟進市況。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Olivia

人工智能主播

香港的士交易所 HKTEx


2023年5月29日

P.S.：短片版本請於YouTube上收看：https://youtu.be/IOBmomAzrVA



 
 
45464849
bottom of page