top of page

最新市場動態

的士牌市場資訊【過戶量升 但牌價急跌】2023年7月

香港的士交易所 HKTEx
2023年7月20日

大家好，歡迎收睇「的士牌市場資訊」，我係Scarlett，踏入咗7月份，我哋今日就同大家睇吓今年上半年的士過戶數量同的士牌價嘅表現。


我哋先睇一睇上半年運輸署嘅的士過戶數量，根據運輸署俾我哋嘅官方數字睇得到，2023年上半年的士過戶數量都係持續上升，以市區的士為例，1月份嘅過戶數量有119宗，而6月份嘅過戶數量就有165宗，上升咗大約38.7%，再睇返成個上半年嘅數字，市區的士嘅過戶數量差唔多每個月都有所上升，但係大家值得留意嘅係，的士過戶數量上升，並唔代表的士牌價係會正比例咁上升，的士過戶數量多與少，只係反映緊的士買賣嘅活躍程度，有時如果市場上出現大量沽盤，而同時間市場上都有買家繼續入市，的士過戶數量會上升但牌價就可能會下跌，就會出現「量升價跌」嘅情況，的士牌市場呢幾個月就出現咗呢個情況。


喺我哋未睇上半年嘅的士牌價表現之前，大家可以先下載我哋香港的士交易所App「HKTEx 一站式的士買賣租賃平台」，咁你就可以隨時隨地知道最新嘅的士牌價同市場資訊，有興趣嘅仲可以喺App內自助搵盤放盤，至於download App條link我哋放咗喺呢條片下面嘅留言位置。


好，我哋睇返上半年的士牌價嘅走勢，喺呢個圖表我哋可以睇得到，的士牌價喺2月中開始調頭回落，呢幾個月都持續下跌，就以市區的士牌價為例，2月中高位468萬左右，下跌至6月尾411萬，下跌咗57萬，下跌超過一成，最新7月份市區的士牌價更跌穿400萬，當中最主要下跌嘅原因在於環球經濟環境唔明朗，投資市場氣氛轉差，本港嘅股市樓市表現都差，所以有部份的士車主決定暫時退市離場，增加咗市場上沽售嘅壓力，令的士牌價急跌。


不過「量升價跌」呢個情況係有兩個唔同嘅解讀信號，一般解讀為下跌初期嘅現象，因為沽買雙方對前景嘅睇法有極大嘅分歧，沽方認為呢個時候係適合退市離場，但買方對後市仍然抱有期望，所以呢個就係造成咗「量升價跌」嘅主要原因，不過，「量升價跌」都有另一個解讀方法，有人會解讀為準備上升初期嘅現象，因為價格經過長時間下跌，有人相信已經到達低位嘅時候，就開始會有買家湧現，期後交投逐漸增多，所以有人會認為「量升價跌」係低位買入嘅信號。


不過無論你嘅睇法係點都好，喺準備賣出或者買入的士牌之前，都歡迎download我哋嘅App，了解更多最新資訊，密切留意我哋香港的士交易所，我哋下集見！


Scarlett

香港的士交易所 HKTEx 主播

2023年7月20日

P.S.：短片版本請於YouTube上收看：https://youtu.be/lXjsCOycCto



 
 

的士新聞資訊【的士小巴商總會取消車租建議 避免違反競爭條例】2023年7月12日

香港的士交易所 HKTEx
2023年7月12日

大家好，我係Olivia，今日同大家睇睇一單有關的士嘅新聞。


喺今日，香港的士小巴商總會向所有商會會員發出咗內部通告，表明將會糾正過往向會員提供的士車租建議嘅做法，競爭事務委員會就呢件事表示歡迎。


競委會表示，留意到的士小巴商總會過往不時會發出無約束力嘅車租建議，建議商會嘅會員對的士車租作出調整，會員包括一啲的士車行同埋一啲個人嘅的士車主，期間亦都有會員確實曾經採納商會嘅建議嚟調整車租。


競委會指出，佢哋早前同商會嘅代表會面同埋表達關注之後，商會迅速作出咗回應，並且喺今日7月12號發出咗內部通告，通知商會會員，指商會將會即時停止提供車租建議，日後會改為以不記名嘅方式，發佈過往車租嘅綜合季度數據，供會員參考，商會亦都提醒，會員之間唔應該協調所收取嘅車租，避免違反《競爭條例》。


競委會認為，商會糾正咗之前嘅做法，將會消除咗車租建議可能對的士車行同車主自行決定車租嘅影響，促進佢哋之間嘅競爭，如果的士業界內有有效嘅競爭，或者會令的士司機帶嚟更多嘅選擇，同埋帶嚟潛在較低嘅車租。

競委會喺佢哋嘅《第一行為守則指引》所講，《競爭條例》嘅第一行為守則適用於行業協會所作出嘅決定，包括不具約束力嘅決定，競委會尤其認為，行業協會向會員提供收費表或者價格建議，可能會損害競爭，而作為業務實體嘅會員若實施行業協會嘅反競爭決定，有關會員同埋協會都可能需要負上條例下嘅法律責任，行業協會必須要提高警覺，切勿從事反競爭安排，並且應該避免建議或要求會員將產品嘅價錢或服務嘅收費定喺某指定嘅水平。


競委會鼓勵所有行業協會主動審視佢哋嘅做法，如有需要時，應作出適當嘅修改，以確保全面符合《競爭條例》嘅規定，任何人士如果知道行業協會或會員從事反競爭行為，應該立即向競委會作出舉報。


咁今集就同大家講到呢一度，歡迎留言分享你嘅睇法，我哋下集見！


Olivia

香港的士交易所 HKTEx 主播

2023年7月12日

P.S.：短片版本請於YouTube上收看：https://youtu.be/LyJiXrX5H9o



 
 

的士牌市場資訊【新界的士租金回報】2023年7月

香港的士交易所 HKTEx
2023年7月10日

大家好，歡迎收睇「的士牌市場資訊」，我係Mia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今集就會特別少少，因為平時我哋都會集中講解市區的士，但係今日就會嘗試同大家講解一吓新界的士，睇吓到底而家投資一個新界的士牌，佢個租金年回報係有幾多，我哋就以現時投資一架新界的士牌連全新混能車為例，我哋香港的士交易所提供嘅每月託管保證租金係HK$17,200，而一年車主收到嘅租金總數就有HK$206,400，以呢架的士嘅資產總值HK$366萬嚟計算，佢嘅租金年回報係大約5.6厘，另外，如果車主係申請銀行按揭貸款嚟投資嘅話，以現時嘅數字嚟計，佢嘅投資首期金額就只需要HK$61萬，我哋再用佢嘅投資金額嚟計佢嘅槓桿年回報，係大約可以做到33.8厘。


希望以上嘅資訊，可以俾你參考吓，計算吓的士牌嘅投資價值，但最後都要補充一句，要提提大家，記住的士牌價、同埋銀行按揭金額，每日都有機會唔同，另外的士租金亦都會根據物價通脹同實際市況而有所調整，我哋提供以上呢個例子，都盡量反映返最新嘅市場資訊俾你做參考，如果你隨時想知道最新嘅數字，歡迎聯絡我哋。


咁今集就同大家講到呢一度，至於到底投資市區的士好，定係新界的士好，我哋下一集就同大家講解分析一吓，密切留意我哋香港的士交易所，我哋下集見！


Mia

人工智能主播

香港的士交易所 HKTEx


2023年7月10日

P.S.：短片版本請於YouTube上收看：https://youtu.be/y4DnaOZlW4E



 
 
42434546
bottom of page