top of page

最新市場動態

的士新聞資訊【司機拒交醫療報告 運輸署束手無策】AI女主播 (廣東話) 2023年5月9日

香港的士交易所 HKTEx
2023年5月9日

大家好，我係A.I.Olivia，今日同大家睇睇一單有關的士嘅新聞。


早前3月份喺北角發生咗一單的士落斜失控撞倒3位途人嘅交通意外，84歲嘅涉事的士司機亦都受傷，隨即引起社會關注的士司機嘅體格同健康問題。運輸及物流局早前指出，喺過去兩年，70歲或以上嘅的士司機涉及交通意外宗數平均超過410宗。運輸署而家正在檢討司機體格證明安排，喺5月19號將會喺立法會交通事務委員會當中討論。


現時如果司機患有「指明疾病或傷殘」，例如：未受控制嘅糖尿病、精神錯亂、高血壓會隨時暈倒，又或者有理由相信司機患病且駕駛會對公眾構成危險，運輸署有權取消司機嘅駕駛執照。而執法部門喺調查交通意外嗰陣時，亦都會向運輸署轉介「懷疑司機可能健康有問題」個案。


運輸署表示，喺2013年至2022年期間，接獲咗86宗「懷疑司機可能健康有問題」個案，其中6位司機未授權運輸署查閱佢哋嘅醫療報告。喺現行嘅法例同機制之下，運輸署無辦法評估相關嘅司機係唔係適合駕駛，只能夠喺續牌嘅時候要求司機提供醫療報告。運輸署提到，嗰6位司機當時嘅年齡係介乎24歲至72歲，駕駛執照將於2024年至2029年到期，其中3位司機持有的士、小巴或巴士駕駛資格。


議員田北辰早前喺電台節目形容呢個情況「荒謬絕倫」，批評運輸署被動，應該向法庭申請要求涉事司機提供醫療報告。佢支持政府將司機體格證明要求降至到65歲，並且改為每年一檢，但係需留意檢查內容，同埋要由指定醫生或者診所，按統一嘅標準進行，確保公信力。田北辰又指出，私隱條例有豁免條例，例如當事人可能作出危害個人及公眾安全，理論上運輸署係有權要求機構提供「懷疑可能健康有問題」個案嘅醫療報告。但係佢認為更好嘅方法係運輸署向法庭申請，要求涉事司機提供醫療報告，由法庭把關。


另外，汽車交通運輸業總工會九龍分會副主任杜燊棠表示，唔少司機都有做體檢，但係以往比較簡化，佢促請當局訂明指定嘅檢查項目。佢認為，體檢改為每年一檢對年老嘅司機造成騷擾，質疑年輕司機亦都有健康問題，指如果當局必須調整要求，期望縮至最多3年一檢。


運輸署則表示，而家正在檢討司機體格證明嘅要求，並且喺同一時間檢視「懷疑個案」嘅跟進同處理，以及所涉及修例嘅需要。


其實作為的士司機，有良好嘅體格同健康係非常重要，無論對司機、乘客、同道路使用者嘅安全都係有好處，收緊司機體格證明要求係其中一個方法，不過最緊要係司機多啲留意自己嘅身體狀況，定期做體檢，如果發現身體狀況唔好，就需要休息，唔好揸車喇！


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年5月9日

P.S.：短片版本請於YouTube上收看：https://youtu.be/bSvEB-LY3Y8



 
 

的士牌市場資訊【乘客人次趨勢不斷上升】2023年5月｜AI女主播｜廣東話｜香港的士交易所 HKTEx

香港的士交易所 HKTEx
2023年5月5日

大家好，歡迎收睇「的士牌市場資訊」，我係A.I.Amelia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日會同大家睇吓有關乘客人次趨勢嘅統計數字，由運輸署官方最新公佈嘅圖表，平均每日公共交通乘客人次趨勢，我哋先睇一睇呢個圖表，圖表上嘅數據最新係顯示到2023年嘅2月份，至於3月份同埋4月份嘅數據係未顯示出嚟，呢點大家要留意。喺呢個圖表我哋可以見得到，公共交通乘客人次趨勢由2019年嘅年中開始下跌，下跌原因最主要係受到社會運動同埋疫情嘅影響，由之前平均每日1300萬人次水平，跌至2020年嘅年頭平均每日700萬人次水平，另外喺2022年嘅年頭，更加跌到去平均每日600萬人次水平，比起疫情前嘅水平跌幅超過5成。但隨住疫情緩和，我哋見得到乘客人次趨勢都有所回升。我哋再睇返近期嘅情況，我哋見得到由上年年尾至今年年頭呢幾個月，乘客人次趨勢都有所急升，平均每日乘客人次已經回升到1100萬以上嘅水平，呢個數據仲未反映3月份全面通關，同埋4月份復活節長假期嘅情況，相信個數字都會進一步上升。


講返轉頭，咁點解我哋要留意呢啲統計數字呢？其實最核心影響到的士牌嘅投資價值，正正就係的士生意嘅情況，而公共交通乘客人次趨勢就係反映緊市面上市民出行嘅情況，呢個正正亦都反映緊的士生意嘅情況，所以都好值得我哋參考。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Amelia

人工智能主播

香港的士交易所 HKTEx


2023年5月5日

P.S.：短片版本請於YouTube上收看：https://youtu.be/eXhShc5Pj8Q



 
 

專題探討【A.I.能夠取代的士司機嗎？】AI女主播 (廣東話)

香港的士交易所 HKTEx
2023年5月4日

大家好，我係A.I.Amelia，嚟緊我會喺香港的士交易所呢個頻道，同大家一齊專題探討有關香港的士市場嘅題目，未訂閱我哋嘅朋友，記得訂閱，多謝支持！


隨著科技嘅進步，人工智能(A.I.)喺唔同嘅領域上面嘅應用已經越嚟越廣泛。至於無人駕駛技術作為A.I.層面上面嘅其中一個亮點，已經引發起大家對於未來交通發展嘅關注。尤其係載客嘅的士行業，大家經常會討論到一個問題：「A.I.能夠取代的士司機嗎？」，以下落嚟我哋將會從技術嘅可行性、社會嘅接受程度同埋經濟效益呢三方面去探討呢一個議題。


第一，技術嘅可行性


無人駕駛技術近年嚟都取得咗顯著嘅突破，特別係喺感知、定位同埋決策等等呢幾方面都有明顯嘅突破。好多科技嘅巨頭公司，例如：Google、Tesla同Nvidia等等都投入咗大量嘅資源進行研究開發。喺目前嘅情況，其實無人駕駛汽車已經喺唔同嘅國家地區進行咗商業化嘅試點，而且仲取得咗初步嘅成功。


但係，無人駕駛技術要完全取代的士司機，仲需要克服一啲技術上嘅挑戰。例如：喺惡劣嘅天氣條件之下，點樣確保行駛安全，以及點樣應對各種複雜嘅道路同交通狀況等等。另外，無人駕駛汽車喺行駛嘅過程中可能出現嘅技術故障，都需要有妥善嘅解決方案。


第二，社會嘅接受程度


無人駕駛技術嘅普及唔單只取決於本身嘅技術，其實仲需要社會大眾嘅接受同信任。喺目前嘅情況，好多人對於無人駕駛汽車仍然存在一定程度嘅疑慮，尤其係喺安全性方面。雖然統計數據顯示，無人駕駛汽車嘅事故率相對較低，但一旦發生事故，往往都會引起輿論嘅關注同質疑。


另外，無人駕駛汽車嘅道德同法律問題都需要解決。例如，喺無法避免事故嘅情況下，無人駕駛汽車應該點樣做出道德判斷，同埋事故責任應該點樣界定等等。


第三，經濟效益


A.I.取代的士司機對於整個交通行業嘅經濟效益都係一個重要因素。無人駕駛技術嘅普及，有望降低人力成本，提高營運效能，而且仲可以減少由人為疏忽導致嘅事故。另外，對於的士車行同的士車主嚟睇，由於無人駕駛的士大大降低咗聘請司機嘅成本，從而可以帶嚟更高嘅利潤。至於對乘客嚟講，由於的士營運方面降低咗成本同提高咗效能，而的士車費都會根據呢啲成本因素而調整，所以乘客可能會享受到更低嘅乘搭車費。


但係，如果A.I.真係取代咗的士司機，其實都會帶嚟一定嘅社會成本，因為有大量嘅司機將會失業，政府同社會需要為佢哋提供職業再培訓同埋轉型再就業嘅支持。


綜合咗以上嘅觀點，我哋可以睇到，A.I.喺某啲方面已經可以取代到的士司機，但同一時間都存在咗好多問題。喺未來嘅日子，隨著技術嘅進步同社會環境嘅變化，A.I.係唔係真係可以完全取代的士司機，仲需要進一步嘅探討同研究。不過，無論點樣都好，我哋相信，A.I.將會喺交通運輸領域上面，發揮越嚟越重要嘅作用，為我哋嘅出行生活，帶嚟更多嘅便利同安全。


咁今集就同大家講到呢一度，歡迎留言分享你嘅睇法，我哋下集見！


Amelia

人工智能主播

香港的士交易所 HKTEx


2023年5月4日

P.S.：短片版本請於YouTube上收看：https://youtu.be/tENjEviWN0I



 
 
47485051
bottom of page