大家好，歡迎收睇「的士牌市場資訊」，我係Mia，隨住美國聯儲局喺今日7月27號凌晨宣佈加息0.25厘，係上年3月以嚟第11次加息，並且係自2001年以嚟嘅最高水平，本港金管局亦都跟隨美國加息步伐，今日宣佈，將貼現窗基本利率進一步上調0.25厘，升至5.75厘，即時生效。
另外，匯豐銀行今日亦都宣佈，由2023年7月28日(星期五)起，上調港元最優惠利率(P)0.125厘，即係由年利率5.75厘調高至5.875厘，匯豐對上一次係喺2023年5月5號調整港元最優惠利率，當時加息0.125厘。
我哋嘗試睇返，今次銀行將最優惠利率加息0.125厘，到底對的士按揭大約會有咩影響，由於近期大部份銀行嘅的士按揭貸款計劃都係做緊H按，而近期1個月銀行同業拆息Hibor都有所上升，從而觸及咗封頂位，所以銀行會以封頂位P按嚟做計算，以今日加息0.125厘嚟計，實際的士按揭嘅息口就會由5厘上升至5.125厘，我哋就以現時購買一架全新市區的士為例，銀行最高嘅貸款金額為355萬，加息之後，實際嘅供款就由每月大約HK$19,000，增加到大約每月HK$19,300，每月供款大約增加咗HK$300，雖然加息之後增加嘅供款好似唔係好多，但係絕對會增加咗車主嘅心理壓力，亦都會對新買家入市帶有阻力，的士牌價都會有一定嘅下跌壓力。
至於未來加息嘅情況會係點？加息係唔係已經見頂？華爾街大行就意見分歧，野村認為如果下半年通脹持續放緩，7月份呢一次嘅加息會係最後一次加息，但係巴克萊報告就認為，美國勞動力市場持續強勁，估計美國聯儲局需要喺9月或者11月再一次加息0.25厘，至於本港金管局副總裁阮國恒就預計，美國通脹仍會高企，預料高息水平將會維持一段時間。
不過無論息口走勢係點都好，我哋香港的士交易所都提提大家，如果係需要申請大額嘅的士按揭貸款之前，記得要細心考慮，量力而為，做好風險管理，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見！
Mia
香港的士交易所 HKTEx 主播
2023年7月27日
P.S.：短片版本請於YouTube上收看：https://youtu.be/dmip4sV98Yg