已更新：2025年11月17日
大家好，歡迎收睇「的士牌市場資訊」，我係Karina，今日同大家睇一睇最新嘅的士按揭資訊，了解一下如果現時購買一個市區的士牌連一架全新混能的士，到底首期係幾多，月供幾多錢，收租回報又係幾多。
我哋睇一睇以下呢個例子，我哋假設經買賣雙方議價之後，市區的士嘅成交牌價係HK$220萬，而一架全新混能市區的士嘅車價係HK$41萬全包，包首年全保保險同埋包首年牌費，即係一架已經可以即時開工嘅的士，咁佢嘅成交價就係HK$220萬加HK$41萬，即係HK$261萬。
我哋再以現時銀行提供嘅按揭貸款計劃嚟做計算，以全新市區混能的士為例，銀行按揭貸款金額最高大約可以借到HK$180萬，計返嘅話，大約係成交價嘅69%，咁以首期嚟講，以呢個例子嚟計算，就大約只需要HK$81萬。
至於呢個按揭例子係做緊P按，個按揭利率係P-0.75，而今日2025年9月11日，銀行嘅最優惠利率P係5.5厘，個按揭利率就即係4.75%，按揭年期最高可以做到25年300期，經過計算之後，月供就大約係HK$10300蚊，如果車主係將架車交俾我哋管理嘅話，我哋香港的士交易所提供全新市區混能的士嘅每月託管保證租金係HK$22000蚊，當中已經包晒所有日常基本維修保養，即係包括晒換呔、換偈油、換擋風玻璃等等。
我哋最後再同大家計埋個租金年回報，以成個資產價值HK$261萬嚟計，佢個租金年回報超過10%，當然呢個回報率係未扣除成本開支，我哋就嘗試扣除埋最貴嘅保險費用成本支出，佢嘅租金年回報率都超過6%，情況都算理想。
最後都要補充一句，要提提大家，記住的士牌價，同埋銀行按揭利率，每日都有機會唔同，我哋提供以上呢個例子，都盡量反映返最新嘅資訊，如果當你打算想購買的士牌嘅時候，歡迎下載我哋嘅App 『HKTEx 一站式的士買賣租賃平台』，了解返最新嘅的士牌參考牌價同埋銀行嘅按揭利率資訊，密切留意我哋香港的士交易所，我哋下集見。
Karina
香港的士交易所 HKTEx 主播
2025年9月11日
#的士按揭 #的士牌首期 #月供的士牌 #的士牌價 #的士牌買賣 #投資的士牌 #的士牌回報 #按揭利率 #H按 #P按 #按揭金額 #按揭年期 #的士牌買賣流程 #女主播 #的士 #香港的士交易所 #HKTEx #一站式的士買賣租賃平台#HKTExApp
