top of page

最新市場動態

的士新聞資訊【Robotaxi 集團來港上市在望】2025年10月21日


大家好，歡迎收睇「的士新聞資訊」，我係Hayley，文遠知行(WRDUS)最近更新聆訊後資料集，意味着成功通過港交所聆訊，有望成為Robotaxi港股。根據最新招股書，目前文遠知行業務佈局覆蓋11個國家、30個以上嘅城市，是全球唯一旗下產品擁有7個國家自動駕駛牌照的科技公司。同時，其具備全球最大的L4無人駕駛車隊之一，擁有1,500架以上無人駕駛車輛，其中700架以上為Robotaxi。在中東擁有除中美之外最大嘅Robotaxi車隊，同時都部署在Uber、TXAI等平台上，又起阿拉伯阿布扎比嘅Robotaxi更會朝着純無人化過渡。文遠知行已於2024年10月25日在納斯達克上市，成為全球通用自動駕駛Robotaxi股之一。起營收方面，根據文遠知行2025年第二季度財報，第二季度公司營收1.27億元，按年增長60.8%。


另外一個競爭對手，中國無人駕駛龍頭企業小馬智行(PONY.US)同樣正式通過港交所聆訊，即將踏入港股市場。小馬智行招股書顯示，公司2022年至2024年營收規模持續擴大，2025年上半年增速尤為明顯，尤其是Robotaxi業務收入在2025年上半年達325.6萬美元。小馬智行亦於起2024年11月在納斯達克完成上市，成為另一個全球Robotaxi股。小馬智行與汽車生產商Stellantis達成合作協議，共同為歐洲市場開發L4級自動駕駛汽車，以推動歐洲Robotaxi發展。 雙方初期將以輕型商用車(LCV)為主，未來數月內於盧森堡部署標緻Peugeot E-Traveler車型測試，並計劃明年開始在歐洲廣泛推廣。Stellantis無人駕駛就緒平台專為L4級無人駕駛能力而設計，這確保其在無人駕駛操作下符合最高安全性和可靠性標準。結合小馬智行的無人駕駛技術，將協助開發新一代智能永續交通出行解決方案。


國內Robotaxi業務發展來勢洶洶，加埋明年網約車正式投入服務，相信未來對香港傳統的士業有著重大嘅挑戰，我哋香港的士交易所會密切留意Robotaxi同埋網約車，兩大戰場嘅最新消息，一有最新消息會同大家分析和報導。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App 「HKTEx一站式的士買賣租賃平台」，密切留意我哋香港的士交易所，我哋下集見。


Hayley

香港的士交易所 HKTEx 主播

2025年10月20日




 
 

的士牌市場資訊【2025年第三季的士牌價走勢分析】

已更新：2025年10月16日


大家好，我係Eva, 今年由年頭至今，有關的士嘅話題可以話係源源不絕，例如網約車規管立法、的士筆試大改造、的士車隊陸續投入服務等等，每個話題都引發起坊間熱烈討論，我哋就趁住踏入第四季，同大家睇吓的士牌價喺二零二五年頭三季嘅表現，我哋今集就會同大家睇一睇有關嘅數據，無論你係車主又或者係準買家，都希望你可以籍住呢條片掌握到最新嘅市況，如果未訂閱我哋頻道嘅朋友，記得訂閱，多謝支持。


我哋可以先睇一睇今年二零二五年頭三季嘅的士牌價走勢圖表，我哋睇到整體嘅情況都唔係咁樂觀，我哋就以市區的士牌價為例，由年頭HK$285萬下跌至9月尾232萬，下跌咗HK$53萬，跌幅接近兩成，大約下跌咗18.6%；至於新界的士牌價都同樣下跌，由年頭HK$205萬下跌至9月尾HK$146萬，下跌咗HK$59萬，跌幅係比起市區的士牌價更大，係跌超過兩成半以上，跌咗大約28.8%，我哋再睇吓過往十年的士牌價嘅走勢表現，同樣係非常唔樂觀，以市區的士牌價為例，起2017年年頭最高點HK$667萬，跌到去今年2025年6月嘅十年低位HK$199萬，跌咗HK$468萬，足足跌超過七成，跌咗大約70.2%。


我哋集中睇返今年2025年第三季嘅表現，你就會發現其實的士牌價係開始有少許回穩嘅跡象，我哋就以市區的士牌價為例，由7月頭HK$199萬，之後幾個月上落格局去到9月尾HK$232萬，3個月內升咗HK$33萬，大約升咗16.4%。其實呢幾個月當中都有唔少關於的士業界嘅消息，先有運輸署起7月向餘下嘅4支的士車隊發放正式牌照，意味著全部5支車隊已經正式全面投入服務。5支車隊包括有泰和車行經營嘅「JOIE樂行」，忠誠車行嘅「星群的士」，由GoGoX、城市汽車集團合資營運CMG Fleet嘅「Amigo」；由新科發展國際及多名的士司機從業員總會理事營運嘅「大黃蜂」，以及香港的士小巴商總會理事長陳洲參與營運嘅「Big Boss Taxi」 。所有車隊均提供網約服務，乘客可透過車隊的手機應用程式或其他網約渠道預約行程。車隊亦有提供客戶服務熱線，以處理乘客查詢及投訴。另外，所有車隊的士均提供多項電子支付方式，並配置安全設備，包括行車記錄儀、車廂攝錄機及全球衞星導航系統，以及司機監察系統等，以便利乘客及確保駕駛安全。另外，網約車規管法例條例草案出爐，於九月中起立法會首讀，並準備會起本月中後恢復條例草案的二讀辯論。


以上嘅唔同因素都係有助的士行業可以健康發展，長遠亦都有助提升的士牌嘅自身價值，但係點解的士牌價喺第三季又冇更進取嘅升勢？我估最主要嘅原因在於香港經歷幾年疫情重創，經濟陷入蕭條，即使疫後曾出現過一段「小陽春」，不過都對香港整體經濟無乜顯著幫助。加上呢一年地緣政治風險增加，令到更多投資者入市更審慎。仲有最主要原因，網約白牌車嘅問題仍未徹底解決，網約車數量需要研究討論。若果最終網約車發牌數量龐大，有可能會長遠影響到傳統的士平台嘅生存空間。所以呢幾方面就令到的士牌嘅價值仍然存在不確定性，導致牌價未有回升嘅主要原因。


如果要講到最近最值得大家留意嘅消息就係，喺啱啱嘅10月初，美國聯儲局發布上月嘅議息會議紀錄，紀錄顯示大多數官員認為，起今年剩餘嘅時間裡面有進一步嘅放鬆政策，亦都意味住新一輪減息周期再次來臨 。但有一些政策制定者指出，從若干指標嚟睇，有必要採取謹慎嘅態度。根據9月份的會議，與會者中有10人認為，預計今年還會再減息兩次，各減息0.25%；另有9人認為應該會減息一次或更少。聯邦公開市場委員會FOMC（Federal Open Market Committee）通過將基準利率下調0.25%，但美國總統特朗普新任命的聯儲局理事米蘭（Stephen Miran）投反對票，認為9月應該減息0.5%。就現時香港嘅匯豐銀行嘅最優惠利率5.125%，如果未來進一步減息，會令到的士嘅按揭貸款成本降低，令車主嘅供款壓力減低。另外，減息亦都會令市場上嘅資金去尋找更高回報嘅資產，隨著全球經濟與政治前景的不確定性加劇，投資者尋求將資金投入更安全的避風港。相信以的士牌現時有大約10%嘅租金年回報，亦算係一個搵食自用嘅選擇之一。大家可以密切留意的士牌價嘅發展，一有最新消息我哋會第一時間同大家報導。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App『HKTEx 一站式的士買賣租賃平台』，密切留意我哋香港的士交易所，我哋下集見。


Eva

香港的士交易所 HKTEx 主播

2025年10月15日




 
 

專題探討【的士筆試大改造】


大家好，我係Eva，運輸署由今年11月起將會調整的士筆試，起維持評估水平嘅同時，會做到更切合的士業界嘅實際運作需要。的士業界普遍表示歡迎，並建議加強職前培訓課程，吸引年輕人入行。今次嘅的士筆試大改造會唔會，為想入的士行業嘅司機帶來新嘅挑戰呢？今集就會同大家講解呢方面嘅情況，未訂閱我哋嘅朋友記得訂閱，多謝支持。


以往的士筆試主要考核司機對的士營運規例、主要路線同地點，過往考生幾乎要記熟全港大街小巷，加上仲要熟悉《道路使用者守則》等實務知識嘅掌握。不過除住時代改變，政府為咗與時並進，運輸署經過全面檢討考核安排後，將由今年11月3日起，將有關考試內容調整，整體試題數目由90條減至75條。


運輸署宣布調整部份包括，第一，將現時甲部份嘅「的士則例」同乙部份嘅「地方及路線試題」合併成為全新甲部份，叫做「的士營運」。主要考核的士司機嘅實務知識，包括相關法規及基本地方知識；第二， 現有丙部份嘅《道路使用者守則》取代為新嘅乙部份試題，仍然係繼續考核對《守則》嘅認識。


運輸署考慮到現時的導航科技已經能夠協助的士司機快速尋找目的地，以及規劃最佳行駛路線，新嘅的士筆試會大幅減少，同埋簡化有關著名地標同路線識別嘅試題，而試題庫亦會更新，令考核能更切合實務需要，同時又會確保通過考核嘅考生具備的士司機所需要嘅專業知識同行業素養，對主要道路網絡同經常到嘅地點有基本認知同掌握。另外會加入一啲新試題，例如的士車隊制度、違例記分制等等有關服務質素嘅新措施。


的士業界對新嘅筆試改革表示歡迎，認為可以將部分考核內容改為職前培訓課程，有助降低入行門檻。


的士車巷車主協會永遠會長吳坤成指出，起運輸署考取的士司機資格，覺得應該從一個比較簡易嘅形式畀佢哋知道好容易入行，俾佢哋覺得考呢個試並唔係想像中咁困難先。有啲情況起職前課程上補習，俾司機考試前再考一個簡單嘅筆試，吳坤成覺得呢個做法比較好一啲。


運輸署從2020年2月更新同調整筆試試題內容，的士牌照應考人數由2019年不足一萬人，增至去年1萬4千人，成功吸引更多人報考的士筆試。另外，的士筆試嘅合格率亦由2019年不足四成，增至六成。反映出優化咗嘅的士筆試喺對吸引新人投身的士司機行業有相當正面嘅作用。


運輸署又有諮詢的士服務質素委員會，希望做到跨專業、跨界別。當中包括的士業界嘅成員，並會向的士業界發信，介紹新的士筆試嘅考核範圍。署方會陸續向考生派發新嘅《的士筆試指引》以及《的士營運小冊子》，考生稍後亦可以參閱運輸署網頁。


總括嚟講，香港政府嘗試盡力為的士業界提升形象，至於簡化的士筆試係咪能夠吸引更多新人入行，仍然係未知。原因都仲要睇的士車隊未來發展成點，同埋將會面世嘅網約車平台，最終會發出幾多個牌照。如果網約車發牌數量龐大，即使的士司機入職門檻再幾簡單，都有可能未必吸引到更多新人入行。


唔知你對以上內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 『HKTEx 一站式的士買賣租賃平台』，密切留意我哋香港的士交易所，我哋下集見。


Eva

香港的士交易所 HKTEx 主播

2025年10月6日




 
 
12131516
bottom of page