top of page

最新市場動態

【的士末日？「蘿蔔快跑」進軍香港！】｜無人駕駛的士｜網約車｜網約車牌照｜的士牌｜的士牌價｜自動駕駛


大家好，我係Olivia，最近有傳媒引述消息指出，無人駕駛的士「蘿蔔快跑」有意進軍香港，隨住科技嘅進步，無人駕駛技術已經逐漸成熟，特別係喺中國內地，「蘿蔔快跑」已經喺多個城市成功營運，而家佢哋計劃喺香港展開營運測試，呢個消息引起咗唔少的士業界同市民嘅關注，大家都紛紛討論到底呢個情況會唔會引發起「的士末日」呢？今集就會同大家簡單分析呢方面嘅情況，未訂閱我哋嘅朋友記得訂閱，多謝支持。


「蘿蔔快跑」係百度旗下嘅自動駕駛出行服務平台，喺2019年成立，主要目標係利用先進嘅自動駕駛技術，提供安全、方便快捷嘅出行服務，佢哋已經喺中國內地多個城市例如北京、上海、武漢等地成功營運，並且建立咗大量而穩定嘅用戶基礎，根據傳媒報導嘅最新消息，「蘿蔔快跑」早前已經向香港運輸署提交咗「自動駕駛測試先導牌照」同「自動車證書」嘅申請，而運輸署最近亦宣布已經批核有關嘅申請，運輸署表示會嚴格把關，以有序同安全嘅形式推動自動駕駛喺香港進行測試，根據消息指出，「蘿蔔快跑」將會喺今個月正式開始進行首階段嘅測試，預計測試範圍會喺北大嶼山區域香港機場一帶嘅特定路段，喺非繁忙時間進行測試，期間車上駕駛位置會有後備操作員全程監察自動駕駛嘅情況，以備不時之需，百度表示會嚴格跟從香港嘅所有法例嚟進行測試，會滿足每一個階段嘅要求同測試時間，得到運輸署批准之後先會進入下一個測試階段。


如果講到無人駕駛的士「蘿蔔快跑」嘅最大優勢就係佢哋嘅收費比起傳統的士嘅收費平好多，根據內地嘅資料，佢哋提供10公里嘅行程都只需要RMB￥3左右，即係每公里大約只需要RMB￥0.3，而香港傳統的士每公里嘅收費就超過佢哋嘅3倍有多，呢個嘅價格差距可能會吸引到大量嘅傳統的士乘客轉搭無人駕駛的士「蘿蔔快跑」。


另外，「蘿蔔快跑」利用先進嘅自動駕駛技術，提供更高效嘅出行選擇，特別係對於年輕人同科技愛好者嚟講，無人駕駛的士可能會成為一個新嘅潮流，因為無人駕駛的士提供嘅服務體驗新穎，乘客可以透過手機App輕鬆預約，享受自動駕駛帶嚟嘅方便同用戶體驗。


但值得討論嘅重點嚟喇，如果咁樣嘅話，咁到底當無人駕駛的士「蘿蔔快跑」真係正式喺香港營運嘅時候，會唔會引發起傳統的士嘅末日呢？其實呢個問題有一個因素係非常關鍵，就係到底無人駕駛的士「蘿蔔快跑」會以咩嘅牌照營運模式運作？因為講到底，無人駕駛的士「蘿蔔快跑」所提供嘅服務，都係載客取酬嘅點對點交通工具服務，基本上同傳統的士所提供嘅服務冇咩分別，只係無人駕駛的士「蘿蔔快跑」只係可以以網約嘅方法Call車，屬於網約車嘅一種，而本港政府而家亦都正喺度研究緊修例規管網約車平台，所以到底無人駕駛的士「蘿蔔快跑」會以網約車牌照形式營運定係會以傳統的士牌照形式營運仲係未知之數，因為呢個係會直接影響好多其他引發傳統的士末日嘅因素。


假設如果無人駕駛的士「蘿蔔快跑」最終係以網約車牌照形式營運，咁佢嘅數量就會直接影響到傳統的士嘅生意，佢哋推出嘅數量有幾多架無人駕駛的士，市面上就會多出咗幾多架車同傳統的士爭生意，如果數量係冇限制嘅話，更加會加速令傳統的士業推到淘汰邊緣。


另外，如果無人駕駛的士「蘿蔔快跑」唔係以傳統的士牌照形式營運，佢哋嘅收費模式就會同傳統的士唔同，唔會受到限制同監管，而無人駕駛的士嘅最大優勢正正就係佢哋唔需要司機嘅人力成本，所以收費可以好平，吸引到大量乘客選搭，而且更加可以無間斷24小時運作，咁樣係會直接搶走傳統的士嘅生意，令的士司機飯碗不保。


總括嚟講，無人駕駛的士「蘿蔔快跑」有意進軍香港，無疑係會對香港嘅的士市場帶嚟一定嘅衝擊同影響，但究竟會唔會導致「的士末日」正式來臨，仲有待觀察情況，雖然自動駕駛技術發展迅速，但現階段仍然需要一段時間去進一步嘅測試同完善，相信無人駕駛的士要完全取代傳統的士係需要好長嘅時間，隨住科技嘅發展同市場競爭嘅加劇，乘客將會有更多嘅出行工具選擇，而傳統的士業而家最重要嘅工作就係需要重新思考佢哋嘅服務模式，以應對市場嘅變化，需要不斷提升服務質素之餘，更加要考慮提供更加多嘅附加服務以吸引乘客，咁樣先可以能夠喺呢個新時代中生存落去。


希望大家睇完呢集之後會對無人駕駛的士同傳統的士業有更深入嘅了解，嚟緊我哋會繼續關注「蘿蔔快跑」喺香港嘅發展情況，唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2024年11月29日


P.S.：詳細短片版本請於YouTube上收看：https://youtu.be/5mOdmpLcE60


理財致富系列【有錢人唔會做嘅8件事】想致富就唔好咁做


大家好，我係Teresa，喺追求財富嘅旅程中，好多人經常忽略咗一啲重要嘅行為模式，窮人同有錢人之間嘅分別，往往體現喺佢哋嘅思維方式同日常選擇中，以下係八件窮人常做但有錢人唔會做嘅事，希望可以幫你喺致富嘅路上走少啲冤枉路，未訂閱我哋頻道嘅朋友，記得訂閱，多謝支持！


第一，「買即時滿足嘅商品」，窮人往往容易被即時滿足嘅誘惑吸引，例如最新嘅電子產品或者奢侈品，有錢人就更加傾向於投資，將資金用喺可以增值嘅項目上面，佢哋明白延遲滿足嘅重要性，肯為長期嘅利益而忍耐短期嘅誘惑。


第二，「過度依賴信用卡」，好多窮人喺財務管理上唔夠謹慎，經常依賴信用卡應付日常嘅開支，呢種習慣唔單止會導致負債累積，仲會影響信貸評級，而有錢人就比較注重現金流嘅管理，避免不必要嘅負債，確保能夠準時還款，有良好嘅信貸評級。


第三，「缺乏財務規劃」，窮人往往都唔會制定財務計劃，對自己嘅收入同支出缺乏清晰嘅認知，而有錢人就會定期檢視自己嘅財務狀況，設定具體嘅目標，並且制定計劃嚟實現呢啲目標，佢哋明白，良好嘅財務規劃係致富嘅基石。


第四，「為人哋工作而忽視自我投資」，好多窮人花大量時間為人哋嘅夢想而工作，卻忽視咗對自己嘅投資，而有錢人就會定期投入時間同金錢去提升自己嘅技能同知識，因為佢哋知道咁樣可以增加自己嘅價值。


第五，「過度消費而非創造」，窮人經常將大部分嘅收入用喺消費上面，而唔係創造新嘅收入來源，而有錢人就會尋找多元化嘅收入來源，例如投資股票、投資物業又或者去創業，努力令資金為自己工作。


第六，「環繞喺

」，窮人經常都會被身邊消極嘅人所影響，咁樣會削弱佢哋嘅動力同信心，而有錢人就會選擇同積極向上嘅人來往，咁樣可以激勵自己之餘，亦可以從佢哋嘅成功經歷中學習。


第七，「拒絕學習同改變」，好多窮人對新知識同技能嘅學習都持比較低嘅敏感度，咁樣令佢哋冇辦法適應不斷變化嘅環境，而有錢人就明白持續學習嘅重要性，佢哋會不斷尋求新知識，以適應市場嘅變化，保持競爭力。


第八，「容易放棄」，面對挑戰嘅時候，窮人經常都容易放棄，缺乏堅持嘅毅力，而有錢人就會將挑戰視為成長嘅機會，並持續努力不懈，因為佢哋明白成功往往嚟自於不斷嘗試同堅持。


講到尾，如果想要致富，了解窮人同有錢人之間嘅行為差異係非常重要嘅，我哋應該避免呢啲窮人嘅行為模式，並且學習有錢人嘅成功習慣，咁樣將會令你嘅財富增長更加順利，喺呢條致富嘅路上面持續學習、堅持努力，最終你都可以實現自己嘅財務自由，唔知你對以上嘅內容又有啲咩睇法？歡迎留言，我哋下集見。


Teresa

香港的士交易所 HKTEx 主播 

2024年11月21日

P.S.：詳細短片版本請於YouTube上收看：https://youtu.be/rxibxkk7oqU



2356
bottom of page