top of page

最新市場動態


大家好,歡迎收睇「的士新聞資訊」,我係Hayley,引入的士車隊制度嘅法例,喺上年2023年12月22號已經生效,而運輸署將會打算發出最多5個的士車隊牌照,喺最近就正式接受申請,申請期去到2024年5月31號,政府發言人表示,引入的士車隊制度係希望帶嚟示範同帶頭嘅作用,改變的士行業嘅生態,同時促進車隊之間,以及車隊同非車隊之間嘅良性競爭,從而提升服務水平同行業形象。


運輸署將會透過發牌規管車隊嘅營運同管理,包括車隊規模、車齡、以及車隊持牌人須提供嘅服務,例如必須提供網約的士渠道,同電子支付方法,以及喺車廂內安裝閉路電視系統同提升駕駛安全嘅科技裝置等等,申請牌照嘅車隊,的士車輛喺加入車隊嗰陣時,車齡唔可以超過3年,而喺車隊牌照期內,車齡就唔可以超過十年,至於車隊規模方面,混合或市區的士車隊要有300至1,000架的士,而新界的士車隊就要有100至350架。


申請經運輸署署長批准之後,車隊就可以自己設計車身同標記,可以自訂預約收費模式,包括的士咪錶收費以外另收一筆預約費用,又或者喺行程開始之前同乘客協定嘅車資,而政府亦都會喺官方渠道為車隊宣傳,並且會喺高鐵站、啟德郵輪碼頭、迪士尼等等多個地方設立專屬的士站,政府亦已經喺青衣同大埔物色用地,以短租形式批俾車隊持牌人使用,用作泊車同簡單維修用途,至於車隊管理系統方面,持牌人可以向智慧交通基金管理委員會申請最多1,000萬資助,去研發相關嘅管理系統。


順帶一提,組合的士車隊嘅車輛,係會以現有的士牌照嘅車輛組成,所以市場上係唔會增加咗新嘅的士牌照。


唔知你對以上嘅內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見。 


Hayley

香港的士交易所 HKTEx 主播

2024年4月12日

P.S.:短片版本請於YouTube上收看:https://youtu.be/kBkyN0QJc4s


840 次查看

當你已經用緊我哋香港的士交易所App「HKTEx 一站式的士買賣租賃平台」,搵緊你合適嘅的士售盤或租盤嘅時候,如果你發現暫時未搵到啱你心水嘅的士盤,唔使太過灰心,因為App內有個強大嘅AI功能可以幫到你,無論你係一位買家想搵的士售盤買的士,又或者你係一位司機想搵的士租盤租的士都好,你都可以利用App內特設功能「AI智能提示助理」,去設定你自己嘅心水條件,例如輸入車輛年份、牌子型號、成交價或租金等等,設定好之後,每當App內有用戶放租放售新盤,又或者更新的士盤嘅條件細節嘅時候,系統就會識得自動去根據你嘅心水條件去做配對,如果配對成功,系統會立即發出短訊通知你,確保你唔會錯失咗任何的士筍盤嘅機會,立即入HKTEx App內設定試吓啦!


259 次查看

大家好,歡迎收睇「的士新聞資訊」,我係Olivia,近日電召共乘汽車平台Uber同澳洲的士司機集體訴訟達成咗和解,Uber同意賠償折合約14億港元,係全球嘅首例。


由於多年嚟Uber進入咗澳洲市場,令當地嘅的士業界大受影響,超過8000位的士司機同持牌人士就喺2019年採取咗集體訴訟行動,入稟維多利亞州最高法院,指控Uber喺2012年進入澳洲之後,令佢哋損失大量嘅收入,唔單只破壞咗「要求的士業界必須持有牌照」嘅法律,影響的士牌照價值,而且仲不斷瓜分的士服務嘅利潤。


經過咗五年嘅訴訟,雙方最終達成咗和解,Uber同意向澳洲嘅的士司機同持牌人,賠償超過2.72億澳元,即係折合約14億嘅港元,成為澳洲史上第5高嘅集體訴訟和解金額,亦都成為全球類似賠償嘅首例。


代表的士業界一方嘅首席律師 Michael Donelly 表示,Uber喺呢5年間一直拼命咁反抗,試圖拒絕集體訴訟成員獲得任何形式嘅補救或賠償,律師們又表示,Uber喺澳洲開展業務嗰陣時,採取咗各種令人震驚嘅行為,包括使用冇許可證嘅汽車同未經認可嘅司機。


原訴一方嘅其中一位的士司機 Rod Barton 指出,和解方案證明Uber係故意逃避的士牌照制度,Uber完全明白旗下嘅司機同汽車係需要完整同合法嘅牌照,但佢哋選擇唔依從,而且仲設法取得不利的士業嘅商業優勢。


另一位的士司機 Nick Andrianakis 就指出,當Uber推出服務嘅時候,佢被迫結束經營咗四十年嘅的士業務,佢失去咗工作嘅熱誠,更加失去咗養活家人嘅收入。


其實澳洲嘅的士業制度同香港有啲相似,當地嘅政府通過發出的士牌照嚟控制的士嘅數量,並且允許的士牌可以自由買賣轉讓,而的士司機就需要持有有效嘅認可資格牌照,但係自從Uber喺2012年登陸咗澳洲之後,由於當地冇法例規管呢種新興嘅汽車共乘服務,令到Uber可以喺冇載客牌照嘅情況下經營,結果當局喺2015年修訂法例,允許Uber合法經營,此舉動令的士司機被搶走超過一半嘅生意,再加上新冠疫情嘅衝擊,令的士司機收入大減,連帶拖累的士牌價都大跌,以布里斯本為例,的士牌價由2014年高峰期超過50萬澳元,大跌至2021年只有大約1萬澳元,呢個時候澳洲多個州政府亦都有向的士牌嘅持有人作出咗財政支援。


Uber今次喺澳洲向受影響的士司機、車行及車主作出大額和解賠償,反映Uber亦認同自己嘅違規經營係直接破壞緊的士行業原有嘅公平制度,亦都破壞咗的士牌照原有嘅價值,呢次訴訟和解某程度上俾咗的士業界好大嘅鼓舞,但情況未必適用於香港,因為香港暫時仲未有集體訴訟嘅法例,而且如果要同Uber進行漫長嘅官司訴訟需要有足夠嘅財力先可以實行,以單一嘅訴訟喺實行上比較困難。


唔知你對以上嘅內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台」,密切留意我哋香港的士交易所,我哋下集見。


Olivia

香港的士交易所 HKTEx 主播

2024年3月18日

P.S.:短片版本請於YouTube上收看:https://youtu.be/JHnDVby1idc


402 次查看
bottom of page