top of page

最新市場動態


大家好,我係Olivia,啱啱公佈嘅最新一份施政報告再次力推「數字政府」,內容指出香港政府收費服務一年內會全面落實電子支付,但實際呢個情況係已經慢過內地同其他國家地區好多,尤其係同市民息息相關嘅公共交通工具,佢哋嘅電子支付方式仍然相當落後,特別係的士。


有人會咁樣形容,現時要喺香港搭的士如果冇現金喺手,幾乎等於搭唔到的士,雖然有少部分嘅的士係設有電子支付,不過數量真係唔多,如果全香港嘅的士都可以俾乘客用電子支付,相信大部分嘅乘客都會贊成,有乘客接受傳媒訪問嗰陣表示,只能夠用現金俾的士車費會覺得好唔方便,散銀找續會比較麻煩,試過身上唔夠現金俾的士車費,搞到要的士司機等自己上樓拎錢,另外,亦有內地旅客表示,非常贊成香港嘅的士推行電子支付方式,認為內地都已經盛行電子支付,搭的士基本上都可以用微信支付。


立法會議員嚴剛最近去信立法會交通事務委員會建議政府盡快推動修例,強制要求全港嘅的士安裝電子支付系統,佢接受傳媒訪問嗰陣表示,喺內地嘅的士已經廣泛使用電子支付,而海外好多國家嘅的士亦都可以用信用卡付款,只係香港到而家都仲係用緊最原始嘅現金找數方式,為咗消除遊客嚟香港要用現金搭交通工具所引致嘅唔方便,佢建議政府盡快修訂相關條例,強制要求全港嘅的士安裝電子支付系統。


另外,的士車行車主協會永遠會長吳坤成就表示,有好多年紀比較大嘅司機覺得電子支付系統比較複雜,佢認為政府應該要有指引,甚至政策上嘅補貼,例如派發石油氣券或幫補燃料費等等嚟鼓勵司機用電子支付,自然就會有人帶頭使用支付系統,吳坤成又認為,政府應該要有鮮明啲嘅政策,更多元化咁推動電子支付,例如鼓勵開發商去開發新嘅電子支付系統,令交易程序變得更簡單。


其實香港發展電子支付並唔算得上落後,只係香港人喺呢二十幾年嚟都慣咗用八達通,但係有一樣嘢唔可以唔承認,香港喺的士電子支付嘅層面上面確實有啲落後,的士業界同電子支付系統公司都不斷努力發展同改進緊,例如喺Call的士App內增加更多嘅電子支付方法,另外亦都有開發商開發的士專用嘅電子支付系統等等,希望日後乘客能夠更方便咁支付的士車費。


咁今集就同大家講到呢一度,唔知你對以上內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台,密切留意我哋香港的士交易所,我哋下集見。


Olivia

香港的士交易所 HKTEx 主播

2023年11月1日

P.S.:短片版本請於YouTube上收看:https://youtu.be/Dgq4p4Ksro4


196 次查看

大家好,歡迎收睇每星期嘅「的士牌市場資訊」,我係Mia,如果一直有留意開的士牌價嘅朋友,都應該知道最近的士牌價係有輕微嘅回升,就以今日10月30號最新嘅的士牌參考牌價,市區的士牌價368萬,新界的士牌價308萬,我哋就以市區的士牌價為例,比起8月份最低位嘅參考牌價353萬,上升咗15萬,大約升咗4.2%。


其實,如果我哋睇返過往十年嘅的士牌價走勢圖我哋可以睇到,現時嘅的士牌價正正處於十年嘅低位,由2015年年中開始就不斷尋底,的士牌價受到多方面嘅影響,例如白牌車嘅競爭,疫情嘅影響,銀行加息嘅情況,高昂保費嘅壓力等等,所以牌價下行壓力都仍然存在,不過又咁講,的士牌呢種資產,可以自行營運賺錢,亦都可以出租收取回報,自然吸引到投資者去持有,以現時一架市區的士全新混能車為例,佢嘅租金年回報大約有6.4厘,當然要留意嘅係呢個回報率係未扣除任何成本支出嘅,咁到底個牌價要去到咩價錢先叫合理呢?


另外,如果你想捕捉低位入市,你可以利用我哋HKTEx App嘅獨家功能「AI智能提示助理」去設定你自己嘅心水牌價,只需要簡單幾個步驟就可以設定好,之後只要App內有新嘅放盤又或者更新盤嘅交易條款係符合你嘅心水條件,系統就會自動配對,即刻通知你,等你可以把握到最好嘅入市時機,大家可以不妨試吓。


咁今集就同大家講到呢一度,唔知你覺得的士牌價要去到咩價錢先叫合理呢?歡迎留言分享你嘅睇法,繼續密切留意我哋香港的士交易所,我哋下集見。


Mia

香港的士交易所 HKTEx 主播

2023年10月30日

P.S.:短片版本請於YouTube上收看:https://youtu.be/5yyStnFiUFQ



747 次查看


大家好,歡迎收睇「的士新聞資訊」,我係Olivia,啱啱公佈嘅最新一份施政報告提出多項海陸空交通綠色運輸措施,當中為咗推動的士業界轉型電動的士,政府提出預留5000萬資助業界購買可以提供輪椅上落嘅電動的士,消息指呢一筆資助係會以津貼形式發放,另外,當局早前宣布會調整油站土地契約條款,去推動油站加裝電動車充電設施,施政報告指出,下年首季當局將會為兩幅嘅空置油站用地轉為充電站招標,據知兩幅用地分別位於九龍東同火炭,而全港現時有180個油站,消息人士預計日後油站會轉型,可提供至少過百座充電器,為咗鼓勵業界轉型電動的士,油站充電器或會優先提供俾的士使用,並且研究規管的士充電收費水平,設立收費上限又或者為業界提供津貼等等。


政府喺上年2月嘅財政預算案提出為的士業界提供上限35萬百分百擔保嘅貸款計劃,以鼓勵業界轉型電動的士,當時當局話全港有2部電動的士營運緊,而貸款計劃上個月正式推出,消息透露,本港現時營運緊嘅純電動的士唔夠10部。


政府嘅消息人士形容,一架的士每日平均行走400公里,充電需求大,加上業界期望喺交更時間內可以完成充電,所以政府為的士業界提供充電器嘅工作有好大嘅挑戰,當局今年內會向油站營運商提供加裝充電器嘅營運要求資料,開放俾營運商自行申請,消息又指出,當局會積極研究油站內可唔可以提供飲食﹐俾的士司機可以善用等候充電時嘅時間。


至於整體嘅充電設施,報告指出政府目標喺2027年中前將香港公共同私人充電停車位嘅總數提升到大約20萬個,而下年上半年政府會制訂全港公共巴士同的士嘅綠色轉型路線圖同時間表。


咁今集就同大家講到呢一度,唔知你對以上嘅內容又有啲咩睇法,歡迎留言,如果想了解更多最新嘅的士牌資訊,歡迎下載我哋嘅App「HKTEx 一站式的士買賣租賃平台,密切留意我哋香港的士交易所,我哋下集見。


Olivia

香港的士交易所 HKTEx 主播

2023年10月25日

P.S.:短片版本請於YouTube上收看:https://youtu.be/OjILcyriGa0



345 次查看
bottom of page