大家好，我係Olivia，喺上一集，我哋就同大家回顧咗2023年的士牌價嘅走勢，同埋展望一吓嚟緊2024年的士牌價嘅情況，如果未睇上一集嘅朋友可以去我哋嘅頻道重溫返先，至於今集就主要同大家睇一睇上年2023年的士過戶數量嘅統計數字，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。
我哋可以先睇一睇上年2023年嘅的士牌價走勢圖表，基本上如果有留意開我哋頻道嘅朋友都知道，的士牌價喺2023年嘅表現確實唔係咁理想，我哋就以市區的士牌價為例，由年頭441萬下跌至年尾357萬，全年下跌咗84萬，跌幅大約19%，咁到底2023年的士嘅過戶數量又係唔係跟住牌價咁不斷萎縮呢？我哋再睇一睇2023年運輸署嘅的士過戶數量，根據運輸署俾我哋嘅官方數字睇得到，上年頭9個月，市區的士嘅過戶數量差唔多每個月都有所上升，1月份嘅過戶數量有119宗，而9月份嘅過戶數量就有198宗，升幅超過6成，其實頭三季都出現咗「量升價跌」嘅現象，但到咗10月份開始，過戶量就有明顯嘅回落，就以市區的士為例，12月份嘅過戶數量就只有124宗，比起9月份嘅高峰198宗，跌幅超過37%，反映第四季嘅的士買賣活躍程度正喺度下降緊，出現咗「量跌價跌」嘅情況。
咁如果我哋嘗試睇返過往十年嘅的士牌價走勢同的士過戶數量嘅比較，又會係有啲咩現象？我哋先睇一睇過往十年的士牌價走勢圖，喺呢個圖表我哋可以睇得到，現時嘅的士牌價正正處於十年嘅低位，的士牌價由2015年年中開始就不斷尋底，的士牌價受到多方面嘅影響，例如白牌車嘅競爭，疫情嘅影響，銀行加息嘅情況，高昂保費嘅壓力等等，所以牌價下行壓力至今都仍然存在，我哋就以市區的士為例，由2015年年中最高峰723萬，下跌至今年2024年年頭357萬，下跌咗366萬，下跌超過5成，咁到底的士過戶數量喺呢十年期間又出現咗咩情況？根據運輸署俾我哋嘅官方數字睇得到，近十年的士過戶數量最高峰時期正正都係喺2015年嘅時候，以市區的士為例，當年全年錄得2807宗過戶，但近年嘅的士過戶數量趨勢都有所回落，喺啱啱過去咗嘅2023年，市區的士全年嘅過戶數量就只有1883宗，比起2015年高峰時期下跌超過3成，喺近呢八年間，無論的士牌價同過戶數量都有所下跌，從趨勢上嚟睇，的士買賣市場嘅活躍程度確實有所萎縮。
咁到底的士牌嘅投資價值會唔會有逆轉嘅可能？定係會繼續萎縮？其實關鍵好睇市場上的士生意嘅營運情況會唔會得以改善，例如競爭環境、服務質素同開支成本等等，咁當然都好睇香港嘅整體經濟環境會唔會有所好轉，我哋不妨繼續密切留意市場發展。
唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Olivia
香港的士交易所 HKTEx 主播
2024年1月24日
P.S.：短片版本請於YouTube上收看：https://youtu.be/hZ01A2haQTg