top of page

的士牌市場資訊【2026年第一季的士牌價走勢分析】


大家好，我係Eva，如果有留意開的士牌嘅朋友都應該知道，的士牌價喺上年2025年嘅表現確實唔係咁理想，以市區的士牌價為例，上年全年下跌咗大約兩成半以上，咁到底今年2026年頭一季嘅表現又係點呢？我哋今集就會同大家睇一睇有關嘅數據，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。


我哋可以先睇一睇今年2026年第一季嘅的士牌價走勢圖表，我哋睇到市區的士狀況比新界的士好，有回穩跡象。我哋就以市區的士牌價為例，由年頭216萬上升至3月尾219萬，上升咗3萬，升幅大約1.39%。至於新界的士牌價就繼續下跌，由年頭140萬下跌至3月尾137萬，下跌咗3萬，跌幅大約2.14%。


咁至於的士過戶數量喺2026年第一季嘅表現，又會唔會好似的士牌價咁出現回穩，情況又理唔理想呢？我哋先睇一睇今年2026年頭一季運輸署嘅的士過戶數量，根據運輸署俾我哋嘅官方數字睇得到，以市區的士為例，喺2026年頭一季每月嘅過戶數量，維持喺104至171宗，實際呢個數字比較起上年2025年同期嘅數字都有所下跌。如果我哋嘗試睇返由上年2025年年頭至今嘅的士過戶數量就會見得到，今年2026年頭一季嘅的士過戶數量表現其實都算唔算好理想，交投相對淡靜，自然造成牌價回升速度緩慢。


其實最值得關注就係本身的士生意嘅情況係點，呢方面我哋可以睇吓運輸署最新嘅官方數據，平均每日公共交通乘客人次趨勢，最新只係顯示截至1月份嘅數據，喺呢個圖表我哋可以見得到，乘客人次趨勢喺近期都有所回升，1月份嘅平均每日乘客人次已經回升到接近1200萬嘅水平，相信的士嘅生意大致上已經回復到疫情前8成以上。有可能喺香港政府近排積極推動「盛事經濟」，長遠有助改善香港旅遊業的情況，令的士生意額會有所提升。


至於的士營運方面，由於受美伊戰爭所影響，油價急升，導致的士營運成本有所增加，的士司機面對沉重的經營壓力。加上的士保費仍然持續高企，影響整體投資氣氛，相信以上幾點都係阻礙的士牌價回升嘅主要因素。


咁到底的士牌有冇啲利好消息存在？當然有啦，首先，的士由4月1日全面電子化，代表傳統的士業進入電子支付數碼時代，有助提升的士生意及乘搭體驗。仲有八達通起4月22日，推出本地版「Call車易」平台，將整合全港五間的士車隊，以及多個網約的士平台，提供多款的士型號服務，即係以後乘客毋須再分別下載唔同的網約車手機應用程式來電召的士。至於今年最值得關注嘅消息就係政府將會公布網約車發牌數量。網約車條例草案由去年10月三讀通過，附屬法例細節預料起今年上半年提交立法會審議，首批持牌平台最快在今年第四季正式營運。這個消息將會直接影響的士牌價走勢，大家一定要密切留意事態嘅發展，一有最新消息我哋會第一時間同大家報導。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App H.K.T.E.x. 一站式的士買賣租賃平台，密切留意我哋香港的士交易所，我哋下集見。


Eva

香港的士交易所 HKTEx 主播

2026年4月23日




bottom of page