大家好，歡迎收睇「的士新聞資訊」，我係Mia，以前長期提供的士保險服務嘅泰加保險喺上年突然「斷保」，的士車主需要另外搵其他保險公司投保，有的士業界人士表示，泰加保險事件之後，的士保費就大幅飆升，由之前每年平均幾千至一萬元，升到而家最少超過3萬，最高嘅更加接近9萬，業界人士認為而家保費已經屬於「癲價」，希望政府介入同保險業界溝通商討，提供誘因令車主積極改善的士嘅安全，減少保費嘅支出，有保險業界人士解釋，的士保費高昂係涉及好多因素，當中包括的士使用時間長，同埋司機老齡化嚴重等等，的士保費每年增加已經困擾業界好多年。
香港的士小巴商總會理事長周國強表示，泰加保險事件之後，而家的士保險由幾間大型嘅保險公司接手，但保費就不斷飆升，續保出現阻滯同拒保嘅情況亦都經常發生，例如當的士發生意外之後，保費就會唔合理咁增加，但係保險業監管局都未能夠阻止，周國強形容行業正處於非常惡劣嘅階段，單係計算每日嘅保險成本就已經接近HK$200，對業界負擔相當沉重，如果情況一直繼續，行業將會毀於一旦，周國強又表示，商會要求政府協助承擔部分嘅保險費用，令到商用公共交通行業可以持續發展，又希望政府可以同保險業界溝通，商討一個可以將保費減低嘅方案，提供誘因令車主積極改善的士嘅安全，達致良性循環，降低保險嘅費用，從而減輕的士從業員嘅負擔，周國強表示業內對保費大增有好大嘅不滿，如果當局唔採取行動，商會將會作出申訴，尋求解決嘅方案。
的士車行車主協會永遠會長吳坤成同樣認為，保費大增對已經少新人入行嘅的士業造成嚴重嘅打擊，形容保費「點只係貴到天價，簡直係貴到癲價」，佢指出，由於而家行業規定，如果乘客乘坐的士遇到交通意外受傷，保險賠償係由車輛嘅保單負責，令保費更加高，吳坤成表示，見過有部分乘客誇大傷勢，本身只係好輕微擦傷條頸，結果就話傷到骨，又同保險公司申報好多賠償，佢促請政府同運輸署出手，增設由政府提供嘅專門驗傷中心，減少乘客誇大傷勢，加重的士保費嘅情況出現。
香港進出口汽車商會會長兼國際專業保險諮詢協會會長羅少雄指，而家本港有超過70幾間保險公司，但只有唔超過10間保險公司願意承包的士保險嘅業務，導致的士保費嘅價錢比起私家車同旅遊保險等高出唔少，加上本港的士嘅數量比起私家車少，市場較細，辦理相關業務嘅公司少，所以的士保費向下調整嘅空間唔多，再加上的士司機老齡化，工作壓力大，工作時間長，以及的士分早夜更運作，幾乎全日都喺度行駛，保險公司認為事故發生嘅比率會相應增加，呢啲都係保費高昂嘅原因，佢希望可以有更多嘅保險公司承辦的士保險嘅業務，令到的士保費有下調嘅空間。
咁今集就同大家講到呢一度，唔知你對的士保費又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。
Mia
香港的士交易所 HKTEx 主播
2023年9月7日
P.S.：短片版本請於YouTube上收看：https://youtu.be/efk9_g1WJy0
#的士保險 #的士保費 #香港的士小巴商總會 #保險業 #的士車主 #天價保險 #的士意外 #交通意外 #保險業監管局 #HKTEx #香港的士交易所 #HKTExApp #一站式的士買賣租賃平台 #的士新聞資訊 #新聞 #港聞 #女主播