top of page

最新市場動態

的士牌市場資訊【市區的士按揭例子】2023年10月16日


大家好，歡迎收睇每星期嘅「的士牌市場資訊」，我係Mia，今日同大家睇一睇最新嘅的士按揭資訊，了解一下如果現時購買一個市區的士牌連一架全新混能的士，到底首期係幾多，月供幾多錢，收租回報又係幾多。


我哋睇一睇以下呢個例子，我哋假設經買賣雙方議價之後，市區的士嘅成交牌價係372萬，而一架全新混能市區的士嘅車價係41萬全包，包首年全保保險同埋包首年牌費，另外車Cam咪錶都包晒，即係一架已經可以即時開工嘅的士，咁佢嘅成交價就係372萬加41萬，即係413萬。


我哋再以現時銀行提供嘅按揭貸款計劃嚟做計算，以全新市區混能的士為例，銀行按揭貸款金額最高大約可以借到330萬，計返嘅話，大約係成交價嘅8成，咁以首期嚟講，以呢個例子嚟計算，就大約只需要83萬。


至於呢個按揭例子係做緊H按，係會以三個月嘅銀行同業拆息嚟做計算，個按揭利率係H加2.3，封頂位係P減1，而今日10月16號，銀行嘅三個月同業拆息H係5.23%，最優惠利率P係6.125%，因為以呢個例子睇，H加2.3係已經觸及到封頂位，所以就會以P減1嚟做計算，按揭利率即係5.125%，按揭年期最高可以做到三十年，360期，經過計算之後，月供就大約係HK$17,900，如果車主係將架車交俾我哋管理嘅話，我哋香港的士交易所提供全新市區混能的士嘅每月託管保證租金係HK$21,400，當中已經包晒所有日常基本維修保養，即係包括晒換呔、換偈油、換擋風玻璃等等。


我哋最後再同大家計埋個租金年回報，以成個資產價值413萬嚟計，佢個租金年回報大約有6.2厘。


最後都要補充一句，要提提大家，記住的士牌價，同埋銀行按揭利率，每日都有機會唔同，我哋提供以上呢個例子，都盡量反映返最新嘅資訊，如果當你打算想購買的士牌嘅時候，歡迎下載我哋嘅App「HKTEX 一站式的士買賣租賃平台」，了解返最新嘅的士牌參考牌價同埋銀行嘅按揭利率資訊，密切留意我哋香港的士交易所，我哋下集見。


Mia

香港的士交易所 HKTEx 主播

2023年10月16日

P.S.：短片版本請於YouTube上收看：https://youtu.be/0aZr6A0bCOI



 
 

【突發】Uber聯同HKTaxi推「按錶收費的士」大家點睇？

已更新：2023年10月11日



大家好，我係Olivia，Uber喺2021年收購咗HKTaxi後，最近宣布聯同HKTaxi合作，喺2023年10月9號開始，Uber App將會加入「按錶收費的士」嘅行程選項，即係乘客可以喺Uber App內Call的士嗰陣按實際乘客坐緊嗰架的士上嘅咪錶去計算收費，而呢個功能將會額外連接去HKTaxi提供俾的士司機接單。


Uber香港區總經理鍾志霆表示，HKTaxi係使用「搶單」機制，司機需要自行爭取訂單，而Uber App就係用「派單」形式，通過系統派單俾最合適嘅司機，喺新增嘅功能之下現時嘅HKTaxi司機係無需要重新喺Uber App內登記，乘客喺Uber App內選擇咗「按錶收費的士」之後，訂單將會連結去到HKTaxi嘅應用程式俾的士司機「搶單」，完成車程之後乘客可以經Uber App用電子支付俾車費，鍾志霆又表示，HKTaxi同Uber將會繼續以兩個獨立嘅應用程式運作，無意將兩個App合併為一。


其實早喺上年2022年5月份左右，Uber App都曾經推出過「按錶收費的士」嘅乘車試行計劃，當時我哋香港的士交易所都有出過片同大家討論過佢合唔合法嘅問題，如果未睇過嘅朋友可以去我哋個Channel重溫返先，而今次重新正式推出呢個「按錶收費的士」嘅計劃，係聯同佢哋收購返嚟嘅本地Call的士App HKTaxi去推行，情況上同上次係有啲唔同，但值得留意嘅係雖然Uber新增咗呢個「按錶收費的士」嘅行程選項，但原有嘅「包車不按錶收費的士」同埋其他「Uber白牌車」嘅行程選項都仍然存在俾乘客選用，一個App集合咗「合法」、「灰色地帶」同「非法白牌車」嘅Call車服務喺法律嘅原則上係唔可以接受。


如果你只係一位乘客，唔好以為只要有乘車優惠同Call車方便，其他嘢都唔關你事，但事實上，Uber App咁嘅情況，係會令乘客誤以為所有Call車服務都係合法，但萬一遇上交通意外嗰陣乘客同司機都未必得到合理嘅保障。


至於如果你係一位的士司機，唔好以為只要可以接多啲單，唔理背後公司嘅營運理念同抽佣抽幾多，其實Uber嘅出現，實際已經破壞緊整個的士事業嘅生態，剝削的士司機利益嘅同時，更加引發起行內混亂同不公平競爭。


講到尾，利用科技提供網約的士服務一定係大勢所趨，但係我哋都好希望香港可以發展到一個獨立統一嘅正價Call的士App，乘客方便Call車之餘，司機更加可以免費使用，咁樣的士業界先可以健康發展。


咁今集就同大家講到呢一度，唔知你對以上內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見！


Olivia

香港的士交易所 HKTEx 主播

2023年10月6日

P.S.：短片版本請於YouTube上收看：https://youtu.be/ah2K1JHp2dg


 
 

的士新聞資訊【的士司機記分制度重疊 建議統一Call車App】2023年10月2日


大家好，歡迎收睇「的士新聞資訊」，我係Mia，由於的士嘅服務質素問題經常被受關注，當局建議引入「的士司機違例記分制」加強阻嚇，的士司機如果觸犯濫收車資、拒載等等嘅罪行將會被扣分，兩年內罰滿15分將會停牌3至6個月。


香港的士業議會主席黃卓邦出席電台節目表示，新嘅記分制度，同現時違例駕駛記分制度相似，擔心會「一罪兩罰」，另外，的士違法行為搜證同執法都非常困難，建議當局統一Call車平台，以科技解決問題，並由政府為所有的士安裝車Cam，有需要嘅時候可以提供俾執法部門取用。


黃卓邦承認，業界濫收車資嘅問題仍然存在，但係喺現行嘅條例上面再增添新嘅記分制係重複累贅，佢認為如果的士司機違例，而過往有部分判決過輕，政府應該提出上訴，加重罰款同刑期，從而加強阻嚇力，黃卓邦又指出，業界嘅違法行為舉證困難，更加存在咗灰色地帶，如果司機冇採用最直接而可行嘅路線駛往目的地則屬違法，但係點為之「最直接可行嘅路綫」就冇任何定義，業界反映希望政府能夠建立一個統一嘅Call車平台，乘客透過平台Call車，司機亦可以經平台獲取到清晰嘅路線指引，黃卓邦認為，相關嘅Call車平台係唔應該百花齊放，否則配對率同有效性都會相當低。


另外，為咗避免司機同乘客爭執嗰陣時「口同鼻拗」，黃卓邦認為，的士有必要安裝車Cam，內存資料可以提供證據，保障雙方，希望政府可以提供資助安裝，不過，佢認為相關嘅片段並唔應該任由司機同乘客下載，建議可以上載到雲端，有需要嘅時候先交由執法部門或者法庭去存取。


交通事務委員會主席議員陳恒鑌就指出，現時的士業界主要倚靠「放蛇」去執法，認為政府如果設立中央平台儲存全部資料，無論濫收車資、拒載、路線爭拗都有所記錄，有助跟進同搜證，政府喺今年7月已經就相關嘅草案刊憲，當局指，記分制最快會喺刊憲後9個月生效，等運輸署同的士業界有充足嘅時間準備。


咁今集就同大家講到呢一度，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。


Mia

香港的士交易所 HKTEx 主播

2023年10月2日

P.S.：短片版本請於YouTube上收看：https://youtu.be/wf9XhGJ9twg



 
 
30313334
bottom of page