top of page

最新市場動態

的士新聞資訊【的士司機記分制度重疊 建議統一Call車App】2023年10月2日


大家好，歡迎收睇「的士新聞資訊」，我係Mia，由於的士嘅服務質素問題經常被受關注，當局建議引入「的士司機違例記分制」加強阻嚇，的士司機如果觸犯濫收車資、拒載等等嘅罪行將會被扣分，兩年內罰滿15分將會停牌3至6個月。


香港的士業議會主席黃卓邦出席電台節目表示，新嘅記分制度，同現時違例駕駛記分制度相似，擔心會「一罪兩罰」，另外，的士違法行為搜證同執法都非常困難，建議當局統一Call車平台，以科技解決問題，並由政府為所有的士安裝車Cam，有需要嘅時候可以提供俾執法部門取用。


黃卓邦承認，業界濫收車資嘅問題仍然存在，但係喺現行嘅條例上面再增添新嘅記分制係重複累贅，佢認為如果的士司機違例，而過往有部分判決過輕，政府應該提出上訴，加重罰款同刑期，從而加強阻嚇力，黃卓邦又指出，業界嘅違法行為舉證困難，更加存在咗灰色地帶，如果司機冇採用最直接而可行嘅路線駛往目的地則屬違法，但係點為之「最直接可行嘅路綫」就冇任何定義，業界反映希望政府能夠建立一個統一嘅Call車平台，乘客透過平台Call車，司機亦可以經平台獲取到清晰嘅路線指引，黃卓邦認為，相關嘅Call車平台係唔應該百花齊放，否則配對率同有效性都會相當低。


另外，為咗避免司機同乘客爭執嗰陣時「口同鼻拗」，黃卓邦認為，的士有必要安裝車Cam，內存資料可以提供證據，保障雙方，希望政府可以提供資助安裝，不過，佢認為相關嘅片段並唔應該任由司機同乘客下載，建議可以上載到雲端，有需要嘅時候先交由執法部門或者法庭去存取。


交通事務委員會主席議員陳恒鑌就指出，現時的士業界主要倚靠「放蛇」去執法，認為政府如果設立中央平台儲存全部資料，無論濫收車資、拒載、路線爭拗都有所記錄，有助跟進同搜證，政府喺今年7月已經就相關嘅草案刊憲，當局指，記分制最快會喺刊憲後9個月生效，等運輸署同的士業界有充足嘅時間準備。


咁今集就同大家講到呢一度，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。


Mia

香港的士交易所 HKTEx 主播

2023年10月2日

P.S.：短片版本請於YouTube上收看：https://youtu.be/wf9XhGJ9twg



88 次查看

的士牌市場資訊【過戶量連升4個月】2023年9月26日


大家好，歡迎收睇每星期嘅「的士牌市場資訊」，我係Olivia，的士牌價經歷咗幾個月嘅下跌之後，最近都有上升回穩嘅跡象，以市區的士牌價為例，由今年高位2月中大約469萬，下跌至近年低位8月尾大約353萬，足足下跌咗超過兩成，不過由8月尾開始回升，升至今日9月26號最新嘅市區的士牌參考牌價387萬，比起8月尾低位上升咗34萬，升幅接近一成，大約9.6%。


我哋再睇一睇今年1月份至8月份運輸署嘅的士過戶數量，根據運輸署俾我哋嘅官方數字睇得到，今年頭8個月，市區的士嘅過戶數量差唔多每個月都有所上升，最近更加係連升4個月，1月份嘅過戶數量有119宗，而8月份嘅過戶數量就有194宗，升幅超過6成，反映緊的士買賣嘅活躍程度係上升緊，而且市場上嘅的士車主，近期喺我哋HKTEx App上放盤，心態都非常進取，普遍叫價都係向上。


但值得留意嘅係，銀行加息嘅情況仍然存在變數，雖然最近一次美國聯儲局冇進一步加息，有經濟分析師更認為美國加息周期已經完結，但香港銀行資金情況仍然非常緊張，最近有銀行更加上調港元定期存款息率搶錢，當銀行嘅資金成本上升，承造按揭嘅息口都有機會調整，最近亦有銀行宣佈暫時停止接受申請的士按揭，呢啲信號都會影響投資的士牌嘅阻力，大家一定要留意。


雖然的士牌價最近係有所回升，但事實上現時嘅牌價仍然係處於十年內嘅低位，比起最高位大約725萬，已經下跌咗超過4成半，唔知你對的士牌價又有啲咩睇法，歡迎留言。


不過無論你嘅睇法係點都好，喺準備賣出或者買入的士牌之前，都歡迎下載我哋嘅App「HKTEx 一站式的士買賣租賃平台」，了解更多最新資訊，密切留意我哋香港的士交易所，我哋下集見。


Olivia

香港的士交易所 HKTEx 主播

2023年9月26日

P.S.：短片版本請於YouTube上收看：https://youtu.be/ksoukQ7uhXI



294 次查看

的士牌市場資訊【乘客人次趨勢繼續下跌】2023年9月15日


大家好，歡迎收睇每星期嘅「的士牌市場資訊」，我係Mia，的士牌價經歷咗7至8月嘅急跌之後，最近都有所回穩，今日9月15號最新嘅的士牌參考牌價，市區的士牌價374萬，新界的士牌價306萬，以市區的士為例，相比起8月中嘅低位353萬，上升咗21萬，升幅大約6%。


至於早排急跌嘅主要因素，明顯係受到7月份銀行加息嘅壓力影響，再加上當時的士牌價再次受到各大傳媒嘅關注，加重咗市場上嘅沽售壓力，令的士牌價出現咗急跌嘅情況，嚟緊美國聯儲局將會喺香港時間9月21號再次舉行議息會議，雖然有專家指出今次加息嘅機會唔高，但都值得大家留意息口嘅走勢，如果準備申請大額嘅的士按揭嘅準買家就要留意，就算利息冇再上升，相信現時嘅高息環境都會持續一段時間，各位準備入市嘅準買家記得量力而為。


其實大家要留意息口走勢因素之外，最值得關注就係本身的士生意嘅情況係點，呢方面我哋可以睇吓運輸署最新嘅官方數據，平均每日公共交通乘客人次趨勢，最新只係顯示截至6月份嘅數據，喺呢個圖表我哋可以見得到，乘客人次趨勢喺年頭高位調頭回落，最近嘅趨勢都係繼續下跌，6月份嘅平均每日乘客人次回落到大約1100萬嘅水平，呢啲數據係間接反映緊的士嘅生意情況，但要留意嘅係，呢個圖表係未反映7至8月暑假期間嘅市況，大家都值得繼續留意呢方便嘅消息，我哋亦都會第一時間同大家報導。


唔知你對的士牌價又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Mia

香港的士交易所 HKTEx 主播

2023年9月15日

P.S.：短片版本請於YouTube上收看：https://youtu.be/NUzygv92DhY



127 次查看
bottom of page