top of page

最新市場動態

的士新聞資訊【八達通開放的士支付網絡】2024年1月11日


大家好，歡迎收睇「的士新聞資訊」，我係Mia，八達通早前宣布，由1月25號起，將會開放八達通的士支付網絡俾銀聯、AlipayHK同內地支付寶等等嘅二維碼支付平台加入，的士司機用商用版八達通App收款嗰陣時，喺App内輸入車費金額，八達通流動收款機就會顯示二維碼，乘客就可以選擇拍八達通或者掃二維碼付款。


其實商用版八達通喺2018年就已經推出，現時大約有兩萬位的士司機可以透過商用版八達通App收款，再加上同幾個Call的士App合作，八達通喺的士業界嘅滲透率已經達到六成。 


八達通市務總監李玉兒表示，隨住上年開始全面通關，吸引到唔少遊客再次訪港，其中內地旅客佔咗八成，而內地旅客搭的士習慣用電子支付，令的士業界提供電子支付嘅需求上升，所以八達通決定開放網絡俾其他二維碼支付平台，等旅客同本地市民乘搭的士嗰陣時有更多嘅支付選擇，期望喺的士業界嘅使用率可以達到100%。


乘客喺乘撘的士之後，可以用實體八達通卡或者手機八達通拍收費系統，聽到「嘟」一聲即成功收費，如果喺用銀聯、AlipayHK或者內地支付寶就只需開啟應用程式，掃描收費系統上嘅二維碼，聽到「嘟」一聲即成功收費，八達通產品部總監葉勁生形容，對的士司機嚟講，呢個係一個「無感」嘅體驗，因為新增咗其他支付平台之後，司機同以前一樣聽到 「嘟」一聲即代表成功收費。


八達通表示會繼續免的士司機手續費到2025年年底，被問及如果到時收手續費，使用率會唔會下降，李玉兒就表示，到時會再就需求檢視免手續費，但過往嘅使用率同應用金額高，相信八達通喺的士業界嘅認受性都高，相信如果幫到的士行業應付到市場需求，佢哋會樂於繼續去用呢個服務，李玉兒又指出，的士市場最大嘅競爭對手係現金，所以希望聯同其他支付平台去打破現金市場，對其他支付平台嘅加入持開放以及歡迎嘅態度。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。

Mia

香港的士交易所 HKTEx 主播

2024年1月11日

P.S.：短片版本請於YouTube上收看：https://youtu.be/ZIQhLZF7_3k


249 次查看

的士新聞資訊【的士申加價恐難照單審批】2024年1月9日


大家好，歡迎收睇「的士新聞資訊」，我係Olivia，的士業界上年就申請加價幅度達成咗共識，建議紅的落旗加HK$5，即係起錶價HK$32，綠的就加HK$4.5，即係起錶價HK$28，另外每次跳錶費用都相應調整，而家等運輸署完成評估報告，之後就會交上行政會議審批，不過有行會成員認為，建議加價嘅幅度比較大，加價亦都唔能夠充分解決到問題，更加有可能弄巧反拙。


的士業服務質素一直都被受關注，立法會上個月通過法例去改善的士服務質素，推出咗車隊制度，呢個車隊制需要等政府今年初釐定具體合約，之後再邀請業界人士投標，另外，政府又引入司機違例記分制度，而記分制就會喺刊憲後9個月後生效，而家未開始實行改善服務政策就先申請加價，擔心會引起部分乘客嘅不滿。


的士加價申請需要經過行政長官連同行政會議審批，對上一次批准加價係喺2022年5月，同年嘅7月生效，的士劃一加價HK$3，市區的士HK$27起錶，不過業界頻頻反映香港的士收費太低，又面對非法白牌車嘅挑戰，的士司機難以維生，的士車行車主協會永遠會長吳坤成認為，的士起錶價喺過去十年只係加咗HK$5，完全追唔到通脹，保險費、零件維修費支出又不斷上升，的士業界難以營運，佢又指出，現時嘅的士車費基數比較低，部分乘客會覺得今次建議嘅加幅好大，但佢認為呢個加幅只係為咗「追落後」，加價嘅建議喺業界早就有共識。


不過行會成員就有唔同嘅考慮，行會召集人葉劉淑儀認為，的士加價申請素來都係「開天殺價」，行會好少會依足要求批核，佢又指出，當行會收到申請之後，會審視各方嘅理據，例如運輸署嘅數據等等，佢又提醒的士業界，的士近年生意已經差，以而家嘅經濟狀況，如果加價嘅幅度太進取，會進一步影響市民乘搭的士嘅意欲。


另一位行會成員陳健波就指出，唔方便透露行會嘅具體考慮，但係從佢所屬嘅保險業界角度分析，的士業經常出意外，風險管理工作同整體嘅駕駛水平有明顯嘅改善空間，根據保監局嘅數字，的士全保嘅平均保費，已經由2021年嘅HK$35,000，大幅上升兩成至2023年頭9個月嘅HK$44,000。


另外，佢又認為的士另一個最大嘅問題係冇年輕人願意入行，寧願揸非法白牌車都唔揸的士，佢相信的士加價係唔會解決到呢個問題，因為年輕人除咗考慮金錢因素之外，仲會考慮埋工作時間夠唔夠靈活，同埋開工嘅車輛殘唔殘舊等等，佢批評的士業界管理上明顯跟唔上現代社會同科技發展嘅步伐，再加上服務態度等等嘅固有問題，令情況更加嚴重，認為唔應該只係着眼於加價加幾多，而係點樣確保服務態度會變好。


另外，亦有其他行會成員私下指出，雖然話的士加價係唔涉及公帑，但係行會嘅職責之一係兼顧公眾利益同觀感，冇可能批准一個「令人譁然嘅數字」，事實上行會嘅角色都比較被動，只能夠按運輸署提供嘅數字同理據，去決定係唔係批核加價嘅建議，但相信政府都會明白行會嘅立場，提供合理嘅選項。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2024年1月9日

P.S.：短片版本請於YouTube上收看：https://youtu.be/2gzV5r1WeL0


530 次查看

【的士牌價走勢回顧2023及2024展望】2024年1月2日


大家好，我係Mia，啱啱踏入咗2024年，我哋香港的士交易所就襯呢個機會，同大家回顧一吓2023年的士牌價嘅走勢，再同大家展望一吓嚟緊2024年的士牌價嘅情況，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。


2023年的士牌價嘅表現確實唔係咁理想，我哋就以2023年的士牌價嘅走勢圖嚟睇，市區的士牌價，由年頭441萬下跌至年尾357萬，全年下跌咗84萬，跌幅大約19%，至於新界的士牌價，就由年頭341萬下跌至年尾293萬，全年下跌咗48萬，跌幅大約14%，如果以全年高低位波幅嚟睇，以市區的士為例，最高位係2月中469萬，最低位係12月中339萬，波幅大約28%。


其實的士牌價喺2023年年頭係有一段唔錯嘅升幅，最主要係受惠全面通關嘅消息所帶動，的士車主同新買家都期待通關嘅情況，憧憬市面復常，同時的士生意同租金亦有所回升，所以都帶動的士牌價都有所上升，但可惜嘅係，實際通關後嘅市況不似預期，訪港旅客人次不及疫情前，相反出外旅遊嘅市民就不斷上升，近年香港人更興起北上消費嘅熱潮，而家每逢周未假期，北上嘅旅客人數更加超越南下嘅旅客人數，呢個因素會直接影響的士嘅生意，情況令人值得關注，試問咁嘅情況的士牌價又點會唔受影響。


另一個令今年的士牌價下跌嘅因素，就係加息周期嘅影響，美國聯儲局由2022年3月開始至今已經加息11次，今年2023年嚟計就加息咗4次，基於聯繫匯率制度下，本港嘅銀行同業拆息不斷抽高，而銀行嘅最優惠利率亦都有所調整，以滙豐銀行為例，佢哋嘅最優惠利率P喺呢次嘅加息周期已經調高咗5次，由原本5厘上升至現時5.875厘，今年嚟睇就調高咗兩次，分別喺5月份同7月份，加息直接影響的士按揭貸款嘅成本，令到準買家入市嘅決定變得更加審慎，亦都令本身做緊按揭嘅車主供款壓力增加，睇返今年的士牌價嘅走勢，7月份加息後的士牌價亦都有明顯嘅下跌情況。


另一個唔可以唔提嘅因素就係的士保險費高昂嘅問題，自從受到泰加保險突然停辦的士保險嘅影響，的士保費都不斷上升，車主營運的士嘅成本增加，令到部分車主決定退市離場，增加咗的士牌價嘅下行壓力，以上幾點都係今年的士牌價下跌嘅主要因素。


如果我哋睇返最近十年嘅的士牌價走勢，現時嘅的士牌價正正處於十年嘅低位，以市區的士牌為例，由2015年年中高峰時期723萬之後就開始不斷尋底，跌至現時2024年年頭大約357萬，跌幅超過5成，相信牌價下跌當中最主要嘅原因就一定係受到白牌車嘅影響，直接搶走的士嘅生意，亦都影響的士嘅租賃市場，情況多年嚟都未有改變，近年再加上社會運動同疫情嘅影響，令的士牌價跌至十年低位。


當我哋一連串了解咗咁多令的士牌價下跌嘅因素，咁到底市場上又有冇啲利好嘅因素？嚟緊2024年又有啲咩要值得留意？


雖然近年的士牌價不斷尋底係一個不爭嘅事實，不過又咁講，的士牌呢種資產，可以自行營運賺錢，亦都可以出租收取回報，自然吸引到投資者去持有，以現時一架市區的士全新混能車為例，佢嘅租金年回報大約有6.5厘，就算扣除埋最貴嘅保險費用成本支出，佢嘅租金年回報率都超過5厘，情況都算理想。


至於加息嘅情況，市場普遍預期美國加息可能已經見頂，雖然相信高息環境會維持一段時間，更加未知道今年會唔會出現減息嘅情況，但呢個預期已經減輕咗投資者嘅心理壓力，而且近期亦多咗好多新買家係以全數FullPay嘅方式購入的士牌，以減低借貸投資嘅風險壓力。


另外，整體的士嘅服務質素亦都睇得到正喺度努力改善當中，例如推出新款型號的士，新增電子支付系統，的士駕駛安全系統，政府更引入的士車隊制度以及的士司機違例記分制，雖然成效未必可以即時見到，但相信長遠有助改善整體的士嘅服務質素。


至於2024年最值得關注嘅消息就係，運輸署承諾半年內修例規管網約白牌車平台，雖然未知到時實際嘅修例情況，以及點樣有效規管網約白牌車平台，如果到時真係有效打擊白牌車活動，對的士業界絕對係一件好事，但暫時我哋對呢個消息仍然抱住觀望嘅態度，大家一定要密切留意事態嘅發展。


不過講到尾，香港嘅經濟以至全球嘅經濟情況先係最重要嘅因素，全球遭受咗幾年疫情嘅重創，經濟同生活模式都有所改變，點樣回復經濟繁榮係每一個國家同地區嘅主要課題，呢樣先係首要嘅功課。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App H.K.T.E.x. 一站式的士買賣租賃平台，密切留意我哋香港的士交易所，我哋下集見。


Mia

香港的士交易所 HKTEx 主播

2024年1月2日

P.S.：短片版本請於YouTube上收看：https://youtu.be/pmxmF95v58w


3,138 次查看
bottom of page