top of page

最新市場動態

的士新聞資訊【用AI有望拯救的士行業？】2024年9月10日

已更新：2024年9月26日


大家好，歡迎收睇的士新聞資訊，我係Travis，香港嘅的士服務經常為人詬病，例如有拒載、兜路同埋服務態度差等等嘅唔同問題，更加有唔少嘅訪港遊客遇到濫收車資嘅情況，隨住網約車嘅興起，政府正式就規管網約車平台展開研究，目標喺2025年提交立法建議，的士業將會更加有逼切性去提升服務水平，一位研究內地的士行業嘅鄭城博士就向媒體記者表示，香港的士嘅數碼化水平較低，但係如果參照內地嘅經驗，香港的士業嘅問題有望通過大數據同AI科技得到解決。


鄭城認為，香港的士業缺乏好似深圳一樣嘅大數據，同時香港亦都比較重視攝錄鏡頭侵犯私隱嘅問題，因此如果要提升香港的士數碼化嘅水平，需要喺保護私隱嘅基礎上，部署一啲人工智能物聯網嘅設備，為營運嘅的士安裝定位設備，以及用其他嘅方法去探測的士車上有冇乘客，事實上鄭城所屬嘅團隊由2019年開始就研究的士智能巡遊AI應用模型，近期更加喺深圳推出咗小程式，能夠實時呈現邊度車多人少，邊度車少人多，通過市場嘅機制，從的士司機利益最大化嘅角度自主選擇，從而實現供應同需求嘅匹配。


鄭城認為，呢套程式有望幫助解決香港的士業嘅多方面問題，而開發呢個小程式嘅團隊就係喺香港大學經管學院深圳創業基地孵化出嚟嘅企業，而喺同香港大學教授嘅交流當中，佢哋亦都對香港嘅的士行業情況有進一步嘅了解，佢哋認為香港的士司機趨於老齡化，未來肯定需要有人接班，而一個司機由唔熟悉到熟悉呢個行業，一定需要呢種咁樣嘅工具去縮短佢嘅學習時間，鄭城又認為，的士行業有某程度上嘅技能障礙，如果冇呢種咁樣嘅工具，司機就唔知道應該咩時段去邊度接客做生意，導致唔同嘅司機嘅收入可以相差好大，所以呢個工具可以令到非常有經驗嘅司機同新司機共享經營策略，亦都可以令到成個系統嘅效益變得更加高。 


目前深圳每日有大約1,000至2,000個活躍的士司機都用緊呢個小程式，啱啱由餐飲業轉行到的士行業嘅汪先生向媒體記者透露，佢喺啱啱開始做的士司機嘅頭1個月，都唔知道可以去邊度搵客，每日都喺度問啲司機朋友，自從用咗呢個小程式之後就慳咗好多時間，而且收入都有所增加，之前一日最多都只可以跑到RMB￥600，但喺上星期日就跑咗RMB￥800幾。 


由於深圳嘅的士係設有智能終端系統，每隔15秒就會呈現的士係「空車」定係「載客」嘅狀態，鄭城就指出，呢個小程式可以通過系統監測全市客流最密集嘅85個熱點地區，等同於為的士司機實時提供85隻「潛力股」，的士司機就能夠通過小程式實時獲得每個熱點地區嘅車輛需求、排隊嘅空車數量同埋排隊嘅時間等等，有助提高排隊同巡街搵客嘅效率，降低的士嘅空車駕駛比率。


鄭城又指出，團隊喺未來兩星期將會喺深圳機場推出的士短途智能管理系統，有助更好管理短途嘅行程，目前佢哋已經同幾個香港嘅合作夥伴洽談，希望未來可以將深圳嘅成功經驗套用喺香港嘅的士行業，幫助香港的士行業提升服務水平，解決現有嘅種種問題。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Travis

香港的士交易所 HKTEx 主播

2024年9月10日

P.S.：短片版本請於YouTube上收看：https://youtu.be/eDGo2C9y3Lg


 
 

【的士牌地震預警！無人駕駛的士】

已更新：2024年9月26日


仲講緊網約車合法化？你知唔知無人駕駛的士已經殺到埋身喇！


大家好，我係Karina，當大家仲係討論緊網約車合法化有機會令的士牌帶嚟災難風暴嘅時候，另一個會令的士牌發生巨大災難嘅地震預警，亦都將要發佈，就係無人駕駛的士已經蓄勢待發，為未來的士業界帶嚟極大嘅衝擊，今集就會同大家預測一吓個未來情況會係點，的士司機、的士業界、同埋的士牌價又會發生啲咩變化？未訂閱我哋嘅朋友記得訂閱，多謝支持。


其實早喺大約兩三年前，我哋已經出咗條片叫做「無人駕駛的士啟示錄」，片中簡單預測一吓如果香港發展無人駕駛的士會係咩情況，又簡單分析咗無人駕駛的士對於的士車主同的士司機嚟講又會有啲咩影響同變化，由於當時無人駕駛技術未係咁普及，當時亦都預測需要一段時間先會普及同實際營運，但時間一轉，到咗今時今日，無人駕駛技術發展迅速，以中國內地為例，百度旗下嘅無人駕駛的士蘿蔔快跑現時已經喺深圳、上海、北京等10個城市進行試驗，而當中喺武漢市更加開展咗24小時全天候營運，服務亦已經擴展到全武漢市範圍，無人駕駛的士嘅興起更加成為咗最近內地市民熱烈討論嘅話題。


今時今日，無人駕駛的士已經成為咗武漢市民日常出行嘅重要方式，Call無人駕駛的士亦都成為咗外地遊客嚟武漢旅遊嘅必做打卡項目，喺社交媒體上面有好多嘅主播都爭先分享佢哋Call無人駕駛的士嘅體驗，而且仲列舉咗好多好處，例如安靜快捷、車箱裡面冇煙味、唔會拒載、唔會兜路、唔使面對尷尬傾偈嘅司機，同埋女士唔使再驚夜晚一個人Call車嘅安全問題等等。


由於無人駕駛的士嘅盛行，內地各個城市當局亦都冇特別提及到無人駕駛的士嘅發展限制數量，到目前為止，武漢市已經投放咗超過400架無人駕駛的士，平均每架無人駕駛的士嘅每日訂單已經超過20單，幾乎同當地嘅普通網約車同傳統嘅的士嘅每日訂單量睇齊，更加可能已經超越咗，而且有消息指蘿蔔快跑有意目標今年內喺武漢市發展投放超過1000架無人駕駛的士，無論同普通網約車又或者同傳統嘅的士相比，無人駕駛的士唔單只可以高效咁24小時無休不停運作，而且佢嘅收費更加非常實惠，根據內地傳媒報道，喺武漢用蘿蔔快跑Call無人駕駛的士，10公里嘅行程收費只需大約人民幣4至16元，遠低於普通網約車同的士嘅收費，因為同樣都係10公里嘅行程，普通網約車嘅收費就要大約人民幣18至30元。


就正正以上呢個情況，無人駕駛的士喺武漢嘅急速發展，已經大規模咁搶走普通網約車同傳統的士嘅生意，司機收入大減，情況令人擔心未來會引發大批司機失業，最近武漢當地更加有傳統的士管理公司發出公開信大吐苦水，直指無人駕駛的士令佢哋旗下某部份嘅的士已經被迫停運，形容自己公司已經面臨巨大嘅經營壓力，標題更加形容傳統的士已去到死亡邊緣。


事實上喺呢十年，內地網約車嘅興起已經嚴重打擊傳統的士嘅生意，而家再加上無人駕駛的士嘅急速發展，令傳統的士受到雙重打擊面臨淘汰邊緣，如果無人駕駛技術日趨成熟，相信要依靠司機運作嘅普通網約車都唔能夠置身事外，同樣要面臨淘汰，司機需要被迫轉行。


另外，其實無人駕駛的士唔單只喺中國內地有急速嘅發展，其實地球另一邊嘅美國，無人駕駛技術同樣都發展迅速，曾經係全球最大嘅電動車製造商，亦都係世界上最早嘅自動駕駛汽車生產商「Tesla」，最近有意推出自家無人駕駛的士，甚至有意打入中國市場，而且無人駕駛的士更加係佢哋未來嘅重點發展項目，終極目標更加會加入共享元素，令車主可以加入無人駕駛的士平台，當自己架車閒置嘅時候，架車會識得自動駕駛去接送其他乘客賺錢，賺取額外收入，行政總裁馬斯克更聲稱，車主可以靠無人駕駛的士嘅服務每年賺取3萬美金。


鏡頭一轉，咁而家香港嘅情況又係點呢？現時無人駕駛的士仲未係香港推出，不過其他唔同款式嘅無人駕駛自動車先後喺香港多個地點進行測試，包括科技園區、西九文化區、大學校園以及個別私人屋苑等等，香港國際機場更加係推動無人駕駛自動車測試嘅先行者，早喺2019年就引入咗自動駕駛拖車，係全球首個喺實際環境操作無人駕駛拖車嘅機場，2021年又喺機場禁區引進咗自動駕駛巡邏車，上年機場管理局更加將自動駕駛技術拓展到載人服務，以自動駕駛小型巴士接載員工往返機場區內多項設施。


喺2024年3月，香港無人駕駛發展邁向咗一個新嘅里程碑，立法會喺上年通過咗「2022年道路交通(修訂)(自動駕駛車輛)條例草案」，之後亦都通過咗新制定嘅附屬法例「道路交通(自動駕駛車輛)規例」，新嘅自動車規管制度喺2024年3月份開始實施，意味住無人駕駛自動車喺香港道路上行駛嘅發展又踏出咗新嘅一步，所以引入無人駕駛的士進入香港，相信係遲早嘅事，不過情況又會唔會好似內地咁樣呢？內地傳統的士面臨淘汰邊緣，關鍵在於內地網約車早喺2016年已經合法化，而且網約車嘅數量亦都冇特別上限限制，引入咗大量競爭，而家仲有無人駕駛的士嘅大規模投放，所以競爭者嘅數量限制先係內地傳統的士面臨淘汰嘅重點因素，睇返香港情況，政府早前建議以發牌嘅方式去規管網約車平台，同時亦強調車輛一定要持有有效出租汽車許可證先可以合法經營載客取酬服務，現時香港嘅出租汽車許可證上限係1500個，雖然未知當局會唔會增加出租汽車許可證去配合網約車嘅發展，不過相信大量增加嘅機會唔高，至於未來如果香港引入無人駕駛的士會係以咩牌照制度嘅方式推出都係未知之數，不過相信數量上一定會設有限制，會唔會以現有嘅的士牌去轉換同取代？定係會以網約車平台制度去監管？又或者另外新增無人駕駛的士牌照？政策上存在不確定性，到時嘅的士牌價又會受到咩程度嘅影響？不過相信都會有好大嘅波動變化，所以呢次個的士牌地震預警並唔係亂咁發出，大家都只能夠拭目以待到時嘅情況。


咁到底當無人駕駛的士殺到埋身嘅時候，香港傳統的士仲有冇其他出路？其實實際上並唔會所有嘅乘客都只需要無人駕駛服務就可以滿足到，始終有啲乘客係需要有真人嘅服務，傳統的士或車隊可以向住Add Value嘅方向發展，例如專門提供傷殘人士輪椅上落嘅接載服務，又或者提供VIP貴賓級嘅招待接載服務等等，以提供優質嘅真人服務去抵抗無人駕駛的士嘅競爭，話唔定都可以為傳統的士殺出一條血路。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Karina

香港的士交易所 HKTEx 主播

2024年8月19日

P.S.：詳細短片版本請於YouTube上收看：https://youtu.be/g0uot8LH8lc


 
 

【的士車隊力抗牌價風暴】


大家好，我係Olivia，早前我哋出片形容的士牌正面對緊災難風暴，啱啱過咗嘅7月份更加係風暴形成嘅轉捩點，原因在於政府建議以發牌方式規管網約車平台，坊間就熱烈討論白牌車合法化嘅可能性，咁到底而家個風暴發展成點，同埋啱啱發出嘅的士車隊牌照對的士業界同的士牌價又會帶嚟啲咩嘅影響，今集就會同大家簡單分析呢方面嘅情況，未訂閱我哋嘅朋友記得訂閱，多謝支持。


政府早前喺7月頭發表咗一份研究報告，建議以發牌嘅方式去規管網約車平台，而車輛係必需要持有有效出租汽車許可證先可以經合法嘅網約車平台提供服務，運輸署今年稍後會開始對相關嘅情況進行調查同研究，預計一年內完成，之後當局會再根據研究結果嚟評估未來規管建議下可以透過網約車平台提供合規服務嘅車輛類別同數量，以及網約車平台同司機嘅相關牌證要求等等，期望目標喺2025年就規管網約車平台修訂立法建議。


雖然政府喺呢個建議報告當中強調車輛一定要持有有效出租汽車許可證先可以合法經營載客取酬服務，即係政府容讓白牌車合法化嘅機會好微，但另一邊廂政府亦都有機會增加出租汽車許可證嘅數量，而且仲要等一年後先知道政府係會點樣修訂立法建議去規管網約車平台，呢一方面就令的士業嘅前景帶嚟不確定性，其實的士牌價喺最近都反映咗呢個情況。


我哋同大家睇一睇過往12個月的士牌價走勢圖，圖表顯示由2023年8月至2024年8月每月1號嘅牌價走勢，喺圖表我哋可以睇得到，的士牌價近年都繼續不斷下跌，以市區的士牌為例，由2023年8月1號嘅380萬，期後一直不斷尋底，2024年6月份更加突然跌幅加劇，跌到2024年7月1號市區的士牌價只係273萬，因為當時好多車主都擔心7月份會出現白牌車合法化嘅問題，之後7月頭政府發表咗規管網約車平台研究報告，報告內容對的士業界相對正面，所以7月份的士牌價都有所回升，最新2024年8月1號市區的士牌價回升至287萬，但回升嘅幅度唔算太多，就正如我哋啱啱都提及過，喺規管網約車平台嘅層面上面仍然有不確定性，所以牌價都反映咗呢個情況，有意入市嘅買家仍然抱住觀望嘅態度，相信的士牌價喺短期大升嘅機會唔高。


至於的士車隊嘅情況又係點呢？政府為咗有效提升的士嘅服務質素，引入咗的士車隊制度，喺啱啱嘅7月尾就發出咗5個的士車隊牌照，預計5支車隊總共會有3500架的士提供服務，不過有一樣嘢我哋一定要喺度話俾大家知道，的士車隊所提供嘅的士係以現有嘅的士牌照組隊而成，並唔係發出新嘅的士牌，因為坊間好多人都誤解咗政府係會發出3500個新嘅的士牌照，呢一點大家一定要搞清楚。


最近有好多觀眾朋友都好想知道，如果的士車隊推出咗同運作之後，對的士業會有啲咩影響同埋的士牌價又會點走？我哋嘗試喺呢度同大家簡單分析預測一下，由於政府發出嘅的士車隊牌照對的士車隊有一定嘅要求，例如要提供網約平台、電子支付系統、提供司機培訓、加入車隊時車齡唔可以超過3年、同埋車隊規模至少要有300架的士等等，的士車隊係需要投放大量嘅資源同成本先可以滿足以上種種嘅要求，當車隊正式推出市場上面又要面對車隊與車隊之間嘅競爭，更加要面對市場上非常活躍嘅非法網約白牌車競爭，相信車隊嘅收費定位都唔能夠太進取，利潤相信都唔會好高，除非的士車隊嘅服務定位有佢嘅市場獨特之處，否則車隊可唔可以成功獲利持續營運都成為疑問，不過又咁講，毫無疑問推出的士車隊對的士業界嚟講絕對係一件好事，能夠有效監管及管理的士業務提升服務質素之餘，更加可以提升返的士形象，而且可以引發車隊與車隊之間嘅良性競爭，正所謂有競爭先有進步，不過如果要的士車隊可以長遠發展，關鍵就要確保有效打擊到非法白牌車活動，杜絕市場上嘅不公平競爭。


至於推出的士車隊制度對的士牌價又會有啲咩影響呢？我哋預計由於的士車隊會長期持續營運，所以相信車隊會長期持有手上嘅的士牌，而且車隊與車隊之間亦會增持的士牌嚟發展車隊規模，呢個情況係有利的士牌價上升，不過倒返轉亦都有利淡嘅因素，由於的士車隊要吸引優質嘅司機加盟搶人才，甚至要以僱庸關係聘請優質嘅司機，相信會對市場上嘅的士租金有所影響，對單頭車主嚟講或者要減租嚟留住優質嘅司機，由於租金難以上升或者更加有機會要下跌，直接影響租金回報，影響咗的士牌嘅投資價值，阻礙咗的士牌價上升嘅動力。


不過無論點都好，我相信大家都想的士車隊能夠成功做得好，的士嘅服務質素可以提升，市民能夠有唔同嘅選擇，享受到優質嘅的士服務。


唔知你對以上嘅內容又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2024年8月5日


P.S.：短片版本請於YouTube上收看：https://youtu.be/Z9InG3vLtKg


 
 
17182021
bottom of page