top of page

最新市場動態

【網約車合法化正式來臨】



大家好，我係Olivia，最近我哋收到由政府運輸及物流局就規管網約車發表咗研究報告，報告將會喺嚟緊7月12號交上立法會交通事務委員會會議上討論及徵詢意見，我哋今集就同大家率先睇一睇份報告內容，了解一吓網約車合法化時代將會點樣正式來臨，喺未開始之前如果未訂閱我哋嘅朋友記得訂閱，多謝支持。


運輸及物流局最近發表咗一份規管網約車嘅研究報告，報告內容包括現時嘅制度背景及相關嘅執法工作，當中亦都有提出修例建議點樣更加有效打擊非法出租或取酬載客活動，而報告最主要嘅內容就係提出建議點樣規管網約車，令網約車同網約平台點樣合法經營，我哋今集會同大家集中講呢一方面嘅報告內容。


現時本港有關出租汽車嘅法例主要規管車主同司機，但就未有清晰嘅相關條文去規管網約車平台嘅運作，當局就其他地區喺呢方面嘅做法作出研究，當中包括深圳、新加坡、倫敦、坎培拉、多倫多以及日本等地，呢啲地區都設有法例去規管網約車平台公司同司機，而平台公司就需要向政府申請相關牌照或許可證先可以合法營運，並且要按照審批條件去營運業務，深圳、新加坡、倫敦、坎培拉同多倫多都未有限制平台公司嘅數量，而日本就只接受的士公司去申請營運網約車嘅服務，另外，網約車平台公司係需要為自己平台嘅業務去作出盡職嘅審查，包括確保透過平台獲安排提供服務嘅車輛同司機係已經領取合適嘅牌照同購買相關嘅保險，如果平台公司未獲政府發牌而提供網約車嘅服務，或安排冇合適牌照同保險嘅車輛或司機提供服務，均屬違法，此外，合資格嘅司機只可以透過獲政府發牌嘅平台公司提供預約服務，否則亦屬違法，上述盡職審查同其他規管要求嘅目標係有效保障網約車平台、司機同乘客，亦可以確保市民出行嘅安全。


綜合各地嘅規管經驗以及香港嘅情況，當局建議考慮向喺香港提供網約車服務嘅平台作出規管，亦都會考慮市場上個人化點對點交通服務嘅整體供求，由於個人化點對點交通服務嘅每程載客量低，政府有需要控制有關車輛嘅總量，以確保道路得以有效地使用同交通順暢，公共交通服務載客量高，政府一直以鐵路維骨幹，並配合專營巴士同小巴等，為市民提供高效嘅交通服務，當局喺評估交通服務嘅整體供求時，會考慮埋現時點對點服務嘅數量同服務質素係唔係能夠滿足到乘客嘅需求，以及嚟緊下年的士車隊陸續投入服務之後，對點對點服務供應嘅影響，當局要強調嘅係，檢討嘅目的唔係為咗鼓勵慣常乘搭集體運輸公共交通工具嘅市民轉用乘搭點對點交通工具，以免對車輛嘅額外需求反而引致對現時繁忙嘅交通加重壓力，同時當局會小心評估市民出行需求嘅變化，載客服務價格轉變等因素會唔會吸引更多市民採用點對點服務車輛，進而對公共交通服務提供者嘅長遠營運產生不良嘅影響。


運輸署今年稍後開始對有關嘅乘客需求同轉變等進行調查，喺六個月內檢視進展嘅情況，並且預計一年內完成，視乎上述嘅研究結果，當局將會評估未來規管建議下可以透過網約車平台提供合規服務嘅車輛類別同數量，以及平台同司機嘅相關牌證要求等等。


綜合各地嘅規管經驗同香港嘅情況，為咗確保市場上可以提供合法合規嘅網約車服務，保障市民嘅權益，當局建議考慮應該向喺香港提供網約車服務嘅平台加以規管，透過法例明確地以牌照同發牌條件方式規管網約車平台公司，加上持續改善的士嘅服務質素，以達致市民放心乘搭多元化點對點交通服務，運輸業界同市民共贏嘅目標，另一方面便利執法部門打擊非法活動。


喺的士同出租汽車透過網約車平台提供個人化點對點交通服務之下，政府統一規管已領牌嘅網約平台只提供的士以及持牌嘅合規車輛嘅合法網約服務，唔單只可以俾的士同持牌嘅合規車輛優勢互補，同時亦可以回應市民嘅唔同出行需要，例如喺個人化點對點服務需求高峰嘅時段，以及為有特別出行需要嘅市民提供服務，例如提供可供輪椅上落嘅車輛，以及服務高級酒店同商務客嘅需求等等。


藉住規管網約車平台服務，可以俾司機安心透過合法嘅網約車平台提供個人化點對點交通服務，從而吸引司機入行，與此同時，市民亦都能夠清楚識別合法嘅網約車平台，方便市民按個人需要透過網約車平台預約行程，享受更優質嘅個人化點對點交通服務，達至各方得益。


政府銳意推動提升個人化點對點服務嘅質素，同時都需要保障乘客嘅安全同利益，確保道路嘅有效使用，以及現有公共交通系統嘅高效可靠同長遠健康發展，因此當局建議以下嘅未來工作 同路向，建議落實提升整體的士服務質素嘅措施，包括推動及協助的士車隊盡快投入服務，並且喺適當嘅時候檢視的士車隊嘅服務效益，以及收集市民嘅意見，同一時間積極跟進強制所有的士喺車廂內安裝攝錄系統嘅建議，政府而家正進行緊可行性研究，並且會喺今年年底諮詢的士業界嘅意見，之後再向立法會作出匯報，另外，當局會與警務處同律政司積極跟進，研究進一步完善現有規管非法載客取酬嘅法例，以決定修例細節，目的為咗更有效打擊非法載客取酬活動。


最後當局表示會繼續探討提升個人化點對點交通服務嘅策略方向，期望目標喺2025年就規管網約車平台修訂立法建議。


以上就係今次政府發表嘅規管網約車研究報告，唔知你對以上嘅內容又有啲咩睇法？歡迎留言，我哋下集見。


Olivia

香港的士交易所 HKTEx 主播

2024年7月9日


P.S.：短片版本請於YouTube上收看：https://youtu.be/-Q-sBZiFx7c


 
 

的士牌市場資訊【2024年上半年的士牌價走勢分析】


大家好，我係Hayley，近期的士牌可以形容為面對緊災難風暴，的士牌價有明顯嘅下跌趨勢，我哋就趁住啱啱踏入第三季，同大家睇吓的士牌價喺2024年上半年嘅表現，我哋今集就會同大家睇一睇有關嘅數據，無論你係車主又或者係準買家，都希望你可以藉住呢條片，掌握到最新嘅市況，如果未訂閱我哋頻道嘅朋友，記得訂閱，多謝支持。


我哋可以先睇一睇今年2024年上半年嘅的士牌價走勢圖表，我哋睇到嘅情況都令人非常擔憂，我哋就以市區的士牌價為例，由年頭357萬下跌至6月尾273萬，下跌咗84萬，跌幅超過兩成，大約下跌咗23.5%，至於新界的士牌價都同樣下跌，由年頭293萬下跌至6月尾224萬，下跌咗69萬，咁啱得咁蹺，跌幅係同市區的士牌價一樣都係跌咗大約23.5%，半年時間就跌超過兩成，而且跌嘅幅度喺6月份更加明顯加劇，同一時間我哋再睇一睇過戶數量嘅情況，喺截稿前運輸署俾我哋嘅的士過戶數量官方數據，數字最新顯示到2024年5月份，其實過戶數量有明顯嘅上升，我哋就以市區的士為例，今年頭5個月嘅平均每月過戶數量大約有182宗，而比起上年2023年同期頭5個月，平均只有每月大約135宗，明顯係有所上升，反映的士買賣交投活躍，但的士牌價近年都不斷下跌，市場上就再次出現咗「量升價跌」嘅情況。


就正如我哋喺之前嘅片都有提到，「量升價跌」呢個情況係有兩個唔同嘅解讀信號，一般解讀為大跌初期嘅現象，因為沽買雙方對前景嘅睇法有極大嘅分歧，沽方認為呢個時候係適合退市離場，但買方對後市仍然抱有期望，所以呢個就係造成咗「量升價跌」嘅主要原因，不過，「量升價跌」都有另一個解讀方法，有人會解讀為準備上升初期嘅現象，因為價格經過長時間下跌，有人相信已經到達低位嘅時候，就開始會有買家湧現，期後交投逐漸增多，所以有人會認為「量升價跌」係低位買入嘅信號。


至於的士牌價下跌嘅因素其實真係有好多，例如疫情後市民生活出行習慣改變，港人夜市出行消費減少，加上港人北上消費熱潮持續，令的士生意未如理想，另外，本港樓市近期亦都表現疲弱，再加上美國減息預期有所落差，影響整體投資氣氛，而的士保費及維修成本又不斷上升，呢啲都係的士牌價下跌嘅種種因素。


不過講到近期牌價最主要嘅下跌原因，就係城中熱烈討論嘅話題「白牌車合法化」，政府將會修例規管網約車平台，初步嘅修例建議將會喺7月份公佈，因為當中有好多唔同嘅可能性，呢個情況令部份的士車主擔心，的士牌會失去佢嘅獨特價值，決定提早沽售的士牌離場，6月份的士牌價急跌都係反映緊呢個情況，其實喺同一時間，7月份亦都會公佈的士車隊發牌結果，的士車隊預計會喺一年內正式投入服務，長遠係希望能夠有助改善整體的士嘅服務質素，呢啲都係大家值得關注嘅情況。


總結嚟講，今個月7月份可以話係的士牌價嘅關鍵轉捩點，大家一定要密切留意事態嘅發展，一有最新消息我哋會第一時間同大家報導。


唔知你對的士牌嘅前景又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Hayley

香港的士交易所 HKTEx 主播

2024年7月4日

P.S.：短片版本請於YouTube上收看：https://youtu.be/nDUaHcrrbqk



 
 

的士新聞資訊【目標6000部的士用微信支付】2024年6月13日


大家好，歡迎收睇的士新聞資訊，我係Karina，早前網上流傳一條的士司機互相爭執嘅短片，事件發生喺山頂的士站，懷疑前方嘅的士司機拒載遊客，而後方嘅的士司機就上前質問，前方司機立即失控爆粗大叫︰「冇微信呀！冇微信呀！點做啊？」，呢條短片再次引起網民對的士司機服務態度嘅討論，而咁啱得咁蹺，騰訊金融科技副總裁洪丹毅喺早前接受香港傳媒訪問嗰陣時，亦都主動提及到的士電子支付嘅情況。


當時佢表示，微信支付目前喺香港已經覆蓋超過15萬個商戶，覆蓋範圍更包括交通工具，例如港鐵、巴士同的士等等，期望未來可以擴展到電費同政府帳單繳費上面，但係洪丹毅特別提到，香港的士喺電子支付嘅發展比較緩慢，計劃喺今年投放更多嘅資源，令的士司機可以接受用微信支付收錢，佢亦都了解到大部份的士都係由幾位司機輪流揸車開工，所以係毋須一定要由車主申請帳戶，只需要的士司機提供駕駛執照同的士證就可以開設獨立嘅帳戶，洪丹毅又表示，佢哋目標喺今年內每三四部的士就可以見到有一部係用緊微信支付收錢，佢認為政府嚟緊推出嘅的士車隊制度，對於改善的士服務質素方面絕對有好大嘅幫助，相信微信支付嘅便攜又低成本嘅收錢碼貼紙，能夠吸引到更多的士司機選用，更加可以為的士車隊嘅推廣打好基礎。


根據運輸署嘅資料顯示，而家全港有18,163部的士，如果按照洪丹毅所指嘅目標，每三四部的士就有一部提供微信支付收錢，就相當於大約有6,000部的士選用，但實際而家喺市面上仍然有好多的士只係會收現金，情況一直受到唔少市民同遊客嘅指責。


的士車行車主協會永遠會長吳坤成喺接受傳媒訪問時指出，微信支付唔會向啱啱開戶嘅的士司機收取手續費，再加上政府嚟緊將會推動的士車隊化，所以佢對於騰訊金融科技副總裁所提出嘅目標三部車有一部用微信支付，吳坤成認為唔會太難，確實係有可能達成，不過佢認為微信喺香港所推出嘅優惠就唔及內地多，建議可以向用戶發放更多乘坐的士嘅回贈優惠，以吸引乘客選用微信支付俾錢，同時亦都可以向的士司機發放入氣優惠，相信咁樣可以加快的士普及電子支付。


吳坤成又指出，現時有唔少嘅的士司機為咗要接載內地遊客，已經開設咗「的士收錢碼」，認為電子支付已經係大勢所趨，佢估計的士車隊喺嚟緊7月份成立之後，唔同嘅電子支付公司都唔會錯過呢個龐大嘅的士支付市場，相信佢哋將會親自拍門主動提供優惠，以吸引的士車隊採用。


至於的士車隊制度方面，政府計劃發出最多5個的士車隊牌照，最終收到15份申請，結果將會喺7月份公佈，根據的士車隊嘅牌照條件，政府係會要求所有的士車隊嘅車輛，係必須提供電子支付方式，至於的士車隊規模方面，混合或市區的士車隊需要有300至1,000部的士，如果政府最終係發出5個的士車隊牌照，而同時所有的士車隊嘅規模都達到1,000部的士嘅話，到時市面上就會有總數5,000部的士係一定有提供電子支付方式俾錢。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Karina

香港的士交易所 HKTEx 主播

2024年6月13日

P.S.：短片版本請於YouTube上收看：https://youtu.be/1B_Rh4eReS8


 
 
19202223
bottom of page