top of page

最新市場動態

的士新聞資訊【200輛電動的士明年陸續落地】2023年12月20日


大家好，歡迎收睇「的士新聞資訊」，我係Olivia，香港無線電的士聯誼會喺今日12月20號同內地電動汽車品牌代理簽約，買入200部電動的士，預料下年首季陸續會有新車落地，如果情況理想，下年有機會有1000部電動的士喺市場上營運，聯誼會主席黃羽庭表示，聯誼會協助政府推動綠色能源汽車，以改善空氣質素，為廣大市民嘅健康出一分力。


早前喺香港市面已經有少量嘅電動的士落地，有業界人士形容呢款車嘅車尾箱容量好大，可以放四個大行李箱都冇問題，深受的士司機同乘客歡迎，業界相信隨住越嚟越多新車款營運，將會有助吸引更加多年輕嘅司機入行。


自由黨航運交通界議員易志明表示，的士業界嘅行動主要係要配合政府喺2027年年底前投入3000部電動的士，以及為2050年達致炭中和嘅目標出一分力，易志明又提到，本港現時有18163部的士，當中大約有3000部嘅車齡已經達到十年或以上，所以係時候鼓勵車主更換電動的士，但係明白到的士業界經歷咗過去三年疫情嘅艱難時期，而家又要面對高昂嘅營運成本，特別係保險費用，令車主減低換車嘅意欲，佢又提議可以參考外國嘅例子，唔同嘅的士車款有唔同嘅收費，豪華的士落錶收費比較高係無可厚非，但係而家政府就希望新推出嘅的士車隊，透過預約費用同包車費抵銷增加咗嘅成本。


另外，黃羽庭亦都主動提及上個月嘅罷工行動，而當時運輸署應承喺呢個月內會面，會面將會喺今日12月20號晏晝舉行，屆時將會聯同警方會面，討論點樣重點打擊白牌車活動，希望今日會有討論結果，對於有業界建議成立「中央舉報平台」，黃羽庭相信呢個做法會有效果，一再強調所有犯罪活動市民都應該舉報，對於不法份子係零容忍，除此之外亦都會有其他方法去打擊白牌車，促請政府加強打擊以改善的士業界嘅營運環境。


唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2023年12月20日

P.S.：短片版本請於YouTube上收看：https://youtu.be/pMyY4H0Woak


 
 

的士新聞資訊【修例通過引入的士車隊制】2023年12月14日


大家好，歡迎收睇「的士新聞資訊」，我係Mia，立法會喺尋日12月13號三讀通過咗修例，引入的士車隊管理制度，將的士最高嘅乘客座位增加至6個，引入的士司機罪行兩級制罰則，以及上調「白牌車」嘅罰則，運輸及物流局局長林世雄指，預計明年初邀請車隊申請牌照，明年中亦會就研究規管網約車平台聽取議員同業界嘅意見，2025年上半年進行諮詢。


法案委員會主席陳健波引述局方指出，計劃初期預料會批出大約3至4個的士車隊牌，涉及大約3000至4000架的士，佔全港的士總數嘅大約兩成，所以發展車隊係唔會取締到一般嘅的士，車隊係需要提供網約嘅渠道，至於政府會唔會設立跨車隊嘅統一網約平台，林世雄指市場自行演化會有更大嘅發展空間，政府會要求車隊提供預約網站，乘客掃描二維碼就可以預約到的士，唔需要下載唔同嘅手機程式，林世雄又指出，當局會賦予車隊的士一啲營運權利，包括自定預約行程收費，增加組隊嘅誘因。


另外，立法會尋日亦都處理咗兩項嘅修正案，當中通過咗易志明議員建議嘅修正案，將從事白牌車初犯同重犯嘅監禁期倍增至6個月同12個月。


至於陸頌雄議員就的士車隊發牌條件提出嘅修正案就遭到否決，陸頌雄建議將車隊持牌人需要擁有嘅的士數量，由原定嘅最低車隊規模嘅10%，即係大約10至30架的士，降低到成個車隊總數嘅5%，希望可以方便中小型車行或者個別獨立車主成立車隊引入競爭同市場開放性，至於車隊司機僱傭關係嘅比例，就由10%大幅增加至50%，陸頌雄認為增加僱傭關係會有助監察質素同降低保費，司機穩定受薪亦有助吸引新人入行，擔心如果車隊沿用原有嘅司機租車模式，服務質素好難會有改善，林世雄就回應指出，現時嘅的士司機多數係自僱，要求車隊聘用大量司機，會大大提高發展車隊嘅門檻，營辦商亦會因為咁而唔願意組織大型車隊，阻礙咗車隊嘅發展。


立法會議員田北辰表示，不滿政府冇趁今次修例引進的士司機最高工時，又認為當局只係增設的士車隊制，而唔係放寬私家車申請「出租汽車許可證」以合法載客嘅要求，的士服務就只會塘水滾塘魚，令更多市民選擇服務較好嘅「白牌車」，田北辰又認為加入的士車隊只係可以喺機場同跨境口岸獲得專屬嘅停車處，令加入車隊嘅誘因不足。


唔知你對以上嘅修例又有啲咩睇法？歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。

Mia

香港的士交易所 HKTEx 主播

2023年12月14日

P.S.：短片版本請於YouTube上收看：https://youtu.be/MRHznFeQSBo


 
 

的士牌市場資訊【首期只需56萬】2023年12月7日


大家好，歡迎收睇每星期嘅「的士牌市場資訊」，我係Olivia，今日同大家睇一睇最新嘅的士按揭資訊，了解一下如果現時購買一個市區的士牌連一架全新混能的士，到底首期係幾多，月供幾多錢，收租回報又係幾多。


我哋睇一睇以下呢個例子，我哋假設經買賣雙方議價之後，市區的士嘅成交牌價係345萬，而一架全新混能市區的士嘅車價係41萬全包，包首年全保保險同埋包首年牌費，另外車Cam咪錶都包晒，即係一架已經可以即時開工嘅的士，咁佢嘅成交價就係345萬加41萬，即係386萬。


我哋再以現時銀行提供嘅按揭貸款計劃嚟做計算，以全新市區混能的士為例，銀行按揭貸款金額最高大約可以借到330萬，計返嘅話，大約係成交價嘅8成半，咁以首期嚟講，以呢個例子嚟計算，就大約只需要56萬。


至於呢個按揭例子係做緊H按，係會以三個月嘅銀行同業拆息嚟做計算，個按揭利率係H加2.3，封頂位係P減1，而今日12月7號，銀行嘅三個月同業拆息H係5.41%，最優惠利率P係6.125%，因為以呢個例子睇，H加2.3係已經觸及到封頂位，所以就會以P減1嚟做計算，按揭利率即係5.125%，按揭年期最高可以做到三十年，360期，經過計算之後，月供就大約係HK$17,900，如果車主係將架車交俾我哋管理嘅話，我哋香港的士交易所提供全新市區混能的士嘅每月託管保證租金係HK$21,400，當中已經包晒所有日常基本維修保養，即係包括晒換呔、換偈油、換擋風玻璃等等。


我哋最後再同大家計埋個租金年回報，以成個資產價值386萬嚟計，佢個租金年回報大約有6.7%。


最後都要補充一句，要提提大家，記住的士牌價，同埋銀行按揭利率，每日都有機會唔同，我哋提供以上呢個例子，都盡量反映返最新嘅資訊，如果當你打算想購買的士牌嘅時候，歡迎下載我哋嘅App「HKTEx 一站式的士買賣租賃平台」，了解返最新嘅的士牌參考牌價同埋銀行嘅按揭利率資訊，密切留意我哋香港的士交易所，我哋下集見。


Olivia

香港的士交易所 HKTEx 主播

2023年12月7日

P.S.：短片版本請於YouTube上收看：https://youtu.be/X8Qx0cR66Y4


 
 
26272930
bottom of page