top of page

最新市場動態

的士牌市場資訊【投資價值無法挽回】2023年11月15日


大家好，歡迎收睇每星期嘅「的士牌市場資訊」，我係Olivia，要了解的士牌嘅投資價值，就要了解吓而家市面上的士嘅生意，呢個可以話係佢嘅最核心嘅價值，但係大家都知道，的士牌價最高峰時期係喺年年中，當時一個市區的士參考牌價係高達723萬，之後就開始回落，當時最主要回落嘅原因，就係Uber喺香港大肆宣傳，提供非法白牌車嘅服務，直接搶走唔少的士乘客嘅生意，更加標榜做Uber司機有可觀嘅收入，月入可達五六萬蚊，當時令唔少嘅的士司機轉揸Uber，直接影響的士嘅租賃市場，試問咁嘅情況又點樣唔影響的士牌嘅投資價值，又點樣唔影響的士牌價呢？就以今日2023年11月15號嘅市區的士牌參考牌價358萬嚟睇，比起最高峰時期723萬，呢7至8年間足足跌咗5成，有人就會問，咁白牌車嘅問題會唔會繼續影響的士牌價？牌價會唔會繼續下跌？其實就要好睇白牌車會唔會繼續喺香港擴大發展，的士嘅生意會唔會繼續被大量咁搶走，因為某程度上現時嘅的士牌價已經反映咗白牌車嘅影響，所以如果香港白牌車嘅問題有逆轉嘅改變嘅話，的士牌嘅投資價值就會上升，牌價亦都有機會回升。


當然，呢7至8年間的士牌價下跌係仲有其他原因，當中包括社會運動同新冠疫情對的士生意嘅影響，我哋可以睇吓運輸署最新嘅官方數據就會知道，平均每日公共交通乘客人次趨勢，我哋睇得到喺2019年中社會運動同疫情前嘅平均每日乘客人次大約維持喺1300萬嘅水平，之後最低跌到去第五波疫情大約600萬人次水平，跌幅超過5成，呢個數字其實都間接反映緊的士生意嘅情況，可想而知當時有幾大嘅影響，隨住疫情緩和同全面通關，乘客人次逐步上升，大家都期待市面復常嘅情況，可惜事實不似預期，訪港遊客人數回復唔到疫情前嘅水平，但反而港人北上消費嘅情況就有所上升，最近每逢假期時間北上嘅人數都多過南下訪港嘅人數，情況確實令人值得關注，雖然係咁講，但的士生意近年普遍都有逐步回升嘅情況，只係仲未回復到疫情前嘅水平，始終都對的士牌嘅投資價值有所影響，大家可以繼續留意呢方面嘅情況。


要睇的士牌嘅投資價值，除咗要了解的士生意嘅情況，另外都要了解租金回報嘅情況，現時租金金額已經回復到疫情前嘅水平，租金年回報更加超過6厘，呢方便大家都值得留意同參考。


到底的士牌嘅投資價值係無法挽回，定係都有回復嘅希望，歡迎留言分享你嘅睇法，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2023年11月15日

P.S.：短片版本請於YouTube上收看：https://youtu.be/MZEsA2JF_ms


 
 

專題探討【香港的士電子支付大落後】


大家好，我係Olivia，啱啱公佈嘅最新一份施政報告再次力推「數字政府」，內容指出香港政府收費服務一年內會全面落實電子支付，但實際呢個情況係已經慢過內地同其他國家地區好多，尤其係同市民息息相關嘅公共交通工具，佢哋嘅電子支付方式仍然相當落後，特別係的士。


有人會咁樣形容，現時要喺香港搭的士如果冇現金喺手，幾乎等於搭唔到的士，雖然有少部分嘅的士係設有電子支付，不過數量真係唔多，如果全香港嘅的士都可以俾乘客用電子支付，相信大部分嘅乘客都會贊成，有乘客接受傳媒訪問嗰陣表示，只能夠用現金俾的士車費會覺得好唔方便，散銀找續會比較麻煩，試過身上唔夠現金俾的士車費，搞到要的士司機等自己上樓拎錢，另外，亦有內地旅客表示，非常贊成香港嘅的士推行電子支付方式，認為內地都已經盛行電子支付，搭的士基本上都可以用微信支付。


立法會議員嚴剛最近去信立法會交通事務委員會建議政府盡快推動修例，強制要求全港嘅的士安裝電子支付系統，佢接受傳媒訪問嗰陣表示，喺內地嘅的士已經廣泛使用電子支付，而海外好多國家嘅的士亦都可以用信用卡付款，只係香港到而家都仲係用緊最原始嘅現金找數方式，為咗消除遊客嚟香港要用現金搭交通工具所引致嘅唔方便，佢建議政府盡快修訂相關條例，強制要求全港嘅的士安裝電子支付系統。


另外，的士車行車主協會永遠會長吳坤成就表示，有好多年紀比較大嘅司機覺得電子支付系統比較複雜，佢認為政府應該要有指引，甚至政策上嘅補貼，例如派發石油氣券或幫補燃料費等等嚟鼓勵司機用電子支付，自然就會有人帶頭使用支付系統，吳坤成又認為，政府應該要有鮮明啲嘅政策，更多元化咁推動電子支付，例如鼓勵開發商去開發新嘅電子支付系統，令交易程序變得更簡單。


其實香港發展電子支付並唔算得上落後，只係香港人喺呢二十幾年嚟都慣咗用八達通，但係有一樣嘢唔可以唔承認，香港喺的士電子支付嘅層面上面確實有啲落後，的士業界同電子支付系統公司都不斷努力發展同改進緊，例如喺Call的士App內增加更多嘅電子支付方法，另外亦都有開發商開發的士專用嘅電子支付系統等等，希望日後乘客能夠更方便咁支付的士車費。


咁今集就同大家講到呢一度，唔知你對以上內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台，密切留意我哋香港的士交易所，我哋下集見。


Olivia

香港的士交易所 HKTEx 主播

2023年11月1日

P.S.：短片版本請於YouTube上收看：https://youtu.be/Dgq4p4Ksro4


 
 

的士牌市場資訊【的士牌價跌至十年低位】2023年10月30日


大家好，歡迎收睇每星期嘅「的士牌市場資訊」，我係Mia，如果一直有留意開的士牌價嘅朋友，都應該知道最近的士牌價係有輕微嘅回升，就以今日10月30號最新嘅的士牌參考牌價，市區的士牌價368萬，新界的士牌價308萬，我哋就以市區的士牌價為例，比起8月份最低位嘅參考牌價353萬，上升咗15萬，大約升咗4.2%。


其實，如果我哋睇返過往十年嘅的士牌價走勢圖我哋可以睇到，現時嘅的士牌價正正處於十年嘅低位，由2015年年中開始就不斷尋底，的士牌價受到多方面嘅影響，例如白牌車嘅競爭，疫情嘅影響，銀行加息嘅情況，高昂保費嘅壓力等等，所以牌價下行壓力都仍然存在，不過又咁講，的士牌呢種資產，可以自行營運賺錢，亦都可以出租收取回報，自然吸引到投資者去持有，以現時一架市區的士全新混能車為例，佢嘅租金年回報大約有6.4厘，當然要留意嘅係呢個回報率係未扣除任何成本支出嘅，咁到底個牌價要去到咩價錢先叫合理呢？


另外，如果你想捕捉低位入市，你可以利用我哋HKTEx App嘅獨家功能「AI智能提示助理」去設定你自己嘅心水牌價，只需要簡單幾個步驟就可以設定好，之後只要App內有新嘅放盤又或者更新盤嘅交易條款係符合你嘅心水條件，系統就會自動配對，即刻通知你，等你可以把握到最好嘅入市時機，大家可以不妨試吓。


咁今集就同大家講到呢一度，唔知你覺得的士牌價要去到咩價錢先叫合理呢？歡迎留言分享你嘅睇法，繼續密切留意我哋香港的士交易所，我哋下集見。


Mia

香港的士交易所 HKTEx 主播

2023年10月30日

P.S.：短片版本請於YouTube上收看：https://youtu.be/5yyStnFiUFQ



 
 
28293132
bottom of page