top of page

最新市場動態

的士新聞資訊【5000萬資助換電動的士 讓的士優先充電】2023年10月25日



大家好，歡迎收睇「的士新聞資訊」，我係Olivia，啱啱公佈嘅最新一份施政報告提出多項海陸空交通綠色運輸措施，當中為咗推動的士業界轉型電動的士，政府提出預留5000萬資助業界購買可以提供輪椅上落嘅電動的士，消息指呢一筆資助係會以津貼形式發放，另外，當局早前宣布會調整油站土地契約條款，去推動油站加裝電動車充電設施，施政報告指出，下年首季當局將會為兩幅嘅空置油站用地轉為充電站招標，據知兩幅用地分別位於九龍東同火炭，而全港現時有180個油站，消息人士預計日後油站會轉型，可提供至少過百座充電器，為咗鼓勵業界轉型電動的士，油站充電器或會優先提供俾的士使用，並且研究規管的士充電收費水平，設立收費上限又或者為業界提供津貼等等。


政府喺上年2月嘅財政預算案提出為的士業界提供上限35萬百分百擔保嘅貸款計劃，以鼓勵業界轉型電動的士，當時當局話全港有2部電動的士營運緊，而貸款計劃上個月正式推出，消息透露，本港現時營運緊嘅純電動的士唔夠10部。


政府嘅消息人士形容，一架的士每日平均行走400公里，充電需求大，加上業界期望喺交更時間內可以完成充電，所以政府為的士業界提供充電器嘅工作有好大嘅挑戰，當局今年內會向油站營運商提供加裝充電器嘅營運要求資料，開放俾營運商自行申請，消息又指出，當局會積極研究油站內可唔可以提供飲食﹐俾的士司機可以善用等候充電時嘅時間。


至於整體嘅充電設施，報告指出政府目標喺2027年中前將香港公共同私人充電停車位嘅總數提升到大約20萬個，而下年上半年政府會制訂全港公共巴士同的士嘅綠色轉型路線圖同時間表。


咁今集就同大家講到呢一度，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App「HKTEx 一站式的士買賣租賃平台，密切留意我哋香港的士交易所，我哋下集見。


Olivia

香港的士交易所 HKTEx 主播

2023年10月25日

P.S.：短片版本請於YouTube上收看：https://youtu.be/OjILcyriGa0



 
 

的士新聞資訊【日本本田推無人駕駛的士】2023年10月19日


大家好，歡迎收睇「的士新聞資訊」，我係Mia，日本嘅本田汽車同美國嘅通用汽車喺2023年10月19號宣布合作開發無人駕駛的士，目標係喺2026年喺日本東京推出無人駕駛的士服務。


本田汽車表示，將會同通用汽車喺美國開發無人駕駛服務嘅公司，喺明年上半年成立合作嘅公司，開始有關喺2026年推出無人駕駛的士嘅計劃，有關嘅無人駕駛的士將會達到日本嘅第4級無人駕駛技術程度，即係屬於完全自動駕駛，喺冇駕駛者嘅情況下可以乘坐6人嘅的士，目標係喺日本東京嘅部份地方推出，冇特定路線嘅無人駕駛的士。

有關計劃嘅初期目標將會設立幾十部無人的士，之後再擴充至大約500部，其實日本各個地區都正在努力推動第4級嘅無人駕駛系統，並且喺一啲小型巴士同埋公共交通上面使用。

其實無人駕駛的士已經喺世界唔同嘅地區努力發展緊，唔知幾時又會喺香港發展無人駕駛的士呢？歡迎留言發表你嘅睇法，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。

Mia

香港的士交易所 HKTEx 主播

2023年10月19日

P.S.：短片版本請於YouTube上收看：https://youtu.be/bkYj2dS9xIY



 
 

的士新聞資訊【不同顏色的士車隊 擔心難於分辨】2023年10月17日


大家好，歡迎收睇「的士新聞資訊」，我係Olivia，政府計劃引入「的士車隊」以改善的士服務質素，立法會一個審議相關條例草案委員會喺早前開會，運輸及物流局預計初期會有3至4隊「的士車隊」參與，有唔同嘅服務定位，例如專門做商務市場或機場口岸嘅車隊，各車隊可以自行設計車身顏色同標記，方便同現時嘅紅綠藍的士區分，不過有議員就質疑如果日後「的士車隊」出現好多唔同嘅顏色，會令到市民難於分辨，當局就回應指出，的士車身設計需要由運輸署審批，的士車隊要掛上「識別牌」嚟區分行走路線。


當局指出現時嘅的士營運模式對持續確保服務質素有局限，因為現時嘅18163個的士牌照發牌嗰陣時係冇附帶任何直接或者間接同服務質素有關嘅條件，政府只能夠根據《道路交通條例》對的士司機採取執法行動，當局嚟緊建議推行嘅「的士車隊」模式，係由現時持有的士牌嘅車主合組而成為「的士車隊」，再向運輸署申請的士車隊牌照。


至於的士車身顏色方面，議員謝偉銓就提出咗質疑，因為現時本港嘅的士主要分為紅綠藍三種顏色，分別代表可以行駛唔同地區同範圍，如果日後唔同嘅「的士車隊」有唔同嘅車身設計，會唔會有太多花式，會令市民難以分辨。


運輸及物流局首席助理秘書長郭善兒就指出，車隊嘅負責人可以將的士車身嘅顏色寫喺申請書上面，如果運輸署署長認為設計係可以接受嘅話，日後的士車隊將會按照發牌時嘅設計同顏色去營運，郭善兒又指出，預計唔會有好多唔同車隊去營運，估計最初只會有幾支車隊，而政府係會加強宣傳去教導市民分辨，但議員謝偉銓再追問，市民日後點樣喺街上分別的士車隊嘅行走區域範圍，郭善兒就回應指出，當局會要求所有的士車要掛上「識別牌」嚟區分行走路線，等市民可以清楚的士車隊嘅服務地區同範圍。


咁今集就同大家講到呢一度，唔知你對以上嘅內容又有啲咩睇法，歡迎留言，如果想了解更多最新嘅的士牌資訊，歡迎下載我哋嘅App 「HKTEx 一站式的士買賣租賃平台」，密切留意我哋香港的士交易所，我哋下集見。


Olivia

香港的士交易所 HKTEx 主播

2023年10月17日

P.S.：短片版本請於YouTube上收看：https://youtu.be/G7xhiXzJk8Y



 
 
29303233
bottom of page