top of page

最新市場動態

的士新聞資訊【的士小巴商總會取消車租建議 避免違反競爭條例】2023年7月12日


大家好，我係Olivia，今日同大家睇睇一單有關的士嘅新聞。


喺今日，香港的士小巴商總會向所有商會會員發出咗內部通告，表明將會糾正過往向會員提供的士車租建議嘅做法，競爭事務委員會就呢件事表示歡迎。


競委會表示，留意到的士小巴商總會過往不時會發出無約束力嘅車租建議，建議商會嘅會員對的士車租作出調整，會員包括一啲的士車行同埋一啲個人嘅的士車主，期間亦都有會員確實曾經採納商會嘅建議嚟調整車租。


競委會指出，佢哋早前同商會嘅代表會面同埋表達關注之後，商會迅速作出咗回應，並且喺今日7月12號發出咗內部通告，通知商會會員，指商會將會即時停止提供車租建議，日後會改為以不記名嘅方式，發佈過往車租嘅綜合季度數據，供會員參考，商會亦都提醒，會員之間唔應該協調所收取嘅車租，避免違反《競爭條例》。


競委會認為，商會糾正咗之前嘅做法，將會消除咗車租建議可能對的士車行同車主自行決定車租嘅影響，促進佢哋之間嘅競爭，如果的士業界內有有效嘅競爭，或者會令的士司機帶嚟更多嘅選擇，同埋帶嚟潛在較低嘅車租。

競委會喺佢哋嘅《第一行為守則指引》所講，《競爭條例》嘅第一行為守則適用於行業協會所作出嘅決定，包括不具約束力嘅決定，競委會尤其認為，行業協會向會員提供收費表或者價格建議，可能會損害競爭，而作為業務實體嘅會員若實施行業協會嘅反競爭決定，有關會員同埋協會都可能需要負上條例下嘅法律責任，行業協會必須要提高警覺，切勿從事反競爭安排，並且應該避免建議或要求會員將產品嘅價錢或服務嘅收費定喺某指定嘅水平。


競委會鼓勵所有行業協會主動審視佢哋嘅做法，如有需要時，應作出適當嘅修改，以確保全面符合《競爭條例》嘅規定，任何人士如果知道行業協會或會員從事反競爭行為，應該立即向競委會作出舉報。


咁今集就同大家講到呢一度，歡迎留言分享你嘅睇法，我哋下集見！


Olivia

香港的士交易所 HKTEx 主播

2023年7月12日

P.S.：短片版本請於YouTube上收看：https://youtu.be/LyJiXrX5H9o



 
 

的士牌市場資訊【新界的士租金回報】2023年7月


大家好，歡迎收睇「的士牌市場資訊」，我係Mia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今集就會特別少少，因為平時我哋都會集中講解市區的士，但係今日就會嘗試同大家講解一吓新界的士，睇吓到底而家投資一個新界的士牌，佢個租金年回報係有幾多，我哋就以現時投資一架新界的士牌連全新混能車為例，我哋香港的士交易所提供嘅每月託管保證租金係HK$17,200，而一年車主收到嘅租金總數就有HK$206,400，以呢架的士嘅資產總值HK$366萬嚟計算，佢嘅租金年回報係大約5.6厘，另外，如果車主係申請銀行按揭貸款嚟投資嘅話，以現時嘅數字嚟計，佢嘅投資首期金額就只需要HK$61萬，我哋再用佢嘅投資金額嚟計佢嘅槓桿年回報，係大約可以做到33.8厘。


希望以上嘅資訊，可以俾你參考吓，計算吓的士牌嘅投資價值，但最後都要補充一句，要提提大家，記住的士牌價、同埋銀行按揭金額，每日都有機會唔同，另外的士租金亦都會根據物價通脹同實際市況而有所調整，我哋提供以上呢個例子，都盡量反映返最新嘅市場資訊俾你做參考，如果你隨時想知道最新嘅數字，歡迎聯絡我哋。


咁今集就同大家講到呢一度，至於到底投資市區的士好，定係新界的士好，我哋下一集就同大家講解分析一吓，密切留意我哋香港的士交易所，我哋下集見！


Mia

人工智能主播

香港的士交易所 HKTEx


2023年7月10日

P.S.：短片版本請於YouTube上收看：https://youtu.be/y4DnaOZlW4E



 
 

的士新聞資訊【建議推出6座的士 引入車隊及罰則制度】2023年7月5日


大家好，我係Mia，今日同大家睇睇一單有關的士嘅新聞。


香港的士嘅服務質素經常都會引起大眾關注，運輸及物流局喺今日7月5號向立法會提交文件，建議將的士座位數量上限，由五座位增加至六座位，另外，當局認為有必要引入新嘅制度規管，推出車隊制度，由現有車主集合的士組成車隊，再向運輸署申請車隊牌照。


文件顯示，的士車隊需要符合一定嘅要求，例如的士車齡唔可以多過三年，車隊必須包括至少一成輪椅的士或者車廂寬敞嘅豪華的士，至於車費方面，當局容許車隊收取乘客預約費，例如乘客喺繁忙時間預約，或者要求豪華車款嘅時候，車隊持牌人可以收取較高嘅預約費，當局表示，上述建議會喺7月7號刊憲，7月12號開始首讀同二讀。


運輸局指，現時的士嘅營運模式，對持續確保整體的士服務質素有相當嘅局限，全港的士牌照總數有18163個，但係當初簽發牌照嘅時候，並冇附帶任何同服務質素有關嘅條件，政府唔能夠根據牌照條件嚟懲罰服務欠佳嘅車主同司機，另外又指出，的士牌照擁有權相當分散，現時大約有10900個牌照係由8000位持牌人，以個人名義持有，餘下大約7300個牌照，就由1000個持牌人單位，以公司名義擁有，喺呢9000人或公司當中，大約75%持有一個牌照，由於擁有權分散，當局認為令規管更困難。


基於上述嘅原因，局方認為有必要引入新嘅管理制度，以提升的士服務質素，所以建議推出的士車隊制度，喺呢個制度之下，車隊牌照並非營運的士嘅必要牌照，亦唔會取代現有嘅的士牌照，當局指，現有車主可以集合的士組成車隊，再向運輸署申請牌照，如果車隊包括紅的，車隊規模需要有300至1000架的士，如果係純粹由新界的士組成，就只需要有100至350架的士。


當局指，車隊持牌人必須係香港註冊公司，每次牌照期限唔超過五年，但係可以視乎中期評核結果續牌，至於的士規格，的士加入車隊嘅時候，車齡唔可以多過三年，而整個牌照期內，車齡唔可以超過十年，另外，每個車隊需要至少有一成係輪椅的士，又或者係車廂寬敞嘅豪華的士，而且每架車隊的士都需要設有監察司機駕駛表現嘅安全裝置，同埋提供網約渠道俾乘客Call車。


至於司機方面，車隊當中需要至少有一成嘅的士司機，係同持牌人屬於僱傭關係，而且司機必須完成由持牌人安排嘅職前訓練。


為咗鼓勵的士業界參與，局方建議，准許持牌人為車隊設計車身同標記，從而同一般嘅的士區分，幫助車隊建立品牌，另外，車隊可以收取乘客預約費，例如乘客喺繁忙時間Call車，又或者選擇豪華車款嘅時候，持牌人係可以訂立一個較高嘅預約費用，不過，如果乘客純粹喺街頭截車，佢俾嘅車費，係同其他一般的士冇分別。


另外，除咗推出車隊制度，當局又建議引入六座位的士，政府認為，現時全港八成嘅的士係四座位，只有兩成係五座位，但係喺乘客角度嚟睇，六座位嘅的士會更加方便同寬敞，尤其係攜帶行李來往機場同跨境口岸嘅乘客，當局指，六座位的士嘅收費會同現時嘅四至五座位嘅的士一樣。


對於一啲的士嘅罪行，當局亦建議引入兩級制罰則，針對濫收車資、拒載、修改咪錶等等嘅罪行，初犯者會維持現時嘅最高罰款1萬元同監禁6個月，而再犯者則最高可以被罰款2萬5千元同監禁12個月。


另外，為咗加強打擊「白牌車」非法載客取酬，當局表示會建議加強罰則，包括提高罰款，初犯最高罰款1萬元，再犯則最高罰款2萬5千元，並且將吊銷期及扣押期由現時初犯判處3個月同再犯判處6個月，分別增加到初犯判處6個月同再犯判處12個月。


咁今集就同大家講到呢一度，歡迎留言分享你嘅睇法，我哋下集見！


Mia

香港的士交易所 HKTEx 主播

2023年7月5日

P.S.：短片版本請於YouTube上收看：https://youtu.be/HzZZzspJxAE




 
 
35363839
bottom of page