top of page

最新市場動態

的士新聞資訊【深圳無人的士一折價錢試運】AI女主播｜廣東話｜2023年6月19日｜無人的士試運｜無人駕駛技術｜深圳坪山區｜百度蘿蔔快跑


大家好，我係A.I.Olivia，今日同大家睇睇一單有關的士嘅新聞。


由百度開發營運嘅「蘿蔔快跑」自動駕駛出行服務平台，正式獲得深圳坪山區頒發嘅「首批智能網聯汽車無人商業化試點通知書」，可以喺坪山區開展L4級無人駕駛商業化收費營運，市民有望可以喺深圳坐到「無人的士」。


用戶可以通過「蘿蔔快跑App」、微信小程式、百度地圖或百度App等等嘅平台，預約「無人的士」，的士會自動駕駛到用戶嘅定位地址，乘客喺後排座位入座之後，自行點擊「開始行程」嘅按鈕，即可起步。


根據「無人的士」嘅乘車要求，14歲以下同埋60歲以上嘅人士係唔可以使用呢個服務，未滿18歲嘅人士需要喺監護人嘅陪同之下乘搭，車內前後排有玻璃阻隔，前面司機位置係冇安全人員陪同，副駕位置暫時亦唔可以坐人，禁止乘客干擾自動駕駛，所以一架車只係容許最多3位乘客坐喺後排座位，另外，寵物係唔可以攜帶上車。


「蘿蔔快跑」目前以一折嘅超低優惠價對外提供「無人的士」服務，例如行駛6公里原價大約係40元人民幣，但乘客而家只需要俾4元人民幣就可以乘搭得到，行駛過程中「無人的士」嘅最高時速係40公里，乘客可以喺車內自行手動調教溫度、播放音樂等等，屏幕同時會顯示車速、周邊車輛嘅資訊同埋剩餘路程嘅資訊等等。


據了解，百度「Apollo」運營嘅「蘿蔔快跑」喺深圳投放嘅自動駕駛車型號為2021年發布嘅第五代量產無人車「Apollo Moon」，配有13個攝錄鏡頭、5個毫米波雷達同埋兩個激光雷達。

另外，百度亦設置咗「5G雲代駕員」，喺自動駕駛無法通過嘅場景下使用遠程協助，並且喺結束之後，幫助車輛回復自動駕駛狀態，如果乘客遇到緊急情況，亦都可點擊屏幕上面嘅「緊急求救」按鈕，向「雲代駕員」請求幫助。

目前，無人自動駕駛服務已經喺北京、武漢、重慶3個城市落地，而深圳係全中國首個開啟無人自動駕駛商業化嘅一線城市，喺坪山區率先起步，推動深圳嘅智能網聯汽車產業持續發展。

咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年6月19日

P.S.：短片版本請於YouTube上收看：https://youtu.be/GJ-_iAim75c



 
 

的士牌市場資訊【的士牌價持續回落】2023年6月｜AI女主播｜廣東話｜加息壓力｜的士租金回報上升｜加息見頂預期｜香港的士交易所 HKTEx


大家好，歡迎收睇「的士牌市場資訊」，我係A.I.Olivia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日就同大家睇一睇2023年，頭5個月，的士牌價嘅走勢表現，我哋先睇一睇頭5個月嘅走勢圖表。市區的士牌價由年頭441萬，去到6月頭415萬，下跌咗26萬，大約下跌咗係5.9%，至於新界的士牌價就由年頭341萬，到6月頭337萬，輕微跌咗4萬，大約係1.2%。


其實喺呢個圖表我哋可以睇到，今年年初頭兩個月，的士牌價係有明顯嘅升幅，主要受到全面通關嘅消息同埋租金上升所帶動，的士牌買賣交投活躍，帶動牌價亦有所上升。


但係到咗農曆新年假期過後，交投逐步慢慢回落，由於銀行按揭貸款息口持續上升，投資者對加息嘅情況感到壓力，再加上市場上嘅投資氣氛一般，香港股市同樓市呢幾個月嘅表現都唔係咁好，所以某程度上都影響咗投資的士牌嘅情況，的士牌價近期都持續回落。


今日2023年6月14號最新嘅的士牌價參考價係，市區的士牌價411萬，新界的士牌價329萬。


但係大家值得留意嘅係，近期嘅的士租金係不跌反升，如果的士牌價係繼續回落嘅話，佢嘅租金年回報會繼續上升，而家嘅租金年回報已經超過5厘，大家可以留意呢一點嚟做投資計算。另外，大家要繼續留意息口嘅走勢，睇吓今年打後會唔會出現加息見頂嘅情況，最後，當然要繼續留意的士生意嘅回復情況，我哋會同大家繼續睇住個市況，一有最新消息，會同大家講解分析。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Olivia

人工智能主播

香港的士交易所 HKTEx


2023年6月14日

P.S.：短片版本請於YouTube上收看：https://youtu.be/s_cDK4vUggk



 
 

的士新聞資訊【的士服務質素評分下跌】 AI女主播｜廣東話｜2023年6月14日｜的士服務質素調查｜香港的士業議會｜的士司機｜香港的士交易所 HKTEx


大家好，我係A.I.Olivia，今日同大家睇睇一單有關的士嘅新聞。


香港的士業議會最近公佈咗新一份「的士服務質素調查」，喺今年4月至5月期間，議會委託咗恆生大學進行問卷調查，喺全港各區以面對面嘅方式，對1211位的士乘客進行訪問，結果顯示，有超過一半嘅受訪者認為，的士整體服務質素屬於良好或者優秀，只有大約9%嘅受訪者認爲係較差或者極差，而的士整體服務質素評分，以100分為滿分，結果獲得58.4分，但係呢個分數比起上一次3年前嘅調查結果下跌咗7分。


另外，調查期間亦都邀請咗受訪者對13項嘅的士服務元素進行評分，當中以「的士司機待客以禮」獲得最低分，5分滿分，只係有3.21分，第二低分嘅係「的士很環保」，獲得3.22分，而第三低分嘅係「的士司機主動向乘客提供協助」，獲得3.24分。


至於最高分嘅項目包括：「的士車身同車廂清潔」，有3.45分，「的士車廂寬敞、座位舒適」，有3.44分，「的士車廂溫度適中」，都係有3.44分，以上都係以5分滿分嚟做計算。


香港的士業議會主席黃卓邦認為，呢3年嚟社會環境同埋的士行業生態嘅變化都好大，司機嘅流失，同埋司機年紀老化嘅情況嚴重，可能係因為呢啲原因而導致的士服務質素評分有所下降，黃卓邦表示，議會將會繼續喺業界推行獎勵計劃，去鼓勵的士司機改善服務質素，但對於整體嚟講，香港的士嘅整體服務質素評分有接近60分，雖然評分唔算高，但都仍然係屬於滿意嘅水平，明白到係仲有好多改善嘅空間，希望的士業界繼續努力，去迎合乘客嘅期望，另外，黃卓邦又表示，支持運輸署推行的士司機違例計分制度，可以有效咁揪出業界嘅害群之馬，佢同時亦都建議政府要加強打擊「白牌車」，改善的士嘅經營環境，吸引更多青年入行。


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年6月14日

P.S.：短片版本請於YouTube上收看：https://youtu.be/THNd-VuTlxE



 
 
37384041
bottom of page