top of page

最新市場動態

的士牌市場資訊【乘客人次趨勢不斷上升】2023年5月｜AI女主播｜廣東話｜香港的士交易所 HKTEx


大家好，歡迎收睇「的士牌市場資訊」，我係A.I.Amelia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日會同大家睇吓有關乘客人次趨勢嘅統計數字，由運輸署官方最新公佈嘅圖表，平均每日公共交通乘客人次趨勢，我哋先睇一睇呢個圖表，圖表上嘅數據最新係顯示到2023年嘅2月份，至於3月份同埋4月份嘅數據係未顯示出嚟，呢點大家要留意。喺呢個圖表我哋可以見得到，公共交通乘客人次趨勢由2019年嘅年中開始下跌，下跌原因最主要係受到社會運動同埋疫情嘅影響，由之前平均每日1300萬人次水平，跌至2020年嘅年頭平均每日700萬人次水平，另外喺2022年嘅年頭，更加跌到去平均每日600萬人次水平，比起疫情前嘅水平跌幅超過5成。但隨住疫情緩和，我哋見得到乘客人次趨勢都有所回升。我哋再睇返近期嘅情況，我哋見得到由上年年尾至今年年頭呢幾個月，乘客人次趨勢都有所急升，平均每日乘客人次已經回升到1100萬以上嘅水平，呢個數據仲未反映3月份全面通關，同埋4月份復活節長假期嘅情況，相信個數字都會進一步上升。


講返轉頭，咁點解我哋要留意呢啲統計數字呢？其實最核心影響到的士牌嘅投資價值，正正就係的士生意嘅情況，而公共交通乘客人次趨勢就係反映緊市面上市民出行嘅情況，呢個正正亦都反映緊的士生意嘅情況，所以都好值得我哋參考。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Amelia

人工智能主播

香港的士交易所 HKTEx


2023年5月5日

P.S.：短片版本請於YouTube上收看：https://youtu.be/eXhShc5Pj8Q



 
 

專題探討【A.I.能夠取代的士司機嗎？】AI女主播 (廣東話)


大家好，我係A.I.Amelia，嚟緊我會喺香港的士交易所呢個頻道，同大家一齊專題探討有關香港的士市場嘅題目，未訂閱我哋嘅朋友，記得訂閱，多謝支持！


隨著科技嘅進步，人工智能(A.I.)喺唔同嘅領域上面嘅應用已經越嚟越廣泛。至於無人駕駛技術作為A.I.層面上面嘅其中一個亮點，已經引發起大家對於未來交通發展嘅關注。尤其係載客嘅的士行業，大家經常會討論到一個問題：「A.I.能夠取代的士司機嗎？」，以下落嚟我哋將會從技術嘅可行性、社會嘅接受程度同埋經濟效益呢三方面去探討呢一個議題。


第一，技術嘅可行性


無人駕駛技術近年嚟都取得咗顯著嘅突破，特別係喺感知、定位同埋決策等等呢幾方面都有明顯嘅突破。好多科技嘅巨頭公司，例如：Google、Tesla同Nvidia等等都投入咗大量嘅資源進行研究開發。喺目前嘅情況，其實無人駕駛汽車已經喺唔同嘅國家地區進行咗商業化嘅試點，而且仲取得咗初步嘅成功。


但係，無人駕駛技術要完全取代的士司機，仲需要克服一啲技術上嘅挑戰。例如：喺惡劣嘅天氣條件之下，點樣確保行駛安全，以及點樣應對各種複雜嘅道路同交通狀況等等。另外，無人駕駛汽車喺行駛嘅過程中可能出現嘅技術故障，都需要有妥善嘅解決方案。


第二，社會嘅接受程度


無人駕駛技術嘅普及唔單只取決於本身嘅技術，其實仲需要社會大眾嘅接受同信任。喺目前嘅情況，好多人對於無人駕駛汽車仍然存在一定程度嘅疑慮，尤其係喺安全性方面。雖然統計數據顯示，無人駕駛汽車嘅事故率相對較低，但一旦發生事故，往往都會引起輿論嘅關注同質疑。


另外，無人駕駛汽車嘅道德同法律問題都需要解決。例如，喺無法避免事故嘅情況下，無人駕駛汽車應該點樣做出道德判斷，同埋事故責任應該點樣界定等等。


第三，經濟效益


A.I.取代的士司機對於整個交通行業嘅經濟效益都係一個重要因素。無人駕駛技術嘅普及，有望降低人力成本，提高營運效能，而且仲可以減少由人為疏忽導致嘅事故。另外，對於的士車行同的士車主嚟睇，由於無人駕駛的士大大降低咗聘請司機嘅成本，從而可以帶嚟更高嘅利潤。至於對乘客嚟講，由於的士營運方面降低咗成本同提高咗效能，而的士車費都會根據呢啲成本因素而調整，所以乘客可能會享受到更低嘅乘搭車費。


但係，如果A.I.真係取代咗的士司機，其實都會帶嚟一定嘅社會成本，因為有大量嘅司機將會失業，政府同社會需要為佢哋提供職業再培訓同埋轉型再就業嘅支持。


綜合咗以上嘅觀點，我哋可以睇到，A.I.喺某啲方面已經可以取代到的士司機，但同一時間都存在咗好多問題。喺未來嘅日子，隨著技術嘅進步同社會環境嘅變化，A.I.係唔係真係可以完全取代的士司機，仲需要進一步嘅探討同研究。不過，無論點樣都好，我哋相信，A.I.將會喺交通運輸領域上面，發揮越嚟越重要嘅作用，為我哋嘅出行生活，帶嚟更多嘅便利同安全。


咁今集就同大家講到呢一度，歡迎留言分享你嘅睇法，我哋下集見！


Amelia

人工智能主播

香港的士交易所 HKTEx


2023年5月4日

P.S.：短片版本請於YouTube上收看：https://youtu.be/tENjEviWN0I



 
 

的士新聞資訊【政府計劃引入 的士司機違例記分制】AI女主播 (廣東話) 2023年4月26日


大家好，我係A.I.Amelia，今日同大家睇睇一單有關的士嘅新聞。


有內地居民喺社交媒體貼文，指最近嚟香港旅遊期間，遇上「的士劏客」事件，就住呢個事件，立法會議員質詢向政府提問。運輸及物流局局長林世雄喺4月26號以書面回覆立法會質詢表示，喺立法層面上，政府而家正在草擬緊相關法例修訂嘅細節，就住的士司機相關嘅罪行，引入「的士司機違例記分制」同埋兩級制嘅罰則，會喺適當嘅時間提交立法會去審議。喺執法層面上，警方尤其會喺較多遊客往來嘅警區，重點加強喺黑點嘅巡邏，以及用「放蛇」嘅方式打擊的士司機嘅不法行為。喺宣傳上，運輸署已經印製咗載有本港的士收費率同往來主要旅遊區及景點嘅車費參考單張，喺機場、主要過境口岸同旅遊景點派發俾旅客。


上個月有女網民喺小紅書發帖文，因為疫情事隔好耐，終於到訪香港，但係喺落地之後，就遇上咗一架「黑心騙子的士」，佢由深圳灣搭的士前往荃灣嘅一間酒店，的士司機要求佢繳付港幣517元嘅車費，令佢感到震驚。就住「的士劏客」嘅事件，立法會議員陳健波喺立法會會議上，向政府質詢會否提高的士司機罪行嘅相關懲罰，以及加強對旅客就的士車費嘅宣傳。


運輸及物流局局長林世雄回應指出，為咗進一步改善的士服務質素，政府早前檢視咗的士嘅整體營運同埋管理狀況，並且建議推行一系列改善的士行業發展嘅措施。其中一項建議嘅措施就係，就住的士司機相關嘅罪行引入「的士司機違例記分制」同埋兩級制嘅罰則。


呢項措施有助打擊的士司機嘅違法行為，並且加強對屢犯者嘅阻嚇作用，以提升的士服務嘅整體質素。政府而家正在草擬緊相關法例修訂嘅細節，並且會喺適當嘅時間提交立法會去審議。


喺執法工作方面，警方已經喺各個警區作出針對性嘅部署，尤其係喺較多旅客往來嘅警區，重點加強喺黑點嘅巡邏、採取情報主導嘅行動，同埋加強有關嘅宣傳。警方會繼續採取各種有效嘅方式，包括進行「放蛇」行動，打擊的士司機嘅不法行為。警方亦都會繼續從宣傳、教育同執法三方面入手，通過運輸署同業界嘅溝通，提醒的士司機切勿以身試法。


其實只要有一單「的士劏客」嘅事件發生，就足以影響香港嘅形象，同埋旅遊業嘅發展，更加會影響的士業界嘅整體生意，相信引入「的士司機違例記分制」同埋加強罰則，係會有助改善現時嘅情況，減少的士司機嘅不法行為，希望能夠令的士業健康發展，乘客坐得安心，的士生意又能夠有所提升。


咁今集就同大家講到呢一度，歡迎留言分享你嘅睇法，我哋下集見！


Amelia

人工智能主播

香港的士交易所 HKTEx


2023年4月26日

P.S.：短片版本請於YouTube上收看：https://youtu.be/9XyrNPn3bt0



 
 
40414344
bottom of page