top of page

最新市場動態

的士牌市場資訊【加息壓力 的士牌價有所回落】2023年4月


大家好，歡迎收睇「的士牌市場資訊」，我係A.I.Amelia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱！多謝支持！


咁今日就同大家睇一睇2023年第一季至今，的士牌價嘅走勢表現，我哋先睇一睇第一季嘅走勢圖表。市區的士牌價由年頭441萬，到3月尾443萬，輕微上升咗2萬，大約係0.5%，至於新界的士牌價就由年頭341萬，到3月尾362萬，上升咗21萬，大約上升咗6.2%。


其實係呢個圖表我哋可以睇到，今年年初1月至2月，的士牌價都有明顯嘅升幅，2月中市區的士牌價更回升至470萬嘅水平，比起上年11月尾低位420萬左右，3個月內回升咗成12%，最主要受惠於解除防疫措施同埋全面通關嘅消息所帶動，同時的士市場上租金回報亦有所回升，投資者對前景樂觀，的士牌買賣交投活躍，帶動牌價上升。


但係到咗農曆新年假期過後，交投逐步慢慢回落，最主要係因為銀行按揭貸款息口高企，而且投資者對加息嘅情況感到壓力，投資者都抱住觀望嘅態度，阻礙咗的士牌買賣交投嘅情況。


今日2023年4月26號最新嘅的士牌價參考價係，市區的士牌價434萬，新界的士牌價358萬，近期牌價確實有所回落。


其實投資者對後市前景唔使過份嘅悲觀，雖然息口對於按揭供款嘅壓力增加咗，但根據專家嘅評論認為，今年內加息見頂嘅機會率好高，對於一啲需要做按揭貸款嘅車主黎講，可以話係減低壓力嘅一個希望。另一方面，由於的士租金近期都有所回升，帶動投資的士牌嘅租金年回報都有所上升，而家租金年回報已經超過5厘，大家可以留意呢一點嚟做投資計算。另外仲有一樣嘢大家都值得留意，全面通關帶動經濟復甦係需要時間，的士生意回升係需要由旅遊業復甦嚟帶動，所以亦都需要時間去回復，投資者對後市前景唔使過份嘅悲觀。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Amelia

人工智能主播

香港的士交易所 HKTEx


2023年4月26日

P.S.：短片版本請於YouTube上收看：https://youtu.be/nCgDkkj-6sw



 
 

的士新聞資訊【比亞迪承諾改善電動的士爬坡性能】AI女主播 (廣東話)


大家好，我係A.I.Amelia，今日同大家睇睇一單有關的士嘅新聞。


立法會大灣區訪問團喺4月22號展開第二日嘅行程，早上先到達比亞迪汽車基地參觀電動車技術同埋試坐「雲巴」。環境及生態局局長謝展寰被問到香港實施電動的士嘅情況，謝展寰回應指出，比亞迪知道電動的士爬坡性能不足嘅問題，會盡快進行調整，改善新一批供港電動的士嘅性能。


謝展寰又指出，今屆政府嘅目標係引入3000架電動的士，指比亞迪係其中一個重要嘅合作夥伴，需要搵到合適本港嘅型號先可以成功推動電動的士。


局長透露，香港已經有兩架電動的士實行緊初步嘅試驗，但係因為香港同深圳兩地實行有差距，香港因為地形問題，的士係需要較強嘅爬坡能力，而家電動的士嘅表現同埋預計有一定嘅差距。局長表示，佢今日已經同廠商商議咗有關呢個情況，比亞迪承諾會盡快進行調整，以改善新供港電動的士爬坡性能較遜色嘅問題。


根據立法會環境事務委員會文件顯示，截至2023年3月底，基金已批出23架新款電動的士嘅試驗申請，並會繼續透過基金推動業界試驗新一代嘅電動的士。


雖然電動的士嘅發展係大勢所趨，但係要喺香港發展電動的士，仍然有好多其他問題要解決，例如：充電站嘅數量同分布、電池嘅續航能力、充電時間長短同埋電池保養維修成本等等，相信政府如果要順利推動電動的士嘅發展，都仲要努力解決以上種種嘅問題，我哋可以繼續密切留意發展情況。


咁今集就同大家講到呢一度，歡迎留言分享你嘅睇法，我哋下集見！


Amelia

人工智能主播

香港的士交易所 HKTEx


2023年4月22日

P.S.：短片版本請於YouTube上收看：https://youtu.be/H4Yw67nIQRg



 
 

的士新聞資訊【的士意外近半涉年老司機 政府積極檢討體檢要求】AI女主播 (廣東話)


大家好，我係A.I.Amelia，今日同大家睇睇一單有關的士嘅新聞。


近期接連有年老嘅的士司機發生交通意外，社會極度關注情況。運輸及物流局局長林世雄早前透露，過去三年，平均每月都有大約300宗涉及的士嘅意外，即係平均每日都有約十宗左右，其中接近一半都係涉及60歲或以上嘅的士司機。因應呢個情況，政府早前檢討體檢要求，局方表示，而家正在整理緊部分建議嘅細節同安排，預計今年年中前開始諮詢工作，以盡快落實檢討結果同埋具體嘅推行細節。


根據當局嘅數據顯示，2020年至2022年期間，每月平均都有超過300宗涉及的士嘅意外，當中以2021年為最多，每月平均有364宗。至於上年2022年，平均每月有318宗，即係全年大約有3816宗，如果根據年齡去分類，2022年平均每月有152宗意外係涉及60歲或以上嘅的士司機，佔整體的士意外宗數嘅47.8%，其次就係40至59歲嘅的士司機，平均每月有135宗，佔整體的士意外宗數嘅42.5%。


根據現時嘅規例，年滿70歲或以上嘅人士，喺申請駕駛任何種類汽車嘅正式駕駛執照嗰陣，係需要提供一份由醫生簽署嘅體格檢驗證明書，運輸署已經喺上年6月份，成立咗專家小組，檢視現行體格檢驗證明書嘅內容。運輸局指，已經同專家小組成員就主要嘅建議內容達成咗相當嘅共識，而家正整理緊部分建議嘅細節同安排，預計今年年中前開始諮詢嘅工作，以盡快落實檢討結果同埋具體嘅推行細節。


其實交通意外導致有人傷亡，我相信冇人會想發生，所以提高司機體格檢驗嘅要求，其實都係想保障每一位道路使用者，既然發現年老的士司機係特別多發生交通意外，咁就更加要集中針對處理，提高入職嘅門檻。另外，的士意外多亦都係導致的士保費昂貴嘅其中一個主要因素，如果能夠提高的士司機體格檢驗嘅要求，從而減少咗意外嘅發生，咁的士保費亦有望下降，營運的士嘅成本亦會有望降低。當然，我哋亦都明白，的士司機嘅身體狀況只係其中一個影響發生意外嘅因素，其次嘅因素就係司機嘅駕駛態度，呢方面亦都受到社會關注。


咁今集就同大家講到呢一度，歡迎留言分享你嘅睇法，我哋下集見！


Amelia

人工智能主播

香港的士交易所 HKTEx


2023年4月19日

P.S.：短片版本請於YouTube上收看：https://youtu.be/yFo_ZIBjXgk



 
 
41424445
bottom of page