top of page

最新市場動態

的士新聞資訊【業界拒換電動的士 盼政府完善配套】 AI女主播 (廣東話) 2023年5月16日


大家好，我係A.I.Olivia，今日同大家睇睇一單有關的士嘅新聞。


為咗推動電動車普及化，政府目標喺2027年年底前投入大約3000架電動的士，但係截至今年3月底，當局預留咗2億港元嘅新能源運輸基金，而家只係批出咗23架新款電動的士試驗申請。


早前有議員聯同的士業界表示，業界拒絕更換電動的士，當中最大嘅阻礙係充電設施唔足夠，擔心的士司機長時間排隊充電會影響司機生計，所以促請政府完善充電配套，推動電動的士同綠色運輸。


議員葛珮帆指出，過去5年，充電設施嘅增幅係遠遠落後於電動車嘅增長，上年電動私家車按年增加咗70%，但係同一時間，充電設施嘅數目只係增加咗約16%，其中快速充電設施數量好少，而且呢幾年增加幅度非常緩慢，4年間只係增加咗500個，截至上年底全港只有唔夠1000個。

另一位議員陳恒鑌則表示，電動車政策涉及土地、電力、汽車嘅登記同審批等等嘅範疇，促請政府加強跨部門合作，並且加快審批程序。佢舉例指出，有商業公司喺新界地區物色大量土地設立充電站，協助公共交通轉型，但係相關嘅土地申請同審批程序進度緩慢，期望政府可以拆牆鬆綁，提供更多嘅政策支援。

另外，的士業界代表就認為，如果香港的士全面電動化，喺環保、維護成本、舒適度、安全性都會有所提升，但係電動的士普及化需要做足三方面嘅工作，包括：第一，引入合適電動車型號，第二，提供資助同誘因減輕車主經濟負擔，第三，喺近市區嘅地點加設足夠嘅充電設施。


的士業界又向政府提出多項嘅建議，包括加強跨部門合作，盡快提供完善充電配套嘅一站式服務平台，又建議研究引入流動充電車，提供可流動嘅充電點，喺唔同嘅時間滿足唔同地區的士嘅充電需求，短期內有助解決市區充電設施不足嘅問題。


正如我之前都有講，香港要成功發展電動的士，仲有好多問題要解決，但係首要一定要解決充電設施不足嘅問題，希望政府能夠有效咁完善配套，我哋香港的士交易所會同大家繼續密切留意發展情況。


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年5月16日

P.S.：短片版本請於YouTube上收看：https://youtu.be/L-QC6zcorZM



 
 

的士牌市場資訊【市區的士按揭例子】2023年5月


大家好，歡迎收睇「的士牌市場資訊」，我係A.I.Olivia，我哋香港的士交易所每星期都會同大家分享有關的士牌買賣嘅最新市場資訊，未訂閱我哋頻道嘅朋友，記得訂閱，多謝支持。


咁今日就同大家睇一睇最新嘅的士按揭資訊，了解一下如果購買一個市區的士牌連一架全新混能的士，到底首期係幾多，月供幾多錢，收租回報又係幾多。


我哋睇一睇以下呢個例子，我哋假設經買賣雙方議價之後，市區的士嘅成交牌價係430萬，而一架全新混能市區的士嘅車價係41萬全包，包首年全保保險同埋包首年牌費，另外車Cam咪錶都包晒，即係一架已經可以即時開工嘅的士。咁佢嘅成交價就係430萬加41萬，即係471萬。


我哋再以現時銀行提供嘅按揭貸款計劃嚟做計算，以全新市區混能的士為例，銀行按揭貸款金額最高大約可以借到373萬，計返嘅話，大約係成交價嘅8成。咁以首期嚟講，以呢個例子嚟計算，就大約只需要98萬。


至於呢個按揭例子係做緊H按，個按揭利率係H加2.3，封頂位係P減1，而今日5月10號，銀行嘅一個月同業拆息H係4.1576%，最優惠利率P係6%，因為以呢個例子睇，H加2.3係已經觸及到封頂位，所以就會以P減1嚟做計算，按揭利率即係5厘。按揭年期最高可以做到三十年，360期，經過計算之後，月供就大約係20000蚊，如果車主係將架車交俾我哋管理嘅話，我哋香港的士交易所提供全新市區混能的士嘅每月託管保證租金係21400蚊，當中已經包晒所有日常基本維修保養，即係包括晒換呔、換偈油、換擋風玻璃等等。


我哋最後再同大家計埋個租金年回報，以成個資產價值471萬嚟計，佢個租金年回報超過5厘。


最後都要補充一句，要提提大家，記住的士牌價，同埋銀行按揭利率，每日都有機會唔同，我哋提供以上呢個例子，都盡量反映返最新嘅資訊。如果當你打算想購買的士牌嘅時候，記得聯絡我哋香港的士交易所嘅代理，了解返最新嘅的士牌價同埋銀行按揭利率資訊。


咁今集就同大家講到呢一度，下星期繼續同大家分享有關的士牌買賣嘅最新市場資訊，密切留意我哋香港的士交易所，我哋下集見！


Olivia

人工智能主播

香港的士交易所 HKTEx


2023年5月10日

P.S.：短片版本請於YouTube上收看：https://youtu.be/VJsdVPjFyv4



 
 

的士新聞資訊【司機拒交醫療報告 運輸署束手無策】AI女主播 (廣東話) 2023年5月9日


大家好，我係A.I.Olivia，今日同大家睇睇一單有關的士嘅新聞。


早前3月份喺北角發生咗一單的士落斜失控撞倒3位途人嘅交通意外，84歲嘅涉事的士司機亦都受傷，隨即引起社會關注的士司機嘅體格同健康問題。運輸及物流局早前指出，喺過去兩年，70歲或以上嘅的士司機涉及交通意外宗數平均超過410宗。運輸署而家正在檢討司機體格證明安排，喺5月19號將會喺立法會交通事務委員會當中討論。


現時如果司機患有「指明疾病或傷殘」，例如：未受控制嘅糖尿病、精神錯亂、高血壓會隨時暈倒，又或者有理由相信司機患病且駕駛會對公眾構成危險，運輸署有權取消司機嘅駕駛執照。而執法部門喺調查交通意外嗰陣時，亦都會向運輸署轉介「懷疑司機可能健康有問題」個案。


運輸署表示，喺2013年至2022年期間，接獲咗86宗「懷疑司機可能健康有問題」個案，其中6位司機未授權運輸署查閱佢哋嘅醫療報告。喺現行嘅法例同機制之下，運輸署無辦法評估相關嘅司機係唔係適合駕駛，只能夠喺續牌嘅時候要求司機提供醫療報告。運輸署提到，嗰6位司機當時嘅年齡係介乎24歲至72歲，駕駛執照將於2024年至2029年到期，其中3位司機持有的士、小巴或巴士駕駛資格。


議員田北辰早前喺電台節目形容呢個情況「荒謬絕倫」，批評運輸署被動，應該向法庭申請要求涉事司機提供醫療報告。佢支持政府將司機體格證明要求降至到65歲，並且改為每年一檢，但係需留意檢查內容，同埋要由指定醫生或者診所，按統一嘅標準進行，確保公信力。田北辰又指出，私隱條例有豁免條例，例如當事人可能作出危害個人及公眾安全，理論上運輸署係有權要求機構提供「懷疑可能健康有問題」個案嘅醫療報告。但係佢認為更好嘅方法係運輸署向法庭申請，要求涉事司機提供醫療報告，由法庭把關。


另外，汽車交通運輸業總工會九龍分會副主任杜燊棠表示，唔少司機都有做體檢，但係以往比較簡化，佢促請當局訂明指定嘅檢查項目。佢認為，體檢改為每年一檢對年老嘅司機造成騷擾，質疑年輕司機亦都有健康問題，指如果當局必須調整要求，期望縮至最多3年一檢。


運輸署則表示，而家正在檢討司機體格證明嘅要求，並且喺同一時間檢視「懷疑個案」嘅跟進同處理，以及所涉及修例嘅需要。


其實作為的士司機，有良好嘅體格同健康係非常重要，無論對司機、乘客、同道路使用者嘅安全都係有好處，收緊司機體格證明要求係其中一個方法，不過最緊要係司機多啲留意自己嘅身體狀況，定期做體檢，如果發現身體狀況唔好，就需要休息，唔好揸車喇！


咁今集就同大家講到呢一度，歡迎留言分享你嘅睇法，我哋下集見！


Olivia

人工智能主播

香港的士交易所 HKTEx


2023年5月9日

P.S.：短片版本請於YouTube上收看：https://youtu.be/bSvEB-LY3Y8



 
 
39404243
bottom of page